Fota: kremlin.ru
«Iźviestija»: Rehularnaść sustreč uražvaje
Rasijskaje vydańnie piša, što jašče da vybaraŭ 2020 hoda Łukašenka sprabavaŭ «usiedzieć na dvuch kresłach». Ciapier situacyja kardynalna źmianiłasia: Łukašenka demanstruje svaju prychilnaść da vybudoŭvańnia ščylnych adnosin z Rasijaj. Pry hetym Biełaruś, pa sutnaści, akazałasia adzinaj krainaj na postsavieckaj prastory, jakaja adkryta padtrymlivaje Maskvu paśla raźviazanaj joj ahresiŭnaj vajny suprać Ukrainy.
«Rehularnaść sustreč pamiž Uładzimiram Pucinym i Alaksandram Łukašenkam sioleta sapraŭdy ŭražvaje», — piša vydańnie. Pry hetym miedyja adznačaje, što znosiny palitykaŭ adbyvajucca vyklučna na terytoryi Rasii. Dla Łukašenki heta była ŭžo šostaja sustreča za apošni hod.
Kamientujučy słovy Pucina pra toje, što Rasija budzie pieradavać Biełarusi «Iskandery» ŭ jadziernym vykanańni, ekśpiert vydańnia Viktar Litoŭkin adznačaje, što biahučaje stanovišča pakul navat nie varta paraŭnoŭvać z Karybskim kryzisam 1962 hoda.
«Tady sprava dachodziła da patencyjnaha pramoha abmienu rakietna-jadziernymi ŭdarami. Pakul takoha napružańnia pamiž Maskvoj i Vašynhtonam, pamiž Rasijaj i NATA nie isnuje», — adznačyŭ jon.
«Moskovskij komsomolec»: Rasija zrobić dakładna toje samaje, što zrabili ZŠA ŭ Jeŭropie
Jak skazaŭ vydańniu ekśpiert u halinie stratehičnych uzbrajeńniaŭ, pastaŭki Biełarusi «Iskanderaŭ» i pieraabstalavańnie samalotaŭ biełaruskich VPS pad jadziernyja nośbity Rasija moža arhanizavać tak, što nie parušyć nijakich mižnarodnych damoŭlenaściaŭ.
Ekśpiert ličyć, što rakietnyja kompleksy «Iskander» ź jadziernymi bojezaradami pastaŭlać niepasredna biełaruskaj armii Rasija nie budzie — hetaha rabić pakul nie patrabujecca.
«Kali my pastavim Biełarusi svaje «Iskandery» ź jadziernym abstalavańniem, to heta stanie niepasrednym parušeńniem pałažeńniaŭ Damovy ab nieraspaŭsiudžvańni jadziernaj zbroi. Zvyčajna ŭ hetym vypadku ŭ jakaści kontrarhumientu možna čuć, što amierykancy, maŭlaŭ, zachoŭvajuć svaju jadziernuju zbroju ŭ piaci jeŭrapiejskich krainach na šaści avijabazach (u Italii jana jość na dźviuch bazach). To čamu my nie možam zrabić toje samaje? Ale tut varta ŭličvać adnu važnuju akaličnaść: hetyja bazy choć i znachodziacca, skažam, u Italii ci Hiermanii, ale jurydyčna heta amierykanskija bazy. Na takoj bazie znachodziacca amierykanskija vajskoŭcy, i tolki jany mohuć ekspłuatavać i vykarystoŭvać hetuju zbroju. I heta zusim roznyja rečy. Adna reč, kali zbroja niepasredna pieradajecca niejkaj krainie, i zusim inšaja, kali svaju zbroju jaje ŭładalnik ekspłuatuje na terytoryi inšaj krainy.
Bielhijskija, italjanskija, niderłandskija abo tureckija samaloty, viadoma, mohuć u krytyčny kryzisny momant vykarystoŭvać hetyja jadziernyja zarady. Adnak u mirny čas usie jadziernyja bomby znachodziacca pad kantrolem amierykancaŭ. Jany nikomu ich nie pieradajuć».
