«Bryhada Tadevuša Kaściuški» vyklikała šmat pytańniaŭ adrazu paśla źjaŭleńnia. Aŭdytoryja ich kanała składałasia z botaŭ, va Ukrainie nichto pra ich nie viedaŭ. Pry sprobie źviazacca čałaviek atrymlivaŭ ad «bryhady» vielmi dziŭnyja daručeńni.
Čytajcie: Ludzi pasprabavali zapisacca ŭ «bryhadu Kaściuški». I voś što atrymałasia
Praź niekalki miesiacaŭ ad «bryhady» źviestak niama. Druhi — i jon ža apošni — post u ich kanale źjaviŭsia 8 krasavika.
My pasprabavali źviazacca ź imi praz bot. Raniej «kaściuškaŭcy» adkazvali ŭ pracoŭny čas (paśla šaści viečara kamunikacyja, jak praviła, spyniałasia). Ale prajšoŭ amal tydzień — nichto tak i nie adhuknuŭsia.
Chto tyja «vajary»? Dzie jany siońnia? Moža, na samaj spravie «kaściuškaŭcy» ŭžo dałučylisia da bajavych dziejańniaŭ?
«Tut niama što kamientavać, zvyčajnaja kdbšna-hubazaŭskaja pravakacyja», — padzialiŭsia mierkavańniem Siarhiej Biaspałaŭ, bajec pałka Kalinoŭskaha.
Naturalna, što nijakich źviestak pra «bryhadu Kaściuški» jon z paplečnikami nie čuŭ i ličyć heta niaŭdałaj sprobaj pravakacyi z boku biełaruskich siłavikoŭ.
«Dyk jany jašče i ŭ biełaruskich kamuflažach [byli na videa], ni ŭ kaho niama ŭkrainskaha piksiela ci mulciteka. Vielmi nierazumnaja pravakacyja atrymałasia, čaho jany čakali? Niezrazumieła», — dadaŭ Biaspałaŭ.
Pradstaŭnik «Bajpoła» Alaksandr Azaraŭ taksama prytrymlivajecca viersii, što heta praca KDB.
U internecie źniadkul źjaviłasia «Bryhada Kaściuški». Aściarožna, heta moža być pravakacyja
