Pradstaŭniki Departamienta skazali Delfi, što patok mašyn u Biełaruś ź Litvy vyras u 5 razoŭ, kali Biełaruś uviała biaźviz dla hramadzian ES. Žychary jeździać u Biełaruś pa tannyja paliva i cyharety.
«My pytajemsia ŭ žycharoŭ, ź jakoj metaj jany jeździli ŭ susiedniuju krainu, jany zvyčajna nam tak adkazvajuć.
U redkich vypadkach naviedvajuć svajakoŭ, zvyčajna jeduć pa pakupki, paliva i cyharety», — skazała pradstaŭnica mytni.
Na minułym tydni ŭ aŭtorak na pamiežnym pierachodzie ŭ Łavaryškach pravieryli 638 aŭtamabilaŭ, što zajazdžali ź Biełarusi, u krasaviku za dzień ich było 136. Pavodle źviestak na 6 hadzin 13 červienia, u Šalčyninkai za sutki miažu pierasiakajuć 475 lehkavikoŭ ź Biełarusi.
Pradstaŭniki mytni kažuć, što zvyčajna tyja, chto zajazdžaje, zavoziać standartny «košyk biełaruskich tavaraŭ». «Heta pradukty, cyharety i inšaje, a taksama paliva», — zaŭvažyli pradstaŭniki mytni. Akramia taho, jany adznačajuć, što na miažy pavialičylisia čerhi hruzavikoŭ.
Ekanamist banka Luminor Žyhimantas Maŭrycas zapeŭniŭ, što hetaja tendencyja nazirajecca nie pieršy hod.
«Kuryva — asobnaja tema. Ni dla kaho nie tajamnica, što Biełaruś ekspartuje bolšuju častku svaich cyharet, ale ŭ statystycy ekspartu ich niama, pakolki heta kantrabandny tavar. Možna skazać, što heta zbroja ekanamičnaj vajny, ź jakoj Litva nie spraŭlajecca. Kamień u naš aharod. Heta maštabnaja pieravozka kantrabandy. Viazuć vahonami, hruzavikami i h. d.
Ciapier kantrabandnych cyharet zatrymlivajuć bolš, čym 5 hadoŭ tamu, z hetaj pryčyny Litva pazbaŭlajecca vialikaj kolkaści hrošaj, a Biełaruś, ubačyŭšy, što ciahnikoŭ stała mienš, abviaściła akcyju — pryjazdžajcie sami pa cyharety. Ja dumaju, niaprostaja situacyja i z palivam, tut taksama treba bolš uvahi», — skazaŭ jon, zaŭvažyŭšy, što heta ŭjaŭlaje pahrozu ekanomicy Litvy.
«Viadoma, my pavinny być śviadomymi, sami nie jeździć, a z druhoha boku, možna pryniać niejkija miery, kab nie jeździli.
Pazicyja Biełarusi zrazumiełaja, bo, kali valuty nie chapaje, chočacca źmiakčyć upłyŭ sankcyj. Kali ludzi pryjazdžajuć i kuplajuć, kraina atrymlivaje valutu, upłyŭ sankcyj pamianšajecca, za valutu Biełaruś moža niešta kuplać u inšych krainach, uklučajučy zbroju», — skazaŭ ekanamist.
«U apošni čas mnohija tyckajuć palcami ŭ Hiermaniju, jakaja kuplaje ŭ Rasii haz, ale i my nie śviatyja», — zaŭvažyŭ Maŭrycas.
Ekanamist Alaksandr Izharodzin skazaŭ, što takija pajezdki — adnarazovaja źjava, a nie masavaja. Pavodle jaho słoŭ, u krasaviku fiksavali dvuchznačny rost roźničnaha handlu, heta značyć, što žychary Litvy achvotna vydatkoŭvajuć hrošy.
«Mnie zdajecca, bolšaja častka žycharoŭ niadrenna spraŭlajecca z rostam inflacyi. Viadoma, jość i tyja, chto šukaje alternatyvu, ale ich mienšaść», — miarkuje jon. Izharodzin dadaŭ, što ludzi jeduć u Biełaruś i bačać, što dla pajezdki patrebnyja čas i inšyja resursy.
«Mahčyma, heta bolš tyčycca žycharoŭ pamiežnych rajonaŭ, ale nie tych, chto žyvie ŭ centry krainy», — skazaŭ Izharodzin.
«Ciapier biudžet Rasii zaležyć ad prodažaŭ nafty i hazu, tamu naš układ nievialiki, ale ŭ lubym vypadku žychary pierad pajezdkaj pavinny padumać, što jany patencyjna ŭmacoŭvajuć Biełaruś, jaje biudžet, ustojlivaść da akcyj», — praciahnuŭ jon.
