Centralnaja płošča paśla abstrełu budynka meryi ŭ Charkavie, 1 sakavika 2022 h. Fota: AP
Siarhiej Čały
Ekśpiert paśladoŭna prasoŭvaŭ ideju pieratvareńnia eskałacyi ŭ vajenny nastup jak va ŭłasnych strymach, tak i ŭ haściavych efirach. Pry analizie ruchu ciažkoj techniki rasijan, pijar-technałohij, z dapamohaj jakich padavalisia śvietu vučeńni na miažy z Ukrainaj, maštabnych infarmacyjnych źlivaŭ Čały prychodziŭ da šerahu nieviasiołych vysnoŭ. Pa-pieršaje, militarysckaja isteryja metanakiravana nahniatałasia akurat pad interviencyju ŭ susiedniuju krainu. Pa-druhoje, kiejsy Rasii ŭ Hruzii dy Danbasie sami saboj vybudoŭvajucca ŭ paralel z tymi padziejami, jakija adbyvalisia ŭ studzieni-lutym vakoł Ukrainy.
A pa-treciaje, kroki, zroblenyja Maskvoj ciaham zimy, nie pakidali anijakaj inšaj alternatyvy ŭvarvańniu.
«Vierahodnaść taho, što heta moža adbycca prosta tamu, što ničoha inšaha Pucinu nie zastaniecca, vielmi vysokaja», — kanstatavaŭ Čały. I mieŭ racyju.
Arciom Šrajbman
Pramoha adkazu na pytańnie, ci pieratvorycca pahroza ŭzbrojenaj ataki Rasii na Ukrainu ŭ vialikuju vajnu, ekśpiert doŭhi čas nie davaŭ. Naprykancy studzienia zabłytanaść u palityčnych raskładach, na dumku Šrajbmana, ujaŭlałasia nastolki vialikaj, što «tolki varažbitki zdolnyja z upeŭnienaściu ŭ sto adsotkaŭ dekłaravać, nadarycca vajna ci nie». Adnak, kali palitołahu ŭsie ž davodziłasia ŭzvažvać usie «za» dy «suprać», jakija paŭstavali pierad Uładzimiram Pucinym napiaredadni ahresii, Arciom schilaŭsia da abrańnia palitykami mirnaha šlachu vyśviatleńnia adnosin.
Fota: AP
«Jość adčuvańnie, što paŭnavartasnaja vajennaja apieracyja — heta zanadta, praźmierna ryzykoŭnaja apieracyja dla prezidenta Rasii», — pazicyja Šrajbmana, datavanaja siaredzinaj lutaha.
Alaksandr Frydman
Ciaham zimy historyk bolš fakusavaŭsia na padziejach vakoł i ŭnutry Biełarusi, tady jak bolš šyroki palityčny kantekst akreślivaŭ konturna. Chutčej, jaho natatki ŭ telehram-kanale mieli charaktar kanstatavańnia faktaŭ dy padsumavańnia trendaŭ. Tym nie mienš 11 lutaha Frydman dakładna vyłučyŭ dva kirunki ruchu, miž jakimi abiraje Maskva: ździejśnić napad dy stać ahresaram u vačach suśvietnaha hramadstva albo admovicca ad impierskich ambicyj pad ciskam Zachadu.
«Dypłamatyčnuju vajnu Pucin prajhraŭ. Tamu nam zastajecca tolki spadzieŭ, što sapraŭdnaja vajna nie raspačniecca», — z sumam kanstatavaŭ historyk. I, jak bačna, u svaim piesimiźmie byŭ niedaleki ad praŭdy.
Jahor Lebiadok
Vajenny ekśpiert adnym ź niamnohich advažvaŭsia davać kankretnyja prahnozy ŭ dačynieńni da raźviazvańnia vajny Rasijaj. «Naŭrad ci eskałacyja adbudziecca ciapier. A voś kali kazać pra pieryjad da 2026 hoda, to tut vierahodnaść vielmi vialikaja… Usie čakajuć pačatku nastupu dzieści ŭ studzieni-lutym. Adnak ja b daŭ takomu scenaryju sorak adsotkaŭ viery. Vajna, chutčej, nie pačniecca, čym naadvarot — pakul iduć pieramovy, pakul Rasija imkniecca sabie niešta vytarhavać», — adznačaŭ Lebiadok.
Irpień, pryharad Kijeva. Fota: kiev.informator.ua
Pry hetym analityk abapiraŭsia na anałahičnyja dziejańni, što pradprymaŭ Pucin i jaho armija ŭ 2021-m, kali pierakidvańnie vojskaŭ dapamahło vyvieści z-pad sankcyj «Paŭnočny patok — 2». Adnak abmaŭlaŭsia: da 2026-ha abvastreńnie ŭsie ž zdarycca, bo aŭtarytaryzm Pucina, styl kiravańnia dziaržavaj dy źbieh šerahu źniešnich abstavinaŭ zvodziać usio ŭ krytyčnuju kropku.
