— Pucin raźviazaŭ vajnu va Ukrainie. Vy spadziavalisia, što ŭ takim maštabie heta budzie?
— Tak, biezumoŭna. Heta nie pavinna było nikoha ździŭlać, chto ŭ hetym raźbirajecca. Usio ž było vidavočna, prosta mocna pracavała ahientura, i mocna pracavała infarmacyja. Pastajanna Pucin i ŭsia jaho klika kazali, što jany nie źbirajucca. Jany pahražajuć, ale nie źbirajucca…
Tamu była praviedziena vielmi masavanaja infarmacyjnaja rabota, kab zastać Ukrainu źnianacku. Dumaju, źnianacku jany jaje nie zastali, ale siły vielmi niaroŭnyja. I techničnaje ŭzbrajeńnie na baku Rasii, a na baku Ukrainy — maralny čyńnik.
— Jakaja meta ŭ Pucina? Dałučyć Ukrainu da RF ci prosta pastavić svajho «prezidenta»?
— Stratehičnaja meta, biezumoŭna, — dałučyć, ale napačatku vyhladaje tak, što jany chočuć zachapić Kijeŭ, zachapić kiraŭnictva i prymusić ich da kapitulacyi. Užo pra heta pačali havaryć. I navat takija ludzi, jak Makron, pačali pra heta kazać. Tamu hety płan užo prasočvajecca, kab zachapić Kijeŭ, prymusić kapitulavać i vyznačyć status Ukrainy, padlehłaj Rasii, pryznačyć svaich ludziej i tak dalej. Heta bližejšaja meta i jana prahladajecca.
A dalokaja meta, biezumoŭna, źviazanaja z tym, što zrabiŭšy pieršy krok, budzie zrobleny druhi pa źniščeńni dziaržavy. Heta jany tak dumajuć, ale hetaha ničoha nie atrymajecca. Bo hetaja vajna zrabiła z ukraincaŭ nacyju.
A kali jašče dalej hladzieć, to Pucinu treba zabrać Prybałtyku, Polšču i ŭvohule ŭsiu Jeŭropu.
— U 2014 hodzie Łukašenka ŭ razmovie z Alaksandram Turčynavym skazaŭ nastupnaje: «Saša, nikoli nie budzie, što z terytoryi Biełarusi niejkija vojski atakujuć Kijeŭ. Nikoli». I voś majem…
— Tut vinavaty nie Łukašenka, a ludzi, jakija jamu vierać. Što jany, nie bačać, chto taki Łukašenka? Tamu hetyja słovy i nijakija jahonyja słovy nielha ŭsprymać surjozna.
— U mianie takoje ŭražańnie, što Łukašenka źnik ź infarmacyjnaj prastory.
— Tamu što jon zaraz ništo. Zaraz jon źniščany jak niejkaja samastojnaja palityčnaja fihura. Jon całkam pradaŭsia Pucinu, staŭ chałujom, upuściŭ vojski ŭ Biełaruś, i nijakaj roli jon nie hraje. Biełaruś akupavanaja zaraz. Zaraz usio robiać akupanty, tolki farmalna pakul isnuje Saviet ministraŭ, «prezident» falšyvy, a nasamreč — heta ŭžo akupacyjnaja zona, dzie ŭsim rasparadžajucca akupanty. Voś što jon stvaryŭ. Dla Biełarusi heta hańba i strašennaja biada, jakaja pačałasia ŭ 1994 hodzie.
