Volha Špileŭskaja. Fota: BiełTA.
«Pakul Zachad napampoŭvaje Ukrainu dakładnaj zbrojaj, ź jakoj zabivajuć mirnych hramadzian, Rasija adpraŭlaje kambajny, kab sabrać chleb va Uschodniaj Ukrainie», — skazała Špileŭskaja ŭ efiry BT.
Chutčej za ŭsio, Špileŭskaja pabačyła navinu pra heta na adnym z rasijskich šavinistyčnych sajtaŭ, u jakim infarmacyja pierakazvałasia ŭ padobnym klučy.
«Uvosień mašynna-traktarny park DNR papoŭnicca adzinaccaćciu novymi zbožžaŭboračnymi kambajnami, technika budzie pastaŭlena pa lizinhavaj prahramie z Rasii, paviedamili ŭ ministerstvie ahrapramysłovaj palityki i charčavańnia Danieckaj Narodnaj Respubliki», — pisali rasijskija prapahandysty.
Što nie tak z hetaj zajavaj i čamu heta manipulacyja?
Pa pieršaje, va Ukrainie jość demakratyčny, zakonna abrany narodam Ukrainy ŭrad. I tolki jon upaŭnavažany prasić inšyja krainy ab pastaŭkach taho ci inšaha tavaru ci niejkaj dapamohi. Siońnia Ukraina zmahajecca za svaju niezaležnaść, i dla abarony ad Rasii joj patrebnaja zachodniaja zbroja. Varta adznačyć, što Ukraina prosić pastaŭlać joj našmat bolš zbroi, čym Zachad zaraz heta robić. Nierašučaść Zachadu ŭ pastaŭkach vyklikaje šmatlikuju niezadavolenaść unutry ŭkrainskaha hramadstva. Biez zachodniaj zbroi Ukrainie było b vielmi ciažka.
A voś Rasija apošnija 8 hadoŭ pastaŭlała zbroju niezakonnym uzbrojenym farmavańniam, jakija suprać Ukrainy vajavali.
Taksama Špileŭskaja śviadoma manipuluje i ssoŭvaje akcenty.
Ukraincaŭ zabivaje nie amierykanskaja zbroja, prysłanaja dla samaabarony, a rasijskaja armija, jakaja raspačała vajnu.
Hetaja armija akupoŭvaje ŭkrainskija harady i vioski i ździajśniaje vajennyja złačynstvy suprać nasielnictva.
Za zabojstvy i zhvałtavańni adkazvaje ahresar, a nie achviara ahresii, jakaja «paśmieła» supraciŭlacca. Špileŭskaja, jak kiraŭnica Sajuza žančyn, musiła b heta viedać.
Ciapier piarojdziem da kambajnaŭ. Ź imi va Ukrainie (na padkantrolnaj terytoryi) było ŭsio cudoŭna. Za apošnija hady ŭkrainskija ahraryi istotna abnavili park sielskahaspadarčaj techniki.
Jany štohod tracili bolš za 1 młrd dalaraŭ na nabyćcio impartnaj sielhastechniki. Kožny hod ukraincy kuplali tysiačy novych kambajnaŭ najlepšych zachodnich vytvorcaŭ: Case, Claas, John Deere i New Holland.
Ukraina spakojna abychodziłasia biez rasijskich kambajnaŭ i źbirała bieź ich rekordnyja ŭradžai zbožža pa 105 miljonaŭ ton.
Fota: deere.ru
Akramia ahrachołdynhaŭ, praces techničnaha pieraasnaščeńnia zapuścili taksama siarednija haspadarki i fiermiery. Va ŭkrainskich ahraryjaŭ byli hrošy na jeŭrapiejskuju i amierykanskuju techniku, navat niahledziačy na jaje vysokuju canu. A voś raspačaŭšy vajnu suprać Ukrainy, zabłakavaŭšy ŭkrainskija party, uskładniŭšy ekspart ukrainskaha zbožža, Rasija faktyčna pazbaviła miascovych fiermieraŭ utarhavanych hrošaj, što viadzie da ich źbiadnieńnia i niemahčymaści kuplać novuju techniku.
Bolš za toje, Rasija zajmajecca adkrytym kradziažom ukrainskaj sielhastechniki z akupavanych terytoryj.
Tak u krasaviku stała viadoma, što kadyraŭcy vyvieźli z akupavanaha Chiersona i Mielitopala ŭkrainskija siejałki, kambajny i traktary na miljony dalaraŭ. Dziakujučy ŭstanoŭlenym sistemam hieałakacyi ŭdałosia vyśvietlić, što techniku vyvieli ŭ Čačniu. Kab akupanty nie mahli jaje vykarystać, vytvorca techniki John Deere dystancyjna adklučyŭ jaje, što pieratvaryła kambajny ŭ mietałałom.
Vajna ŭžo pryviała da taho, što dziasiatki tysiač ukraincaŭ i rasijan zahinuli, miljony ludziej stali biežancami i ŭnutranymi pierasialencami, u kožnuju ŭkrainskuju siamju pryjšło hora, dziasiatki tysiač dziaciej zastalisia biez baćkoŭ. Ahresar zrujnavaŭ ukrainskuju infrastrukturu na sotni miljardaŭ dalaraŭ, Rasiju faktyčna vyklučyli z suśvietnaha handlu, ekanomiki i palityki. Ci nie zanadta heta vysokaja cana za 11 rasijskich kambajnaŭ, pastaŭlenych u lizinh u «DNR»?
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Rasijanie ŭžo niekalki razoŭ adrapartavali pra źniščeńnie HIMARS. Ale nie viedali adnaho prostaha fakta
Kab dakazać, što źvierstvaŭ u Bučy nie było, łukašenkaŭcy źviarnulisia da francuza
«Biełaruś — samaja paśpiachovaja, a ŭ Prybałtycy — zaniapad, zakrytyja zavody». Što ž, paraŭnajem, kolki i čaho ekspartujuć Biełaruś i Litva
