Bajeviki DNR u Maryupali, 16 krasavika. Fota: Alaksiej Alaksandraŭ /AR
Na dumku Račkoŭskaha, Maskva ŭsio jašče zdolnaja vykanać svaju zadaču-minimum — zachapić Danieckuju i Łuhanskuju vobłaści i prabić suchaputny kalidor da Kryma. I paśla taho, jak Rasija vyvieła svaje vojski z poŭnačy Ukrainy, centr bajavych dziejańniaŭ pieramiaściŭsia na jaje paŭdniovy ŭschod.
Ale ž tut usio nie tak prosta. Z vajennaha punktu hledžańnia vyhladaje, što ŭziaćcie Maryupala rasijanami — pytańnie času, ale heta nie aznačaje, što Rasija vyjhraje ŭ baraćbie na hetym froncie, tłumačyć Robiert Račkoŭski dla onet.pl.
Pryrodnyja ŭmovy ŭ toj častcy krainy vielmi spryjajuć samaabaronie. U vakolicach Chiersona i Mikałajeva šmat čarnaziomaŭ, u inšych rehijonach krainy ich taksama chapaje. Hetaja hleba cudoŭna padychodzić dla sielskaj haspadarki, ale nie nadta dobra — dla vajennych dziejańniaŭ. U studzieni i lutym jana zamiarzaje, ale paśla padtaje, dy jašče ŭ hety čas va Ukrainie byvaje daždžlivaje nadvorje. Tak ukrainskija čarnaziomy pieratvarajucca ŭ brudnuju kałatušu, u jakoj i zachrasła rasijskaja ciažkaja technika. Kali b rasijanie vyrašyli nastupać nie ŭ kancy lutaha, a bolš čym na miesiac raniej, u ich było b bolš šansaŭ na pieramohu. Ale, miarkuje Račkoŭski, Kitaj spryjaŭ tamu, kab bajavyja dziejańni pačalisia nie raniej za kaniec Alimpijady ŭ Piekinie.
Vopyt i bajavy duch suprać najlepšych resursaŭ
Račkoŭski taksama acaniŭ mahčymaści abodvuch bakoŭ u vialikaj bitvie na Danbasie, jakaja raspačynajecca ŭ hetyja dni. Ekśpiert ličyć, što šansy bakoŭ u bitvie — 50 na 50.
Ukraincam, napeŭna, dapamohuć asablivaści reljefu krainy, vysoki bajavy duch sałdat i ich vajenny vopyt. Zhodna z danymi ŭkrainskaha boka, 90% ukrainskaha vajskovaha reziervu — vieterany bajavych dziejańniaŭ na Danbasie.
Bolš za toje, z ulikam taho, što vajna na Danbasie idzie ŭžo 8 hadoŭ, Ukraina maje ŭ tym rehijonie vielmi šmat umacavańniaŭ. Va ŭkraincaŭ jość efiektyŭnaja zachodniaja supraćtankavaja zbroja i supraćpavietranaja zbroja blizkaha dziejańnia, u ich dobraja apieratyŭnaja infarmavanaść i pravilnaja taktyka dziejańniaŭ u adpaviednych apieratyŭnych umovach.
Ale ž ukrainskaja armija maje svaje prablemy, jakija mohuć pavysić šansy Rasii na pośpiech. Ukraincam nie chapaje sistem supraćrakietnaj i supraćpavietranaj abarony siaredniaha dyjapazonu, i ŭ vyniku im ciažka abaraniacca ad rasijskich abstrełaŭ z bolš dalokaj dystancyi — to-bok ad zbroi nakštałt «Točki-U» i «Iskanderaŭ». Va USU nie ŭsio dobra z pastaŭkami paliva, bojeprypasaŭ i pradmietaŭ miedycynskaha pryznačeńnia.
Ukrainskaja armija, pa słovach Račkoŭskaha, taksama maje ciažkaści ź biahučym ramontam techniki i z adaptacyjaj da tych uzbrajeńniaŭ, jakija ŭkraincy zachoplivajuć u rasijskaha boka. Ciapier vielmi važna, kab zachodnija krainy praciahnuli pastaŭlać Ukrainie zbroju ci navat pavialičyli kolkaść hetych pastavak, bo jany mohuć mieć vyrašalnaje značeńnie ŭ vajnie. Nie mienš važna zachoŭvać sankcyi suprać Rasii ci navat uzmacnić ich.
