Uładzimir Pucin (źleva) i Siarhiej Sabianin, jaki pracavaŭ kiraŭnikom Administracyi prezidenta Rasii, a ciapier mer Maskvy. Fota: Kommiersant' \ Dźmitryj Azaraŭ
«Naviny pra ciažkija chvaroby ŭ postsavieckich kiraŭnikoŭ źjaŭlajucca apošnija hadoŭ dziesiać»
Biełaruski palitołah, dyrektar daśledčaha centra EAST Andrej Jelisiejeŭ ličyć, što źmiena palityčnaha režymu ŭ Rasii nie abaviazkova pryviadzie da spynieńnia vajny. Na jaho dumku, navat mahčymaje paražeńnie ŭ vajnie suprać Ukrainy nie harantuje demakratyčnaha tranzitu ŭłady ŭ Rasii.
Andrej Jelisiejeŭ. Fota: baj.by
«Takaja mahčymaść uźnikaje, kali kirujučy režym budzie zusim asłableny i ŭ im budzie isnavać umoŭnaje pamiarkoŭnaje kryło, a demakratyčnaja apazicyja budzie mieć davoli mocnyja pazicyi. Pakul hetaha nie nazirajecca. Pamiarkoŭnyja ličać za lepšaje maŭčać, a apazicyju paśladoŭna ačarniajuć i marhinalizujuć. Ale sacyjalna-palityčnaja situacyja ŭ Rasii, imavierna, moža značna źmianicca ŭ ahladnaj budučyni, tamu mahčymyja ŭsiakija scenaryi», — ličyć palitołah.
Jelisiejeŭ taksama zaŭvažaje, što nie varta nadavać šmat uvahi temie zdaroŭja Pucina.
Siensacyjnyja naviny pra ciažkija chvaroby ŭ postsavieckich kiraŭnikoŭ pieryjadyčna źjaŭlajucca ŭ infarmacyjnaj prastory apošnija hadoŭ dziesiać.
«Nie varta niedaaceńvać dasiahnieńni suśvietnaj miedycyny, da jakoj kiraŭniki dziaržaŭ majuć dostup», — kaža Andrej Jelisiejeŭ.
Palitołah ličyć, što pry razhladzie kandydatury mahčymaha pierajemnika hałoŭnym faktaram, jaki budzie ŭpłyvać na situacyju, maje značeńnie nie proźvišča čałavieka, a jaho prynaležnaść da siłavoha łahiera, jak Viktar Zołataŭ (kamandujučy vojskami Rashvardyi, anałah našych Unutranych vojskaŭ), ci da «cyvilnych», jak Viačasłaŭ Vałodzin (staršynia Dziarždumy).
Što tyčycca zapytu na demakrytyzacyju Rasii z boku nasielnictva, to, na dumku Jelisiejeva, sacyjałahičnaja karcina ŭ RF vielmi adroźnivajecca ad biełaruskaj.
«U Biełarusi zapyt na pieramieny i demakratyzacyju daminuje ŭ hramadstvie i źjaŭlajecca našmat bolšym, čym u RF. Ale heta nie aznačaje, što zapytu na inšy ŭnutrypalityčny i zamiežnapalityčny kurs siarod žycharoŭ Rasii niama.
Jak śviedčać navukovyja daśledavańni, niedaaceńvajecca častaje śviadomaje ŭtojvańnie i pierajnačvańnie respandentami svaich krytyčnych dumak pra aficyjny ład. Da taho ž, sacyjalna-palityčnyja padziei sa spaźnieńniem adbivajucca na hramadskaj dumcy, asabliva va ŭmovach zadušeńnia dostupu da niezaležnych ŚMI i prapahandysckaha biezzakońnia. Tamu ŭžo ŭvosień staŭleńnie da biahučaha ŭładnaha kursu ŭ Rasii moža być, hruba kažučy, 50/50, a nie 80/20, jak heta davodzić aficyjnaja sacyjałohija», — miarkuje ekśpiert.