«Ja miarkuju, što i my nie budziem pieradavać takija bojezarady biełarusam, — kaža ekśpiert. — Dumaju, my damovimsia ab tym, kab mieć na terytoryi Biełarusi svaju ŭłasnuju bazu zachoŭvańnia jadziernych bojezaradaŭ. U hetym vypadku hetaje ŭzbrajeńnie buduć zachoŭvać na našych składach i jano budzie ekspłuatavacca rasijskimi vajskoŭcami. Toje samaje tyčycca i taktyčnych avijacyjnych bombaŭ. Dy i biełaruskija samaloty možna dapracavać pad nośbity, ale sami bomby buduć znachodzicca, achoŭvacca i absłuhoŭvacca na našych bazach, tady heta stanie simietryčnym adkazam na toje, što ŭ Jeŭropie robiać amierykancy. Taki varyjant ja całkam mahu dapuścić».
Lenta.ru: Chod realizacyi sajuznych prahram adpaviadaje zajaŭlenym płanam
U hutarcy z Lenta.ru palityčny kamientatar Alaksandr Kańkoŭ daŭ prahnoz Sajuznaj dziaržavie.
«Paniaćcie «Sajuznaja dziaržava» źviazana z rytorykaj, z pastajannym dekłaravańniem zadač, pryjarytetaŭ, važnaści i hetak dalej. Ale što tyčycca realnych miechanizmaŭ, to tut, na žal, składaŭsia peŭny deficyt zdolnaści prymać rašeńni i brać na siabie adkaznaść u abiedźviuch dziaržavach», — ličyć Kańkoŭ.
Fota: kremlin.ru
Za apošnija niekalki hadoŭ užo byli zapuščanyja sajuznyja prahramy, jakija raniej nazyvalisia darožnymi kartami, paviedamiŭ Kańkoŭ.
«Z zapuskam hetych prahram byŭ anansavany skačok u intehracyi Rasii i Biełarusi. Siońniašniaja dyskusija prezidentaŭ źjaŭlajecca śviedčańniem taho, što chod realizacyi sajuznych prahram adpaviadaje zajaŭlenym płanam», — zajaviŭ jon.
Pry hetym palityčny kamientatar adznačyŭ nierašučaść Łukašenki i dadaŭ, što takija jahonyja pavodziny mohuć paŭtarycca.
«Łukašenka ŭ raniejšyja hady nieadnarazova śviedčyŭ ab prychilnaści nieabchodnamu tempu intehracyi, ale zaŭsiody znachodzilisia niejkija momanty, jakija-niebudź detali, niejkija precedenty, jakija pieraškadžali bolš intensiŭnaj chadzie intehracyjnaha pracesu. Tamu ja b nie byŭ nastolki aptymistyčny», — skazaŭ Kańkoŭ.
«Kommiersant»: Łukašenka prosić zrabić chod jadrom
«Łukašenka rabiŭ uražańnie čałavieka, jakomu nie treba šmat dla ščaścia: leta, chvali, ułasny kvaziport i abyjakavaść majučaj adbycca sustrečy z Uładzimiram Pucinym. I ŭsio heta ŭ jaho ŭ hety dzień było, možna skazać, ź liškam», — u svajoj tradycyjnaj iraničnaj maniery piša žurnalist vydańnia Kaleśnikaŭ.
«Tut sustrelisia dva čałavieki, jakim, zdajecca, užo i nijakich słoŭ adzin adnamu pramaŭlać nie treba: zanadta dobra adzin viedaje, što moža skazać jamu inšy; dy i prosta što moža», — praciahvaje jon.
Nakont pytańnia raźmiaščeńnia ŭ Biełarusi samalotaŭ, zdolnych nieści jadziernyja zarady, žurnalist piša:
«Hety chod nie rabiŭ jašče pakul Biełaruś novaj jadziernaj dziaržavaj. Ale jon rabiŭ jaje dziaržavaj ź jadziernaj zbrojaj na terytoryi krainy. Kali Rasija jaje tudy pastavić. A potym nacelić. A jana moža. Niama kajdanoŭ, niama tarmazoŭ…»
Fota: kremlin.ru
«Jany dali zrazumieć, što tranzit praź Litvu budzie. Rakietny. Adkazali, tak skazać. A to ŭsio kazali: niama čym, niama čym…» — zaviaršaje Kaleśnikaŭ svoj tekst.
