Fota ilustracyjnaje
U noč na 4 červienia źjaviłasia infarmacyja, što aŭtobus ź vizavymi turystami nie moža viarnucca z Rasii ŭ Biełaruś, bo pamiežniki patrabujuć u turystaŭ aryhinały pašpartoŭ, jakija znachodziacca ŭ konsulstvie.
Kali Centr vizavych pasłuh viza5.by pačaŭ vazić klijentaŭ u Maskvu, u FSB Rasii kampanii patłumačyli, što ich supracoŭniki na miažy buduć prapuskać ludziej, situacyju razumiejuć.
Pry hetym Centr vizavych pasłuh prasiŭ svaich klijentaŭ zrabić nataryjalna zaśviedčanuju kopiju pašparta, jakuju varta ŭziać u pajezdku.
«Ale ŭčora ŭźnikła situacyja, kali chłopcy z pamiežnaj słužby byli kateharyčnyja i skazali: «Nie, nie prapuścim». Ludzi, jakija supravadžali hrupu, tłumačyli situacyju, ale pamiežniki byli niepachisnyja», — paviedamiŭ błohu «Otražienije» kiraŭnik Centra vizavych pasłuh viza5.by Arciom Žadan.
Aŭtobus jeździŭ na roznyja pamiežnyja pierachody, ale prajści ich nie atrymlivałasia. U vyniku situacyju ŭdałosia vyrašyć, ale kiraŭnik firmy nie ŭdakładniaje, jak mienavita. Pavodle jaho słoŭ, centr «zadziejničaŭ raznastajnyja kanały».
Jon admaŭlaje, što častka ludziej, pavodle čutak, prajšli miažu samastojna z ID-kartami i što ŭ klijentaŭ niama damovaŭ z turfirmaj:
«Heta paklop. Nielha stać našym klijentam nie zaklučyŭšy z nami dahavor afierty. Moža nie čytali jaho prosta, ale heta vašy prablemy».
Ciapier firma pierastanie vazić ludziej u Maskvu pa vizy da stabilizacyi situacyi. Chutčej za ŭsio, u pamiežnuju słužbu FSB Rasii dla pieramovaŭ adpraviać supracoŭnika kampanii, kab dabicca aficyjnaha dazvołu na pierasiačeńnie miažy.
