Stała viadoma, što hienierała Uładzimira Arčakova, namieśnika sakratara Rady Biaśpieki, źniali z pasady — adpaviednaje rašeńnie apublikavana siońnia nočču na pravo.by.
Hienierał-major Arčakoŭ — zaŭvažnaja fihura. U Radzie biaśpieki jon słužyŭ z 2014 hoda, da taho — uznačalvaŭ KDB pa Viciebskaj vobłaści.
Rodam ź Jekaciarynburha, hety śpiecsłužbist bieskampramisna zmahaŭsia nie tolki ź ludźmi inšych palityčnych pohladaŭ, ale i z historyjaj Biełarusi.
Čytajcie taksama: Historyki nazyvajuć zdradaj Biełarusi toje, što pišacca pra histaryčnuju pamiać pad kiraŭnictvam Arčakova
Ën publična namiakaŭ na pierśpiektyvu śmierciaŭ palityčnych dziejačaŭ emihracyi ŭ aŭtakatastrofach, davaŭ rekamiendacyi dla prasoŭvańnia pa karjernaj leśvicy dušycielam z dušycielaŭ. Ale jaho źniali.
Surazmoŭcy «Našaj Nivy» ličać, što apošnija dva hady hienierał «adbyvaŭ numar», bo nie z ruki było vyhaniać zasłužanaha dla sistemy čałavieka da hienieralskaj piensii — Arčakoŭ naradziŭsia ŭ 1967 hodzie. Sioleta jamu spoŭniłasia 55 hod — uzrost dla hienierała, paśla jakoha dalejšy kantrakt praciahvajecca tolki ŭkazam Łukašenki.
Arčakovu kantrakt praciahnuć mahli, ale nie praciahnuli.
Fota: pres-słužby DPK
Ludzi ź siłavych struktur adnoj z pryčyn nazyvajuć pravał «Kancepcyi infarmacyjnaj biaśpieki», jakuju raspracoŭvaŭ Arčakoŭ.
Na prezientacyi svajoj kancepcyi hienierał kazaŭ nastupnaje: «Dla Biełarusi važna abaraniać śfieru sensaŭ, tamu my prytrymlivajemsia mienavita takoj madeli. U kancepcyi vyłučany try kirunki ŭ zabieśpiačeńni infarmacyjnaj biaśpieki: śfiera sensaŭ, abarona infarmsietak i abarona infarmresursaŭ», — cytavała Arčakova BiełTA.
Sam Arčakoŭ napisaŭ sakretnuju dysiertacyju (jość vid navukovych rabot z hryfam sakretnaści) pa temie «Kancepcyi infarmacyjnaj biaśpieki». Za heta jon atrymaŭ navukovaje zvańnie.
«U Radzie biaśpieki z «kancepcyjaj infarmacyjnaj biaśpieki» nasilisia jak ź pisanaj torbaj: patracili hady, proćmu srodkaŭ, pryciahnuli sotni «ekśpiertaŭ», z pompaj prezientavali dziasiatki staronak vynikovaha tekstu, a što akazałasia? — kaža naziralnik. — A akazałasia, što ŭ «śfiery sensaŭ» para pacanoŭ z Varšavy (majecca na ŭvazie redaktary «Niechta» — NN) vykačali ŭ łužynie i hienierałaŭ Rady biaśpieki, i «majstroŭ słova» z Makajonka i Kamunistyčnaj. A adnosna «abarony resursaŭ» — praciŭniki dyktatury skrali amal usie bazy danych, jakija tolki jość. I pieradali Bajpołu», — dadaŭ čałaviek, znajomy z hienierałam.
Jość i druhi aśpiekt, miarkujuć naziralniki. Pavodle słovaŭ kaleh, u sistemie ŭ cełym uziaty kurs na zvalnieńnie ŭsich ideołahaŭ, jakija, na dumku Alaksandra Łukašenki, «pravalili 2020 hod»: zvolnienyja ideołahi Administracyi prezidenta, ideołahi vykankamaŭ. Ciapier pryjšła čarha hienierałaŭ Rady biaśpieki.
«Našaj Nivie» staŭ viadomy i pakazalny fakt. Rodnyja hienierała nie padtrymlivali taho, što jon rabiŭ, i padčas padziej 2020—2022 hadoŭ byli na baku biełaruskaha naroda.
