«Vy viedajecie, my nie ŭryvalisia va Ukrainu. My abviaścili śpiecyjalnuju vajskovuju apieracyju, kali ŭ nas užo nie zastałosia nijakaha sposabu rastłumačyć Zachadu, što jon zajmajecca złačynnaj dziejnaściu, uciahvajučy Ukrainu ŭ NATO», — zajaviŭ Łaŭroŭ.
Raniej z padobnaj rytorykaj nie raz vystupaŭ rasijski prezident Uładzimir Pucin, tłumačačy svajo rašeńnie pačać 24 lutaha ŭzbrojenaje ŭvarvańnie va Ukrainu. U pryvatnaści, hetaj temie jon pryśviaciŭ asnoŭnuju častku svajoj pramovy na Paradzie Pieramohi 9 maja na Krasnaj płoščy.
Taksama Łaŭroŭ, siarod inšaha, adkazaŭ na pytańnie ab pałonnych brytancach, asudžanych na śmierć u samaabvieščanaj DNR.
9 červienia sud u samaabvieščanaj «DNR» prysudziŭ da śmiarotnaha pakarańnia brytancaŭ Šona Piniera i Ejdena Aślina, a taksama hramadzianina Maroka Saaduna Brahima (usie jany majuć padvojnaje hramadzianstva, i Ukrainy, i svaich krain pachodžańnia), pryznaŭšy ich vinavatymi ŭ najomnictvie, sprobie hvałtoŭnaha zachopu ŭłady, a taksama ŭ prachodžańni navučańnia ŭ metach ažyćciaŭleńnia terarystyčnaj dziejnaści. Usie troje — vajskoŭcy Uzbrojenych cił Ukrainy, jakija padpisali kantrakty jašče da pačatku rasijskaha ŭvarvańnia.
«U vačach Zachadu Rasija niasie adkaznaść za los hetych ludziej. Vy nie ličycie, što…» — pačaŭ zadavać pytańnie žurnalist Bi-bi-si.
«Nie, — nie čakajučy kanca pytańnia adkazaŭ ministr zamiežnych spraŭ Rasiei. — Słuchajcie, mianie vočy Zachadu nie cikaviać naohuł. Mianie cikavić tolki mižnarodnaje prava. Pa mižnarodnym pravie najmity nie źjaŭlajucca kambatantami. Što ŭ vas u vačach, ščyra kažučy, nie maje značeńnia».
«Jany nie najmity. Jany słužyli va ŭkrainskich uzbrojenych siłach» — — paryravaŭ Rozienbierh.
«Heta pavinien vyznačyć sud», — skazaŭ Łaŭroŭ.
Na pytańnie, ci ličyć jon sud u DNR niezaležnym, jon adkazaŭ: «Ja pierakanany, što tam niezaležny sud. A vy ličycie, u vas [u Vialikabrytanii] niezaležny sud?»
Adkazvajučy na pytańnie ab uzajemaadnosinach Rasii i Brytanii, Łaŭroŭ zajaviŭ, što «pa-mojmu, tam užo niama nijakaha pola dla manieŭru ŭ hetych adnosinach». «Tamu što i [premjer-ministr Borys] Džonsan, i [ministr zamiežnych spraŭ Liz] Tras zajaŭlajuć publična: my pavinny pieramahčy Rasiju, my pavinny pastavić Rasiju na kaleni. Nu davajcie, staŭcie!» — dadaŭ jon.
