Absalutbank Vierabja trapiŭ pad amierykanskija sankcyi 9 žniŭnia 2021 hoda, roŭna praz hod paśla sfalsifikavanych vybaraŭ. Insajdary śćviardžajuć, što praz Absalutbank chadzili mutnyja hrošy, zaroblenyja na kantrabandzie i schiematozach. Siarod klijentaŭ byŭ i Viktar Miedźviadčuk.
Paśla ŭviadzieńnia sankcyj z banka vynieśli dźvie treci srodkaŭ, a sam jon pierastaŭ absłuhoŭvacca karespandujučymi bankami i nieŭzabavie pamior. Ciapier reštki banka pieraŭtvarylisia ŭ niabankaŭskuju kredytna-finansavuju arhanizacyju «OptyKurs».
Ale, jak viadoma «Našaj Nivie», biznesmien Vierabiej znajšoŭ novy bank dla praviadzieńnia svaich apieracyj. U bankirskich kołach papularnaja čutka pra toje, što niadaŭna jon staŭ bienieficyjaram Statusbanka (pa inšaj viersii, uhoda voś-voś adbudziecca).
Detali ŭhody nieviadomyja, vykazvajecca zdahadka, što Vierabiej zachodzić tudy praz «Funta» — naminalnaha, ale nie realnaha bienieficyjara, jaki ŭ realnaści padkantrolny Vierabju. Mienavita takuju viersiju «Našaj Nivie» ahučyli abaznanyja krynicy z bankaŭskich kołaŭ. U paćvierdžańnie słovaŭ ukazvajecca na toje, što mieniedžarskija kadry byłoha Absalutbanka masava pieravodziacca ŭ Statusbank.
Pra Statusbank viadoma toje, što jon naležaŭ ułaśnikam «Jeŭraopta», ale apošnija hady jany nieadnarazova dekłaravali namier pazbavicca niaprofilnaha aktyvu i viali pieramovy z roznymi patencyjnymi kupcami, siarod jakich byŭ i Mikałaj Vierabiej.
Mikałaj Vierabiej — adna z centralnych fihur bujnoha łukašenkaŭskaha biznesu z dostupam da zakrytaha dla inšych biznesmienaŭ naftavaha siektaru, udzielnik tryumviratu, u jaki ŭvachodziać taksama Alaksiej Aleksin i Alaksandr Zajcaŭ.
Ličycca, što Vierabiej adzin z pradstaŭnikoŭ hetak zvanych «biznesmienaŭ udačy», jakija abaviazanyja svaim pośpiecham ilhotam i prefierencyjam z boku Alaksandra Łukašenki.
Vierabiej trapiŭ pad sankcyi ZŠA i ES, paśla čaho pačaŭ pierapisvać doli svaich biznesaŭ na top-mieniedžaraŭ.
