U kancy 80-ch hadoŭ kramy «Biarozka» byli likvidavanyja. Fota: sovietpostcards.org
U Maskvie i Pieciarburhu adkryjuć kramy biazmytnaha handlu, jakija buduć absłuhoŭvać dypłamataŭ, konsułaŭ i ich siemji, a taksama supracoŭnikaŭ mižnarodnych arhanizacyj, raźmieščanych u Rasii, napisała ŭ sieradu «Parłamienckaja hazieta». Vydańnie pieršaje praviało anałohiju — u SSSR była sietka mahazinaŭ «Biarozka».
Adnak «Biarozka», u jakoj za valutu i čeki mahli kuplać deficytnyja tavary inšaziemcy, a taksama dypłamatyčnyja i vajennyja śpiecyjalisty, ŭjaŭlała saboj razhalinavanuju sietku.
Miarkujučy pa pastanovie ŭrada, na jakuju spasyłajecca «Parłamienckaja hazieta», u ciapierašnich reałijach razmova idzie pakul tolki ab dvuch mahazinach — u Maskvie i ŭ Pieciarburhu.
Adnak vydańnie padaje heta jak zjavu i nie baicca pisać u zahałoŭku: «U Rasii zjaviacca mahaziny, niedastupnyja dla prostych hramadzian».
Kramy buduć pracavać u režymie duty free. Pradavać buduć ałkahol, tytuń, parfumieryju i kaśmietyku, kandytarskija tavary, juvielirnyja vyraby, smartfony, hadzińniki.
Usie pieraličanyja hrupy tavaraŭ paciarpieli paśla rašeńnia najbujnych suśvietnych kampanij pakinuć Rasiju ŭ adkaz na ŭvarvańnie va Ukrainu. U lipieni ab kančatkovym rašeńni spynić biznes u krainie abviaściła kampanija Philip Morris — vytvorca Marlboro, jaki ŭ savieckija hady možna było kupić tolki ŭ «Biarozcy». U kancy červienia ab sychodzie abviaściła kampanija Diageo — vytvorca Johnnie Walker.
Rasijskija kramy elektroniki pačali pradavać užyvanyja smartfony. Papularnaja sietka kram adzieńnia H&M u žniŭni časova adkryła kramy, začynienyja ŭ sakaviku paśla ŭvarvańnia, kab raspradać reštki i syści z rasijskaha rynka. U mahaziny vystrailisia vializnyja čerhi.
Na hetym fonie navina pra anałah «Biarozki» stała chutka raspaŭsiudžvacca ŭ rasijskich ŚMI.
«Hetyja handlovyja kropki dajuć mahčymaść dypłamatam svabodna kuplać tavary, jakija jany nie mohuć zavieźci abo kupić u krainie znachodžańnia», — pryznaŭ u razmovie z «Parłamienckaj hazietaj» namieśnik staršyni kamiteta Savieta Fiederacyi pa mižnarodnych spravach Uładzimir Džabaraŭ.
Kupić tavary ŭ kramach biazmytnaha handlu možna budzie tolki ŭ roźnicu i pry pradjaŭleńni dakumientaŭ, jakija pacviardžajuć słužbovaje stanovišča i akredytacyju pry MZS Rasii, papiaredžvaje vydańnie. Dypłamatam dazvolili apłačvać tavar nie tolki rublami, ale dołarami i jeŭra.
Z samaha pačatku znachodžańnia Uładzimira Pucina va ŭładzie jaho epochu pryniata charaktaryzavać jak «sprobu adnaŭleńnia Savieckaha Sajuza». Adnak, mabyć, tolki ŭ apošnija miesiacy paraŭnańnie z SSSR stała takim vidavočnym.