Alaksandr Kłaskoŭski
Palityčny ahladalnik davoli skieptyčna staviŭsia da idei rasijskaj ahresii, pakolki ličyŭ Maskvu niedastatkova mocnaj dla ažyćciaŭleńnia surjoznaj bajavoj apieracyi. «Porachu na heta ŭžo niama. Nie toj ekanamičny patencyjał. I jak by ni vychvalalisia rasijanie vajennaj mocaj, usio roŭna zrazumieła, što siły NATA kudy bolš mahutnyja. Kali nasamreč raspačynać jadziernuju vajnu, to heta hamon usim.
Tamu, miarkuju, navat pry ŭsioj svajoj avanturnaści, tyja, chto ŭ Kramli, nie takija ŭžo samahubcy, kab raspačynać heta ŭsio ŭsurjoz», — śćviardžaŭ ekśpiert.
Praŭda, bližej da času «iks» jon maksimalna dakładna akreśliŭ rolu Biełarusi ŭ vajnie dy atrymańnie krainaj cetlika «ahresar». Bo, na dumku Kłaskoŭskaha, navat kali ajčynnyja samaloty nie voźmucca bambić Kijeŭ, sam fakt dazvołu rasijanam sabrać tut, na miažy z Ukrainaj, udarny kułak — prysud Łukašenku razam ź dziaržavaj. «Navat kali Maskva prosta skarystajecca terytoryjaj dla padrychtoŭki ŭdaraŭ pa Ukrainie, Biełaruś de-fakta budzie ŭsprymacca jak saŭdzielnica ahresii», — rabiŭ słušnuju vysnovu palitołah.
Andrej Kazakievič
Paśla taho, jak vydańnie Military Times abviaściła pra płany Maskvy ažyćciavić «śpiecapieracyju» i navat padzialiłasia mapaj patencyjnych kirunkaŭ udaru, palitołah abviaściŭ pra vierahodnaść napadu Rasii roŭnaj nulu. Na jaho dumku, publičnaść zryvała płany ahresara pa ŭsieahulnaj mabilizacyi. Akramia taho, dziejańni Pucina, na dumku ekśpierta, sutykalisia b z supracivam nie tolki Uzbrojenych siłaŭ Ukrainy, ale i NATA dy samich rasijan unutry krainy. «I hałoŭnaje, takaja apieracyja nie vyrašaje anijakich stratehičnych prablem, jak užo demanstravała situacyja na Danbasie», — padkreślivaŭ analityk.
Maryupal padčas abstrełu rasijskimi tankami. Fota: AP / Evgeniy Maloletka
Nie bačyŭ Kazakievič i nahod dla pačatku vajny, jak reakcyi na pavodziny Ukrainy. «Represii rasijan, unutrypalityčny kryzis (kali źniešniaja akcyja mahła b adciahnuć ad jaho ŭvahu), paskoranaja padrychtoŭka Ukrainy dla ŭstupleńnia ŭ NATA — ničoha takoha my ciapier nie bačym», — fiksavaŭ palitołah dy ličyŭ źviestki pra patencyjnaje ŭvarvańnie Rasii infarmacyjnym ukidam.
Cynic
Adzin z zaŭvažnych analityčnych telehram-kanałaŭ ciaham zimy davoli łahična tłumačyŭ hramadskaści, čamu vajny nie budzie. Kožnaje vykazvańnie bujnych palityčnych hulcoŭ raźbirałasia biez emocyj — i zbolšaha analiz supadaŭ z dalejšym raźvićciom padziej. Adnak pucinskija mietamarfozy ŭ lutym raptoŭna pierakreślili ładnuju teoryju, chaj sabie «Cynik» z ahulnaj idejaj i nie pamyliŭsia:
«Što my majem?
Mahčymyja pravakacyi, abstreły na terytoryi Danbasa, fejkavyja kadry «cynhiela», adnak šaniec maštabnaj vajny katastrafična mały.
Jana mahčymaja jak žest adčaju RF: Rasija da vajny nie rychtavałasia jak śled, a Zachad pad maskaj padrychtoŭki da vajny ŭzmacniaŭ svaju prysutnaść na uschodnich miežach».
Adsutnaść abjektyŭnych pryčyn dla napadu dy niedastatkovaja arhumientavanaść subjektyŭnych prahnozaŭ «Cynika» nie spraŭdziłasia. Usio vyliłasia nie tolki ŭ vajnu, ale i ŭ vializny humanitarny kryzis.
Šrajbman: Jość adno chutkaje vyjście z vajny. Ale jaho vierahodnaść nievialikaja
Čały havoryć pra vajnu: Ja dumaju, što spatrebicca hadoŭ 50, kab naniesienyja ŭkraincam kryŭdy zahailisia
«Biełaruś na mižnarodnaj arenie moža skacicca da statusu DNR». Ekśpierty razvažajuć, jak na Biełarusi adabjecca ŭvarvańnie va Ukrainu
