«Biełmiedpreparaty» — najbujniejšaje farmaceŭtyčnaje pradpryjemstva krainy. Zerkalo.io patelefanavała tudy jak pryvatnaja asoba, kab daviedacca bolš padrabiazna pra prablemy z pastaŭkami lekaŭ. Na pradpryjemstvie paćvierdzili, što šerah miedykamientaŭ sa śpisu nižej sapraŭdy pakul nie budzie vyrablacca. Praŭda, pryčyny roznyja: dzieści cech spyniŭ vytvorčaść da likvidacyi zaŭvah, dla niekatorych lekaŭ (u pryvatnaści, karvałołu) niama reaktyvaŭ dla praviadzieńnia analizu jakaści, choć sam preparat vyrableny.
Pa słovach supracoŭnika pradpryjemstva, na takoje stanovišča spraŭ u tym liku paŭpłyvali sankcyi. Naŭprost jany nie zakranajuć farmaceŭtyku, ale datyčacca dapamožnaj syraviny, fłakonaŭ, korkaŭ i hetak dalej — častka ŭsiaho hetaha zavoziłasia z Hiermanii, ZŠA i Ukrainy. Ale situacyja nie krytyčnaja, zapeŭnili na «Biełmiedpreparatach».
— U aptekach i na składach jość preparaty nie na miesiac, a z zapasam — na try-čatyry. Heta značyć, u nul ničoha nie syšło. U nas jašče jość składskija zapasy, syravina, tamu budziem praciahvać vyrablać. Mohuć być pytańni da budučych pastavak, ale pakul niama takoha, kab nie było niejkich lekaŭ. Da taho ž jość anałahi, na adzin preparat u nas niekalki ajčynnych vytvorcaŭ. Tamu, dumaju, nie pavinna być pytańniaŭ.
— Ale vybar moža skaracicca?
— Tak, budzie mieniej, nie tak, jak raniej. Ale, ja dumaju, heta ŭsio roŭna na pieršyja niekalki miesiacaŭ, potym usio naładzicca.
Siarod pieraličanych u dakumiencie lekavych srodkaŭ jość jak tyja, bieź jakich možna abyścisia, nakštałt askarbinavaj kisłaty, tak i preparaty, nieabchodnyja dla lačeńnia roznych zachvorvańniaŭ.
Pa prośbie Zerkalo.io doktar aniestezijołah-reanimatołah (jon pažadaŭ zachavać ananimnaść) praanalizavaŭ hety śpis.
— U hetym śpisie jość «miascovyja aniestetyki» navakain i lidakain (pieršy preparat nie płanujecca da pastaŭki ŭ pieršym paŭhodździ 2022 hoda, druhi płanujuć vypuścić u sakaviku i realizavać u treciaj dekadzie červienia). U majoj praktycy jany nieabchodnyja, prymianiajucca pry miascovym abiazbolvańni i praviadzieńni rehijanarnych błakad. Heta samyja prostyja miascovyja aniestetyki —iość i inšyja, ale jany daražejšyja i impartnyja. Jašče vielmi važny preparat kłapidahreł (jaho pastaŭki ŭ sakaviku buduć častkovymi), kali jaho nie budzie, to pacyjenty z vostrym infarktam mijakarda nie atrymajuć naležnuju miedycynskuju dapamohu.
Surazmoŭca reziumuje, što ŭ mnohich preparataŭ sa śpisu jość anałahi, ale niekatoryja, nakštałt kłapidahrełu, zamianić nielha — jon užyvajecca ŭ adpaviednaści z pratakołami Ministerstva achovy zdaroŭja. Da taho ž doktar dadaje, što ŭ jaho balnicy ŭžo skazali ekanomić leki.