Kali razvažać pra žyćciazdolnaść režymu Łukašenki, to jaho pazicyi mohuć pachisnucca i biezadnosna varyjantu palityčnaha tranzitu ŭ Rasii. Dastatkova budzie Maskvie prypynić ci značna źmienšyć palityčnuju i finansavuju padtrymku Łukašenki. U takim vypadku jaho kiravańnie aŭtamatyčna ŭstupaje ŭ finalnuju (vierahodna, vielmi karotkuju, ale naŭrad ci biaskroŭnuju) stadyju, adznačaje Jelisiejeŭ.
Padtrymka Kramla — heta adzin z troch słupoŭ kiravańnia Łukašenki, razam z kantrolem nad miascovym siłavym aparatam i centralizavanaj viertykallu ŭłady, kaža Jelisiejeŭ.
Inšym čyńnikam, jaki, na dumku palitołaha, moža paŭpłyvać na pazicyi Łukašenki, źjaŭlajucca intehracyjnyja prajekty, jakija byli padpisanyja ŭ listapadzie 2021 hoda.
Skrynšot ź videa
«Da kanca 2023 hoda biełaruskija pravavyja normy ŭ najvažniejšych śfierach musiać być pryviedzienyja da rasijskich. Na praktycy heta stvoryć pieradaneksijnuju situacyju, jakaja patencyjna asłabić palityčnaje stanovišča Łukašenki, nie havoračy ŭžo pra pahrozu biełaruskaj dziaržaŭnaści», — kaža Andrej Jelisiejeŭ.
«Źmiena Pucina pa inicyjatyvie źnizu — vielmi małavierahodnaja»
Rasijski palityčny ahladalnik Maksim Trudalubaŭ miarkuje, što źmiena čałavieka, jaki staić na čale Rasii, sapraŭdy moža dapamahčy spynić vajnu. Zrešty, na chutkija pieramieny ŭ Kramli nadziej ciapier mała.
Maksim Trudalubaŭ, ahladalnik haziet «Viedomosti» i NYT. Fota: skrynšot «Tok»
Źmienu Pucina pa inicyjatyvie źnizu Trudalubaŭ ličyć vielmi małaimaviernaj, pakolki ciapierašnija rasijskija ŭłady luby niesankcyjanavany hramadski ruch ŭsprymajuć jak revalucyjny i dziejničajuć adpaviednym čynam. Krytyčnaj masy ludziej, hatovych da niebiaśpiečnych dla siabie kalektyŭnych dziejańniaŭ, u Rasii ciapier niama.
Razvažajučy pra toje, ci jość surjozny zapyt na źmienu ŭłady siarod nasielnictva, havaryć pra dakładnyja ličby ŭ biahučaj situacyi ekśpiert ličyć amal niemahčymym.
«Spadziavacca na danyja aficyjnych apytańniaŭ my dakładna nie možam pa całkam vidavočnych pryčynach. Ale ŭ toj ža čas zaŭvažna, što ŭ hetaj vajny niama stolkich prychilnikaŭ, jak heta było z anieksijaj Kryma. Hetaja vajna značna mienš papularnaja, mahčyma, što jaje prychilniki i praciŭniki dzielacca ŭ praporcyi 50/50. A dla taho, kab daviedacca, što sapraŭdy dumajuć rasijanie, to im spačatku na hod treba adklučyć prapahandu, a potym užo pytacca pra ich mierkavańnie», — ličyć ekśpiert.
Źmiena lidara ŭ vyniku pałacavaha pieravarotu bolš vierahodnaja, ale i z hetym jość prablemy. Na dumku Trudalubava, u častki tak zvanaj rasijskaj elity jość zapyt na źmienu Pucina. Ale zrabić heta ŭ piersanalisckaj aŭtarytarnaj sistemie, jakaja pierajšła ŭ dyktatarskuju, vielmi składana.
«Hetaja sistema vybudoŭvałasia vakoł adnoj fihury, pryčym tak, kab źmiena lidara była praktyčna niemahčymaj. I tut navat nie hetak važna, kolki ŭ jaho ŭłady. Važniej, što ŭsie astatnija raźličvajuć na jaho. Taki lidar zabiaśpiečvaje elitu materyjalna, daje im abaronu ad pieraśledu, što niemałavažna, kali jany ŭ dadatak da ŭsiaho stali ciapier jašče i patencyjnymi vajennymi złačyncami.
