Razburany most miž Sievieradanieckam i Lisičanskam u Łuhanskaj vobłaści. Fota Ministerstva abarony Ukrainy
Raniej biełaruskija prapahandysty minimizavali vykarystańnie nazvaŭ «Łuhanskaja narodnaja respublika» i «Danieckaja narodnaja respublika». Da 2022 hoda Biełaruś farmalna była pieramoŭnaj placoŭkaj.
Ciapier ža situacyja absalutna inšaja. Chacia aficyjna biełaruskaja dziaržava nie pryznavała «niezaležnaści» hetych akupavanych Rasijaj ukrainskich terytoryj, prapahanda režymu Łukašenki zaniałasia retranślacyjaj rasijskaj vajennaj prapahandy. I ŭ karcinie śvietu hetaj prapahandy «DNR» i «ŁNR» źjaŭlajucca niezaležnymi dziaržavami. Pryčym nie ŭ miežach na 24 lutaha 2022 hoda, a ŭ administracyjnych miežach Danieckaj i Łuhanskaj abłaściej Ukrainy.
Akupacyju rasijanami haradoŭ i miastečak Łuhanskaj i Danieckaj abłaściej prapahanda režymu adnaznačna nazyvaje «vyzvaleńniem». U toj čas jak padkantrolnyja Ukrainie rajony Danieckaj vobłaści (na jakija pretenduje Rasija) biełaruskija prapahandysty pačali nazyvać «akupavanymi Ukrainaj».
«U 14 rajonach pakul padkantrolnaj Kijevu častki DNR Uładzimir Zialenski padpisaŭ ukaz ab stvareńni «vajennych administracyj» nasielenych punktaŭ», — paviedamlajuć biełaruskija prapahandysty, spasyłajučysia na RIA Novosti.
«Uzbrojenyja siły Ukrainy mohuć pasprabavać viarnuć pad kantrol terytoryi Łuhanskaj Narodnaj Respubliki paśla ŭziaćcia sajuznymi vojskami Lisičanska, adnak im nie dazvolać heta zrabić. Pra heta raspavioŭ kiraŭnik ŁNR Leanid Pasiečnik», — inšy prykład paviedamleńnia biełaruskaj prapahandy.
Prapahandysty nie pryznajuć zakonnych ukrainskich orhanaŭ ułady na terytoryi Danieckaj vobłaści Ukrainy. Danieckuju abłasnuju dziaržaŭnuju administracyju biełaruskaja prapahanda nazyvaje «tak zvanaj».
U zaniatyja rasijskimi vojskami rajony Ukrainy pryjazdžali delehacyi dziaržaŭnych prapahandystaŭ, siarod jakich byli Ryhor Azaronak, Aleh Hajdukievič i Alaksiej Tałaj.
