Vydača pravoŭ
Ciapier paśviedčańnie kiroŭcy možna pamianiać niezaležna ad miesca rehistracyi. Vydaču ž dakumienta pakinuli za REP DAI pa miescy rehistracyi aŭtaškoły albo pa miescy rehistracyi kiroŭcy, kali jon abaviazany być zarehistravany pa miescy znachodžańnia.
Buduć vydavać mižnarodnyja paśviedčańni kiroŭcy. Niekatoryja krainy patrabujuć mienavita mižnarodnaje paśviedčańnie. U śpisie hetych dziaržaŭ: Aŭstralija, Arhiencina, Vieniesueła, Jehipiet, Indyja, Ispanija, Kanada, Kipr, Kareja, ZŠA, Tajłand, Japonija i inšyja. U Biełarusi vydača mižnarodnych pravoŭ pačałasia z 2020 hoda, vyhladajuć jany jak knižačka. Vydajucca na padstavie nacyjanalnaha (zvyčajnaha) vadzicielskaha paśviedčańnia na 3 hady. Dla atrymańnia treba padać u DAI pašpart, mieddaviedku, fota i kvitancyju ab apłacie 2 bazavych vieličyń za vydaču, 0,12 b.v. za afarmleńnie zajavy i kampjutarnyja pasłuhi. Ličycca, što «knižačka» źjaŭlajecca dadatkam da nacyjanalnych pravoŭ i biez asnoŭnaha dakumienta niesapraŭdnaja.
Taksama źjavicca mahčymaść zdavać ekzamien na aŭto z AKPP. Adpaviedna, možna budzie atrymlivać prava na kiravańnie TS tolki z «aŭtamatam» — pra heta budzie śviedčyć adznaka «AT» z zvarotnaha boku paśviedčańnia, u 12-j hrafie. Z takimi pravami na mašynach z «miechanikaj» jeździć budzie nielha — takich kiroŭcaŭ buduć ličyć «biaspraŭnikami».
Taksama ciapier navučalnym ustanovam nie treba ŭzhadniać maršruty dla «praktyki ŭ horadzie» z DAI. Adnak praduhledžany pieralik učastkaŭ daroh, na jakich zabaronienaje navučańnie.
Taksama spraścili paradak stažyroŭki: skaracili kolkaść minimalnych hadzin, źnizili patrabavańni da TS, na jakich jana pravodzicca. Bolš padrabiaznuju infarmacyju pra hadziny stažyrovak prafiesijnyja vadzicieli mohuć znajści ŭ samym dakumiencie.
Śniehabałotachodami, kvadracykłami, śniehachodami i motaŭsiudychodami možna budzie kiravać z 17 hadoŭ i biez zdačy ekzamienaŭ.
Techahlad
Ciapier na dyjahnastyčnych stancyjach pavinna być zabiaśpiečanaja mahčymaść raźlikaŭ z dapamohaj ARIP, heta značyć, dystancyjna praź internet. A jašče na ŭsio stancyjach, u tym liku rehijanalnych, pavinien źjavicca papiaredni zapis dla praviadzieńnia dziaržtechahladu.
Mieddaviedka
Kiroŭca moža prajści pieraahlad u luboj arhanizacyi achovy zdaroŭja — «pa svaim žadańni».
Nakiroŭvać na miedkamisiju dla pieraahladu ciapier pavinny piśmova, uručać papieru — asabista i pad rośpis. Infarmacyju ab kiroŭcach, nakiravanych na pieraahlad, buduć adpraŭlać: arhanizacyi achovy zdaroŭja — u MUS i ŭ Minsielhas nie radziej za adzin raz na miesiac, najmalniki — u DAI nie paźniej za 10 kalandarnych dzion paśla vydačy nakiravańnia.
Kali vyrašana nie dapuskać kiroŭcu da kiravańnia pa miedpakazańniach, jamu daduć zaklučeńnie — taksama asabista i pad rośpis. Kali niama mahčymaści — vusna. Kali i tak nie atrymajecca — zakaznym listom na praciahu 5 dzion. Pieralik zachvorvańniaŭ, jakija źjaŭlajucca padstavaj dla niadopusku, možna znajści tut.
Z pačatku hetaha hoda ŭlik vadzicielskich daviedak aŭtamatyzavany. Dostup da bazy z danymi ludziej, pryznanych niazdolnymi da kiravańnia transpartnym srodkam jość u MUS i Minsielhasa.