Heta svojeasablivaja kruhavaja paruka. U vyniku my majem situacyju, kali, z adnaho boku, jany mohuć chacieć źmieny ŭłady, a z druhoha — tak paviazanyja z Pucinym, što isnavańnie hetaha režymu stanovicca dla ich žyćciova nieabchodnym», — zaŭvažaje ekśpiert.
Trudalubaŭ adznačaje, što niezadavolenyja palitykaj Pucina dzielacca na dva asnoŭnyja łahiery:
«Kali brać niezadavolenych siłavikoŭ, to jany majuć pytańni da tempaŭ vajny, taho, jak jana viadziecca. U ich razumieńni treba być bolš rašučymi, iści na Kijeŭ.
Inšy błok niezadavolenych — heta tyja, chto vystupaje za mirnaje raźvićcio vajennaha kanfliktu.
Heta dźvie asnoŭnyja «partyi» siarod elit, choć kožnaja ŭ svaju čarhu składajecca z mnostva inšych hrup. Ja nie ŭpeŭnieny, što jany mohuć chutka pryjści da kansensusu i znajści kandydata, jaki zadavolić usie baki. Akramia taho, u elit niama placoŭki dla dyjałohu i niama davieru adno da adnaho, tak što sustrecca i pahavaryć na samuju važnuju dla krainy temu jany prosta nie mohuć».
Maksim Trudalubaŭ vyłučaje pa niekalki pierson, jakija mahli b pryjści na źmienu dziejnamu prezidentu.
«Z «partyi miru» — heta mohuć być Siarhiej Sabianin i Michaił Mišuścin, da jakoha ŭ vypadku čaho i pavinna pierajści ŭłada, kali prezident pakidaje pasadu raniej za termin. Mišuścin vielmi aściarožna vykazvajecca z nahody vajny.
Heta tyja ludzi, jakich suśvietnaja supolnaść mahła b pryniać u jakaści časovych fihur, ź jakimi možna vieści razmovy pra mir.
Z boku siłavikoŭ, abo tak zvanaj «partyi vajny», heta moža być Mikałaj Patrušaŭ, Dźmitryj Rahozin i navat Dźmitryj Miadźviedzieŭ, jaki apošnim časam aktyŭna vykazvaje svaju radykalnuju pazicyju.
U adroźnieńnie ad mahčymych kandydataŭ ad «partyi miru», hetnyja piersanažy ličać, što zaniać hodnaje miesca ŭ śviecie Rasija moža tolki vajennym šlacham», — adznačaje ahladalnik.
Dźmitryj Miadźviedzieŭ. Fota: Skrynšot ź videa
Pazicyi partyi vajny pakul mocnyja, tamu imaviernaść zaklučeńnia pieramirja i tym bolš mirnaha dahavora ŭ najbližejšy čas nievialikaja.
«Ciapier ukrainskaje hramadstva kansalidavanaje i nie hatovaje sastupać, pakolki jano maje nastroj na pieramohu. Tamu na hetym etapie Zialenski nie moža pajści na pieramovy i pahadzicca na sastupki, bo hramadstva hetaha nie prymie, choć u hetym i jość peŭny sens. Vajna viadziecca na terytoryi Ukrainy, i ŭ pieršuju čarhu ad vajennych dziejańniaŭ ciarpić jaje nasielnictva i infrastruktura.
Ukraincy spraviadliva chočuć viarnuć usie svaje terytoryi i pakul nie hatovyja mirycca ź ich adrymańniem. Ale strata zachoplenaha dla Pucina śmierci padobnaja.
Fota: AR
Heta značyć, što, z adnaho boku, jość ukraincy, nie hatovyja iści na sastupki, jakija patrebnyja dla pieramovaŭ, a z druhoha — tyja krainy, ad jakich zaležać harantyi biaśpieki. Lidary hetych krain marać pra toje, kab vajna skončyłasia, ale nie stanuć siadać z Pucinym za stoł pieramovaŭ. Tamu Rasii patrebny inšy lidar», — padsumoŭvaje ahladalnik.