Alaksandr Abramienka (sprava) i Illa Buraŭ, Piekinskaja alimpijada. Fota: Cameron Spencer / Getty Images.
Ciapier Abramienka, topavy frystajlist i ŭdzielnik piaci alimpijad, chavajecca ad rasijskich bomb na padziemnym parkinhu ŭ svaim kijeŭskim domie. Razam ź im — žonka Alaksandra i ich dvuchhadovy syn Dźmitryj, piša New York Post.
Tysiačy ludziej sprabujuć pakinuć Kijeŭ, bo, jak ličać ukrainskija vajskoŭcy, zachop stalicy krainy — hałoŭnaja meta rasijskich vojskaŭ.
Noč na padziemnym parkinhu. Fota: archiŭ Alaksandra Abramienki.
Noč 4 sakavika, kali amierykanskija žurnalisty źviazalisia z Abramienkam, akazałasia ŭžo siomaj, jakuju jon ź siamjoj pravodziŭ na parkinhu. Frystajlist patłumačyŭ, što spać tam bolš biaśpiečna, čym u 20-paviarchovym domie nad stajankaj: «Spać u kvatery strašna. Ja sam bačyŭ z vakna, jak sistemy supraćpavietranaj abarony pracujuć suprać rakiet voraha, čuŭ mocnyja vybuchi».
Siamja zapłanavała pakinuć Kijeŭ 5 sakavika. Abramienka i jaho žonka źbiralisia pajechać u Zachodniuju Ukrainu, na terytoryju niedaloka ad miažy sa Słavakijaj i Vienhryjaj. Tam, u horadzie Mukačava, žyvie trenier spartoŭca Envier Abłajeŭ. Jak patłumačyŭ Abramienka, jon źbiraŭsia jechać na mašynie i ŭziać z saboj tolki samaje nieabchodnaje, a taksama ježu i svaje alimpijskija miedali — frystajlist byŭ jašče i čempijonam Hulniaŭ-2018.
Baćki Alaksandra žyvuć u horadzie Mikałajeŭ na Azoŭskim mory, tam vyras i sam spartoviec. U Mikałajevie iduć bai, i baćki frystajlista čujuć vybuchi, ale pakul što vybiracca z horada niebiaśpiečna.
Abramienka dapuskaje mahčymaść, što jaho žonka i syn źjeduć z Ukrainy, jak i bolš čym miljon inšych biežancaŭ. Sam spartoviec, jak i inšyja ŭkrainskija mužčyny jaho ŭzrostu, pakinuć krainu nie moža.
