Fota: Sernageomin.
Vielizarny kratar utvaryŭsia ŭ minułyja vychadnyja kala miednaj šachty Lundin Mining u Alkaparosa.
U intaresach biaśpieki nasielnictva miascovyja ŭłady nieadkładna pryniali rašeńnie ab častkovym pierakryćci prylehłych terytoryj. Na miesca taksama była nakiravana śpiecyjalnaja daśledčaja hrupa, kab vyśvietlić pryčynu źjaŭleńnia takoj vialikaj dzirki.
Ułady Čyli adpravili na daśledavańnie varonki supracoŭnikaŭ nacyjanalnaj hieałahičnaj słužby. Śpiecyjalisty pakul što nie mohuć śćviardžać, što źjaŭleńnie dzirki ŭ ziamli źviazana sa zdabyčaj na rudnikach. Pa ich słovach, ad šachty varonku adździalaje «značnaja adlehłaść» — prykładna 200 mietraŭ.
Žychary navakolnych pasieliščaŭ vykazvajuć zaniepakojenaść, bo takoha tut jašče nie zdarałasia. «My pieražyvajem, choć strach byŭ u nas zaŭsiody. Naša kamuna akružanaja radoviščami karysnych vykapniaŭ, dzie viaducca padziemnyja raboty — faktyčna, prama pad nami», — zajaviŭ mer miascovaj kamuny Krystabala Suńjiha.
Nieabchodna vyvučyć, nakolki dzirka źviazana z hornymi rabotami i ci moža zdabyča ŭjaŭlać pahrozu dla prylehłych terytoryi. «My prosim adkazaŭ ad kampietentnaha orhana, kab vyśvietlić, čamu heta adbyłosia, i acanić ryzyki taho, ci moža toje samaje adbycca ŭ inšym nasielenym punkcie našaha municypaliteta», — skazaŭ Suńjiha radyjo ADN.
