«Mančester Sici» dvojčy zasmuciŭ «Reał» užo paśla 11 startavych chvilin hulni. Fota: Uefa.com
Pra toje, što sustreča na «Ecichadzie» atrymajecca niezvyčajnaj, stała zrazumieła ŭžo na 93-j siekundzie, kali adznačyŭsia Kievin de Brejne. Tak źnianacku «Reał» u paŭfinałach Lihi čempijonaŭ nikoli nie prapuskaŭ, chacia vystupaje na hetaj stadyi ledź nie cełuju viečnaść.
Kievin de Brejne ŭ pieršym tajmie adznačyŭsia hołam i vynikovym pasam. Fota: Uefa.com
Praź dzieviać chvilin dla Madryda situacyja pahoršyłasia: Habryeł Žezus nanoŭ uzradavaŭ fanaŭ «Sici», bo aformiŭ samy chutki duplet u bramu «błankas» za usiu historyju ich udziełu ŭ top-turniry.
Ale kamanda Karła Ančałoci zachavała samakantrol — i praz čverć hadziny skaraciła adryŭ.
Na dapamohu «Reału» rušyŭ Karym Bienziema, jaki pravioŭ 40-y miač u siezonie. Z časoŭ, kali kłub pakinuŭ Kryšcijanu Ranałdu, nichto ŭ Madrydzie tak plonna ŭ nastupie nie dziejničaŭ.
Da taho ž vieteran vybraŭsia na lidarskuju pazicyju ŭ śpisie bambardziraŭ ŁČ: Bienziema moh pachvalicca 13-ju trapnymi strełami — naroŭni z Robiertam Levandoŭskim dy Artura Kabrałam.
Upieršyniu z momantu sychodu Kryšcijanu Ranałdu z «Reała» hulec madrydskaha kłuba zabivaje 40+ hałoŭ za siezon. Fota: Uefa.com
Vialiki pierapynak nie astudziŭ emocyj supiernikaŭ. Na miač Fiła Fodena ŭ debiucie druhoha tajma amal imhnienna adkazaŭ vunderkind «Reała» Vinisius. I, jak padajecca, futbalisty, što majuć pa 21 hodu ad naradžeńnia, svaim moładzievym drajvam natchnili bolš vopytnych partnioraŭ na podźvihi.
Z boku «Mančestera» jaho ździejśniŭ Biernardu Siłva, a za «Reał» nanoŭ zastupiŭsia Bienziema. Francuz vykanaŭ pienalci ŭdaram «panienkaj» (pa centry bramy, z vyklikam dla hałkipiera) dy pravioŭ 14 miač za siezon ŁČ.
Heta paŭtareńnie absalutnaha rekordu Lijaniela Miesi ŭsich časoŭ!
Naprykancy sustrečy baki abmianialisia jašče šeraham niebiaśpiečnych momantaŭ, ale vyrašyli pakinuć kolki hałoŭ i na matč u adkaz. Jon adbudziecca na madrydskim «Sanćjaha Biernabeŭ» 4 traŭnia. Cikava, što siem trapnych strełaŭ paŭtaryli rekord vynikovaści paŭfinałaŭ turniru.
Nahadajem, što ŭ finale Lihi čempijonaŭ pieramožca pary «Man Sici» — «Reał» zhulaje z najmacniejšym u tandemie «Livierpul» — «Viljareał».
