Fota: tibo.by.
U pačatku 2000-ch TIBO była cikavaja ŭsim, chto choć trochi cikaviŭsia technałahičnymi navinkami. I tady na vystavie možna było sapraŭdy pahladzieć i pamacać rukami inavacyi taho času (jakija siońnia nam zdajucca banalnymi rečami). Naprykład, vyjści z mabilnaha telefona ŭ internet, adpravić multymiedyjnyja MMS-ki, pasłuchać muzyku ź pieršych partatyŭnych MP-3 płejeraŭ.
Usie apošnija hady vystava mała čym ździŭlała svaich haściej i nie pakazvała čahości praryŭnoha, a sioleta TIBO pieratvaryłasia ŭ zusim dziŭnaje vidovišča, asnoŭnymi ŭdzielnikami jakoha stali nie hihanty telekamunikacyjnaj haliny, a dziaržaŭnyja struktury, časam dalokija ad śfiery.
Ale ciapier vystava moža pakazać mała cikavych navinak, prynamsi, dla zvyčajnaha karystalnika. Značnuju častku płoščaŭ u vystavačnym kompleksie na praśpiekcie Pieramožcaŭ, 111a addali roznym dziaržaŭnym viedamstvam, a taksama adukacyjnym ustanovam, pryčym nie tolki vyšejšym, ale i zvyčajnym himnazijam i škołam.
Bujnych mižnarodnych viendaraŭ (Samsung, Huawei, ZTE, HP, Panasonic i inšyja), jakija zvyčajna ŭdzielničali ŭ mierapryjemstvie, niama. Zatoje na vystavie było šmat čynoŭnikaŭ u šerych kaściumach z roznych viedamstvaŭ i arhanizacyj, a taksama sahnanych studentaŭ i školnikaŭ. Forum staŭ jašče bolš panyłym, asabliva na fonie zamiežnych anałahaŭ.
Vysokija technałohii, źviazanyja ź vialikimi i ryzykoŭnymi inviestycyjami, abychodziać Biełaruś, a ekspanaty dziaržaŭnych kampanij zahnanyja ŭ vystavačnyja paviljony z-pad pałki profilnaha viedamstva. Nieźličonyja dziaržaŭnyja i napaŭdziaržaŭnyja kampanii, kamitety, instytuty — ničoha, što mahło b cikavić u 2022 hodzie narmalnaha čałavieka sa śfiery.
Ź vialikich kampanii na vystavie prysutničali tolki telekamunikacyjnyja hihanty kštałtu A1, MTS i Biełtelekam.
I, užo pa tradycyi, paŭsiul stendy z łozunhami kštałtu «Biełaruś — ličbavaja kraina». Ličbavaja kraina, jakaja ŭ pytańniach ličbavizacyi biurakratyi i dziaržaŭnych pasłuh katastrafična adstaje ad usich susiedziaŭ (u tym liku Rasii i Ukrainy).
Hod za hodam forum stanaviŭsia tolki biadniejšym. Zdavałasia b — kudy bolš?
U 2019 hodzie, kali vystava była ŭžo małacikavaj, u joj udzielničali chacia b kampanii kštałtu Bel Huawei Technologies LLC ci EPSON, to ŭ 2022 niama i ich. Zatoje zaraz stała našmat bolš ustanoŭ adukacyi. Kali raniej udzielničali pieravažna techničnyja VNU, to ciapier jość navat siarednija škoły i himnazii ź Minska i Viciebska. Nu i tradycyjna, šmatlikija dziaržaŭnyja pradpryjemstvy, nakštałt «Biełbłankavyd».
Śfiera vysokich technałohij i telekamunikacyj pieražyvaje składanyja časy, asabliva paśla padziej 2020 hoda, kali mnohija ajcišniki padtrymali ruch suprać dyktatury. IT-supolnaść aktyŭna achviaravała hrošy paciarpiełym ad represij, biełaruskija prahramisty vychodzili mitynhavać u rajonie Parku vysokich technałohij, a sami biełaruskija ŭłady pačali pierahladać svajo staŭleńnie da industryi, bo bačać u joj kłasava varožy elemient. Masavyja represii i ekanamičnyja sankcyi suprać łukašenkaŭskaha režymu nie spryjajuć inviestycyjam, mižnarodnamu supracoŭnictvu i raźvićciu vysokich technałohij. U vyniku mnohija kampanii, jakija pracavali ŭ Biełarusi, pačali masavy rełakiejt śpiecyjalistaŭ. Kali takoje adbyvajecca navat z aŭtorsinhavymi kampanijami, to što možna kazać pra vysokatechnałahičnyja inavacyjnyja praduktovyja kampanii?
Vystava TIBO karysnaja tym, što jana — cudoŭny indykatar stanu haliny i ŭsioj biełaruskaj ekanomiki.
