Pavał Kułažanka ŭ hutarcy z błohieram Bałahanavym paćvierdziŭ, što nasamreč sychodziŭ z pałka, ale z Ukrainy nie źjazdžaŭ.
«Sychodziŭ z pałka, tamu što tam na toj momant byli «vielmi vialikija razborki, kanflikty», — koratka patłumačyŭ jon.
«U pryncypie, na toj momant u mianie byŭ vybar: albo padpisvać zapisku ŭ styli HUBAZiK, u jakoj abhavorvać siabie, albo vyvaz u les, jak by heta dziŭna ni hučała», — znoŭ navioŭ tumanu Kułažanka.
Ale, pavodle jaho, na hety momant usie kanflikty ŭnutry pałka pahašanyja.
Kułažanka kaža, što ŭ pałku było praviedzienaje ŭnutranaje rasśledavańnie «pa dziejańniach peŭnych ludziej».
«Z pałka syšli peŭnyja ludzi, adzin ź ich, pa-mojmu, byŭ zvolnieny z USU, u pałku nijakich kanfliktaŭ ci roznahałośsiaŭ niama», — kaža jon.
Pavodle Paŭła, kanflikty ŭ pałku byli tak zvanaj «chvarobaj rostu».
«Połk Kalinoŭskaha pačynaŭ farmavacca ŭ vielmi niespryjalnych, niečałaviečych umovach abłohi Kijeva. I nichto z nas, nichto ź biełarusaŭ nie rabiŭ hetaha raniej. Heta pieršy vopyt stvareńnia takoj struktury, nie tolki vajskovaj, ale vajskova-palityčnaj užo bolš. Połk Kalinoŭskaha — heta jak dzicia, jakoje nabivaje huzy, ździraje kaleni, ale tym nie mienš ustaje na nohi i robić pieršyja kroki», — tłumačyć jon.
Ciapier situacyja, pavodle Kułažanki, u pałku narmalizavałasia.
«Połk idzie napierad i, ja dumaju, što nie varta marnavać čas, padymajučy niejkuju kałamutnuju chreń, ułazić u niejkija kanflikty, razborki. Tamu što my možam vydatkavać hetuju enierhiju, kab raźvivać naša padraździaleńnie i dapamahać Ukrainie», — skazaŭ jon.
Kułažanka skazaŭ, što jon znachodzicca na kantrakcie va USU i pakazaŭ u efiry svoj vajskovy bilet. Błohier Bałahanaŭ raspavioŭ, što ŭ toj čas, jak jamu dasyłali ŭ pryvat paviedamleńni, što bačyli Kułažanku ŭ restaranie Ńju-Jorka, toj dasyłaŭ jamu videa, jak jon udzielničaŭ u bajach, ale nie chacieŭ źniapraŭdžvać čutki.
U pałku Kalinoŭskaha redakcyi «NN» paćvierdzili, što jon viarnuŭsia.
U žniŭni zjaviłasia infarmacyja pra toje, što Kułažanka pakinuŭ połk Kalinoŭskaha paśla taho, jak jaho «pavučyli». U čym była pryčyna kanfliktu, dakładna nie viadoma.
Praź niekalki dzion pres-słužba Pałka imia Kastusia Kalinoŭskaha aficyjna paviedamiła, što rašeńniem kamandavańnia vajskovaj čaści z Uzbrojenych sił Ukrainy, a takim čynam i z pałka, zvolnieny kamandzir bataljona pad nazvaj «Teror» z pazyŭnym «Varah». Zvolnieny «Varah» byŭ adnym z hałoŭnych dziejnych asobaŭ u kanflikcie z udziełam taksama ŭžo byłoha bajca Pałka Paŭła Kułažanki — mienavita «Varah» jaho «vučyŭ».