Ale ž i ŭ rasijskaj armii nie ŭsio dobra. Siarod jaje prablem — nizki bajavy duch sałdat i adsutnaść u ich bajavoha vopytu, prablemy z kamunikacyjaj i šyfravańniem infarmacyi, pravał u śfiery prapahandy. Simpatyi śvietu nie na baku rasijskich sałdat, i heta taksama ŭpłyvaje na ich nastroj.
Čym usio skončycca
Pavodle Račkoŭskaha, asnoŭnyja epizody bitvy projduć kala horada Izium, i Hienštab USU ŭžo fiksuje tam sproby nastupu supraciŭnika. Račkoŭski ličyć, što kali rasijanie zdolejuć prarvać ukrainski supraciŭ kala Iziuma, jany pojduć na Kramatorsk i dalej na poŭdzień krainy. Taksama Račkoŭski pradkazvaje žorstkija bai ŭ rajonie Sievieradaniecka. Kali dadać da ŭsiaho hetaha nastup ruskich z poŭdnia, z boku Papasnaj, takaja taktyka, mierkavana, pavinna mieć na mecie płan akružyć ukraincaŭ i takim čynam vyjhrać bitvu za Danieckuju i Łuhanskuju vobłaści. Ale pry hetym mahčyma, što i inšyja rehijony Ukrainy trapiać pad abstreły — chutčej za ŭsio, rakietnyja.
Račkoŭski bačyć dva mahčymyja vyniki vajny. Kali ŭ Rasii ŭsio atrymajecca, jana voźmie pad poŭny kantrol Danieckuju i Łuhanskuju vobłaści, dy, napeŭna, pažadaje taksama kantralavać Chiersonskuju i Zaparožskuju vobłaści. U cełym, Maskva žadaje zachapić važnyja dla ŭkrainskaj ekanomiki abjekty, u tym liku bahaty na pryrodnyja resursy Danbaski rehijon, i atrymać dostup da Azoŭskaha mora, a taksama party Bierdzianska i Maryupala — da vajny mienavita praź ich Ukraina ekspartavała svaju sielskahaspadarčuju pradukcyju i stal. U budučyni metaj Rasii taksama mohuć stać Mikałajeŭskaja i Adeskaja vobłaści, što dazvolić Maskvie abjadnać akupavanyja terytoryi z Prydniastroŭjem.
Ale ž Ukraina maje mahčymaść pieramahčy ŭ danbaskaj bitvie i pajści ŭ kontrnastup. Navat isnuje vierahodnaść taho, što ŭkraincy zdolejuć całkam adnavić kantrol nad Danieckaj i Łuhanskaj abłaściami, ale ž Račkoŭski nie bačyć u chutkim časie mahčymaści viartańnia Kryma ŭ skład Ukrainy. Rasija nie addaść jaho pa pryčynach stratehičnaj važnaści paŭvostrava, a Ukrainie pakul što nie chapaje sił i resursaŭ, kab praciahvać bai ŭ tym kirunku.
Ale ž, kali Rasiju atrymajecca vycisnuć z ukrainskaha uschodu, heta ŭžo budzie aznačać poŭnuju parazu Pucina i asłableńnie Rasii. Taki chod padziej daść mahčymaść dla dalejšaha palityčnaha i ekanamičnaha cisku na Rasiju i dla źnižeńnia jaje ŭpłyvu ŭ śviecie.
«Naša Niva» adnaŭlaje zbor danataŭ — padtrymać prosta
Čytajcie taksama:
Zialenski: Ukraina nie addaść terytoryi na ŭschodzie, kab skončyć vajnu
«Kramatorsk — heta horad, dzie jany chočuć zamknuć koła». Vajenny ekśpiert — pra taktyku nastupleńnia rasijskich vojskaŭ u najbližejšyja dni
