Zhodna z materyjałami spravy, baćki piacimiesiačnaha chłopčyka i jaho babula z sužycielem u noč na 8 lutaha 2019 hoda vypivali ŭ kampanii dvuch znajomych. Nočču dzicia stała płakać i 48-hadovy sužyciel babuli pasprabavaŭ jaho supakoić.
Budučy pjanym, jon padkinuŭ piacimiesiačnaje dzicia, nie zmoh jaho ŭtrymać i vypuściŭ, chłopčyk udaryŭsia hałavoj ab ćviordy pradmiet. Paśla hetaha mužčyna vyrašyŭ akazać jamu pieršuju dapamohu. Jon pasprabavaŭ zrabić jamu niepramy masaž serca, jaki vyliŭsia ŭ ciažkija cialesnyja paškodžańni, jakija stali adnoj z pryčyn hibieli małoha.
Pa vynikach ekśpiertyzy, dzicia pamierła ad spałučanaj traŭmy hałavy i cieła, jakaja ŭskładniłasia raźvićciom traŭmatyčnaha šoku.
Sprabujučy schavać ślady, mužčyna zaciahnuŭ na šyi dziciaci svoj remień, abmyŭ jaho ŭ vannaj, a paśla vykinuŭ cieła z akna kuchni na 11-m paviersie.
Mužčynu pryznali vinavatym u pryčynieńni śmierci pa nieaściarožnaści (č. 1 art. 144). Sud vynies prysud — try hady papraŭčaj kałonii ahulnaha režymu.
Prysud nie ŭstupiŭ u zakonnuju siłu i moža być abskardžany i apratestavany va ŭstanoŭlenym zakanadaŭstvam paradku.
Trahiedyja adbyłasia 8 lutaha 2019 hoda na praśpiekcie Rakasoŭskaha ŭ Minsku. Vidavočcy ŭbačyli kala šmatpaviarchovika cieła piacimiesiačnaha chłopčyka. Śledčyja ŭstanavili, što śmierć małoha nosić kryminalny charaktar. Na ciele dziciaci mielisia šmatlikija cialesnyja paškodžańni, a vakoł šyi była piatla ŭ vyhladzie ramnia.
Kali padazravanaha ŭsio ž znajšli, mužčyna padčas dopytu raspavioŭ, što spałochaŭsia adkaznaści. Vinu ŭ ździajśnieńni złačynstva jon pryznaŭ, choć i na pieršapačatkovym etapie chavaŭ svajo dačynieńnie.