«U Litvie siońnia horača, kala 30 hradusaŭ, horača i na miažy Litvy, u płanie biaśpieki. Patoki vyraśli, užo niekalki tydniaŭ my nazirajem rost kolkaści nielehałaŭ», — raskazaŭ Lubajeŭ.
Pa jaho słovach, užo byŭ ustanoŭleny rekord hetaha hoda — za sutki nie puścili bolš za 100 čałaviek. Zaraz u siarednim u dzień fiksujecca kala 60-70 sprobaŭ niezakonnaha pierasiačeńnia miažy.
«Usio bolš vypadkaŭ nielehalnaha praniknieńnia fiksujem na poŭnačy, u Vilenskim rajonie, u Śviancianach, u Haduciškach. Tam nie ŭsiudy jość zaharody i sistemy abarony, tamu mihranty arhanizavana sprabujuć prarvacca. Pakul atrymoŭvajecca svoječasova spynić hetyja sproby», — raskazaŭ Lubajeŭ.
Pa-raniejšamu fiksujucca vypadki paškodžańnia fizičnaha barjera — heta, pa jaho słovach, robiać i mihranty, i biełaruskija pamiežniki.
«Z pačatku hetaha hoda zafiksavana kala 100 vypadkaŭ paškodžańnia fizičnaha barjera, u tym liku vypadkovyja (padčas budaŭničych rabot) abo paškodžańni, naniesienyja žyviołami. U 70% zaharody paškodžvajuć tam, dzie niama sistem nazirańnia», — skazaŭ kiraŭnik SADM.
Pavodle jaho słoŭ, biełarusy vučać mihrantaŭ, jak pieraadoleć barjery, jakija miescy vybirać, časam sami razrazajuć kalučy drot i ŭpuskajuć mihrantaŭ na terytoryju Litvy.
«Raboty pa ŭstanoŭcy fizičnaha barjera padychodziać da kanca (zastałosia kala 20 km). Da kanca hoda płanujem zaviaršyć ustanoŭku sistem nazirańnia», — praciahnuŭ jon.
Z-za napružanaj abstanoŭki hramadzianam Litvy nie rekamiendujuć jeździć u Biełaruś. Pa słovach Lubajeva, biełarusy mohuć abvinavacić u pieravozcy narkotykaŭ, zabrać pašpart, sapsavać jaho, mohuć zatrymać čałavieka.
Jon nazvaŭ pryčyny, pa jakich hramadzianie Litvy jeździać u Biełaruś, i paraiŭ nie rabić hetaha: «Bolšaja častka tych, chto jedzie ŭ Biełaruś, kažuć, što jeduć da svajakoŭ, blizkich, znajomych, moža, kupić niešta».
«Ja ŭsio ž liču, što ciapier našy hramadzianie mohuć padarožničać pa Jeŭropie, mabyć, varta źviarnuć svoj pohlad na Zachodniuju Jeŭropu, na demakratyčnyja krainy. A kali pa roznych pryčynach — moža, kab naviedać znajomych, rodnych — vyrašajuć jechać u Biełaruś, treba ŭsio ŭzvažyć i adkazna prymać rašeńnie, treba razumieć i viedać, što mahčymyja pravakacyi, tady čałavieku składana budzie akazać dapamohu, a moža navat niemahčyma», — padkreśliŭ Lubajeŭ.
Usiaho sa žniŭnia 2021 hoda, kali było pryniata rašeńnie nie ŭpuskać nielehalnych mihrantaŭ, na litoŭskaj miažy spynili amal 11 700 nielehałaŭ.
