Fota: ofis Cichanoŭskaja
Pierš za ŭsio Łatuška patłumačyŭ, što «ŭ nas nie kłasičnaja situacyja, kali isnuje ŭsia struktura orhana vykanaŭčaj ułady, kali jość aparat, sakrataryjat, dziejničajuć ministerstvy, mianiajecca tolki kiraŭnictva, jakoje prychodzić u dziejučuju sistemu, unosić niejkija palityčnyja sensy i prymaje kiraŭničyja rašeńni.
My ciapier faktyčna stvarajem sistemu z nula».
Dziela hetaha, pa słovach palityka, nie varta čakać, što na praciahu sta dzion (jak u zvyčajnaj kłasičnaj situacyi) urad pavinien budzie dać spravazdaču ab vynikach. Heta prosta niemahčyma.
Łatuška skazaŭ, što ŭnosiacca prapanovy ab tym, kab u ramkach paŭnamoctvaŭ pradstaŭnika, jaki adkazvaje za pytańni tranzitu ŭłady, sankcyj, kryminalnaha pieraśledu i kadravaj palityki, źjavilisia try strukturnyja padraździaleńni. Heta nie aznačaje, što ŭ ich siaduć biurakraty pa prykładu kłasičnaha ministerstva. Pieraličanyja hrupy prosta buduć adkazvać za hetyja kirunki pracy.
Nazyvać takija hrupy kamitetami abo adździełami možna pakul što ŭmoŭna, dakładna heta jašče budzie vyrašacca.
Pieršaja struktura — heta Kamitet pa sankcyjach. Jana budzie dziejničać pad kiraŭnictvam samoha Łatuški.
Jak jon kaža: «Na siońniašnim etapie my pavinny praanalizavać efiektyŭnaść sankcyjnaj palityki (pierš za ŭsio ŭ ekanamičnaj śfiery) i zrazumieć, na što nieabchodna źviarnuć asablivuju ŭvahu, jak damahčysia taho, kab sankcyi dali vynik, jaki my čakajem».
Druhaja struktura moža nazyvacca kamitetam, jaki budzie zajmacca kryminalnym pieraśledam:
«Nam patrebny budzie vialiki abjom pracy ŭ ramkach nacyjanalnych jurysdykcyj krain, na terytoryi jakich hramadzianie našaj krainy mohuć padavać zajavy ab katavańniach, učynienych u dačynieńni da ich u Biełarusi. Havorka idzie i pra mižnarodnyja pravavyja sistemy ci mižnarodnyja kanviencyi, jakija mohuć być zadziejničanyja».
Narešcie, treciaja struktura — kadravy kamitet. Heta novy kirunak, i jon pavinien być sistematyzavany:
«Z adnaho boku, nam treba rabić usio, kab dać vielmi vyrazny sihnał dziaržaŭnaj sistemie, što siońnia jana pracuje na źniščeńnie biełaruskaj nacyi, na represii, spynieńnie isnavańnia Biełarusi. Inšaja častka hetaj zadačy — sfarmavać sistemu, jakaja dazvolić nam u najbližejšy čas razumieć, što ŭ kožnym rajonie, u kožnaj vobłaści pad kožnaje ministerstva ŭ pierśpiektyvie ŭ nas jość hrupa prafiesijanałaŭ, zdolnych u pierachodny tranzitny pieryjad pryniać adkaznaść za kiravańnie krainaj.
Ciapier buduć stvaracca hrupy, jakija arhanizujuć hetuju pracu.
Prytym Łatuška padkreślivaje jašče raz: na kłasičnyja biurakratyčnyja struktury niama ni resursaŭ, ni niejkich štatnych pasad. Šmat budzie zaležać ad kiraŭnikoŭ kamitetaŭ abo adździełaŭ.
«Jany pavinny praanalizavać, chto siońnia ŭ demakratyčnych siłach Biełarusi zajmajecca tym ci inšym kirunkam, pravieści kamunikacyju z hetymi ludźmi. U ramkach haryzantalnych suviaziaŭ damovicca pra abjadnańnie resursaŭ, usich viedaŭ, vopytu, mahčymaściaŭ kožnaha čałavieka ci inšych arhanizacyj. My pavinny abjadnać svoj resurs razam z dyjasparami, ź niaŭradavymi arhanizacyjami, inšymi inicyjatyvami, kab dasiahnuć tut vynikaŭ jak maha chutčej», — padkreślivaje Łatuška.
Imiony budučych kiraŭnikoŭ užo jość, ale nazyvać ich Łatuška pakul nie staŭ.