«Rośsija siehodnia»: Zdavałasia b, adna maleńkaja Litva pachulihaniła…
Vydańnie «Ukraina.ru» (jakoje naležyć chołdynhu «Rośsija siehodnia») kanstatuje: intehracyja Biełarusi ŭ jeŭrazijskija struktury stanovicca niezvarotnaj.
«Raniej, niahledziačy na ŭsie prośby Łukašenki, Rasija starałasia nie pravodzić dadatkovaj militaryzacyi biełaruskaha kirunku. Umacoŭvalisia tolki srodki SPA, abjadnanyja ŭ adzinuju sistemu. Adnak hetym razam rasijski prezident raptam zajaviŭ, što možna padumać nad madernizacyjaj biełaruskich samalotaŭ, a taksama paabiacaŭ raźmiaścić na biełaruskaj terytoryi kompleksy «Iskander», — piša vydańnie.
Zastałosia pakul što niezrazumiełym, pieradaść Rasija kompleksy Biełarusi ci raźmieścić na jaje terytoryi svaje rakiety, ale farmalna Pucin kazaŭ mienavita pra pieradaču.
«Madernizacyja biełaruskaj avijacyi, z adpaviednym navučańniem piłotaŭ, a taksama raźmiaščeńnie na biełaruskaj terytoryi kompleksaŭ «Iskander» daje Rasii mahčymaść u vypadku dalejšaha abvastreńnia mižnarodnaj abstanoŭki ŭ ličanyja dni dastavić da hetych nośbitaŭ jadziernyja zarady. U pryncypie, ich možna ŭpotajki zavieźci ŭ Biełaruś i raźmiaścić na adpaviednych składach zahadzia. Tady pieratvareńnie zvyčajnych rakiet u jadziernyja, a samalotaŭ — u nośbity jadziernaj zbroi, zojmie i zusim niekalki hadzin», — piša vydańnie.
«Zdavałasia b, adna maleńkaja Litva pachulihaniła, a śviet adrazu staŭ značna bližejšy da Armahiedona», — narakajuć rasijskija prapahandysty.
«Caŕhrad»: Možna zadumacca pra abjadnańnie Biełaruskaj vobłaści z Kalininhradam, uklučajučy tyja samyja «dziaržavy», jakija valajucca pamiž našymi terytoryjami
Rasijskaje čarnasociennaje šavinistyčnaje vydańnie «Caŕhrad» piša pra kantekst sustrečy Pucina i Łukašenki ŭ ahresiŭnaj, nacyjanalistyčnaj maniery.
«Vy nie pavierycie, ale, biez žartaŭ, Naŭsieda — heta proźvišča cełaha prezidenta, i nie čaho-niebudź tam, a prosta voś samaj sapraŭdnaj jeŭrapiejskaj dziaržavy. Prablema ŭ tym, što dziaržava hetaja z kolkaściu nasielnictva adnoj z akruhaŭ Maskvy pierakryła tranzit ruska-biełaruskich tavaraŭ da našaha Kalininhrada, jaki pa nieparazumieńni nie dałučyŭ da siabie ŭ svoj čas hetuju samuju dziaržavu ŭ jakaści pryharada. Zdajecca, Alaksandr Ryhoravič vyrašyŭ vypravić heta stanovišča», — pišuć čarnasociency.
«Naohuł, možna zadumacca pra abjadnańnie Biełaruskaj vobłaści z Kalininhradam, uklučajučy tyja samyja «dziaržavy», jakija valajucca pamiž našymi terytoryjami», — adznačaje kałumnist.
«Niešta padkazvaje, što samaje cikavaje ŭ Jeŭropie tolki pačynajecca. Kali staraja Jeŭropa kančatkova zahniecca, jak heta było ŭ Siaredniavieččy, biez ruskich enierhanośbitaŭ, kali stomicca mycca pad daždžavoj vadoj i tapić vuhalem i meblaj, kali spyniacca jeŭrapiejskija vytvorčaści, jakija jašče nie paśpieli pieravieści ŭ Kitaj, pačniecca kulminacyja baraćby dobraha z vydatnym i paŭstańnie «žoŭtych kamizelek» budzie zdavacca vystupam choru chłopčykaŭ-rukadzielnikaŭ», — maluje apakaliptyčnuju karcinu prapahandyst.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
