Stan zavoda abmiarkoŭvaŭsia na schodzie akcyjanieraŭ.
«Spačatku — pa 2021 hodzie. Vyručka hrupy ŭ paraŭnańni ź minułym hodam vyrasła na 11,8% (z 485,2 da 542,8 miljona rubloŭ), adnak apieradžalny rost sabiekoštu pryvioŭ da taho, što prybytak ad realizacyi skłaŭ 79 miljonaŭ, što na 2,5 miljona mienš čym letaś. Adpaviedna, čysty prybytak skłaŭ 55,8 miljona rubloŭ (2020 — 71,6 miljona). Jak bačym, źnižeńnie prybytku davoli zaŭvažnaje (bolš za 20%)», — paviedamlaje finansavy analityk.
Jon tłumačyć, što hałoŭnaja pryčyna rostu sabiekoštu — rezki rost koštu kamplektujučych i mietałaprakatu.
Vyklikajuć u akcyjanieraŭ zaniepakojenaść źnižeńnie abjomu prodažaŭ i prablemy z pastaŭkami kamplektujučych. Kali strata ŭkrainskaha rynku nie mocna adbiłasia na prodažach (dola — 5%), to zapavolvańnie spažyvieckaj aktyŭnaści ŭ RF, kudy pradajecca 75% plit, paŭpłyvała značna macniej. Mieniedžmient čakaje, što prodažy ŭtrymaje sychod z rasijskaha rynku zachodnich brendaŭ.
«Prablemy ź niedachopam kamplektujučych i zapavolvańnie tempaŭ prodažaŭ pryviali da pieravodu pradpryjemstva na čatyrochdzionku, što źjaŭlajecca razumnym krokam z punktu hledžańnia bolš aptymalnaha vykarystańnia vytvorčych mahutnaściaŭ pradpryjemstva, — kaža Naryvončyk.
Kiraŭnictva nie ličyć niedachop krytyčnym — pradpryjemstva samastojna vyrablaje 70% kamplektujučych, a inšyja pazicyi płanuje zamiaścić. U mai čakajecca vychad na raniejšuju mahutnaść.
«Ułasny kapitał vyras na 11,1% — da 544,3 miljona rubloŭ. Hrašovaja pazicyja składaje 112 miljonaŭ. Tut usio niadrenna, pa finansavych vynikach zapas tryvałaści jość, choć abarotny kapitał skaračajecca, — pryvodzić ličby analityk. — Afihieŭ ad sum, jakija pradpryjemstva marnuje na sponsarskuju dapamohu — 3 miljony rubloŭ. Tym bolš što 2 (!) z 3 miljonaŭ iduć na spansavańnie handbolnaha kłuba. Ja jašče razumieju akazańnie padtrymki adukacyi i achovie zdaroŭja, ale padtrymku spartyŭnych kamand u takich abjomach ja nikoli nie razumieŭ».
Dyvidendy kampanii za 2021 hod skłali 150,62 rubla na akcyju da padatkaŭ, vypłata pavinna adbycca da 31 maja (dva miesiacy z daty pryniaćcia pastanovy ab vypłacie dyvidendaŭ).
