Fota: AR
Na ziamli
Padjezdy da Krymskaha mosta z abodvuch bakoŭ da vybuchu 8 kastryčnika achoŭvali śpiecyjalnyja atrady Rashvardyi. Vajennasłužačyja pavinny byli nadhladać aŭtamabili, jakija zajazdžajuć na pierapravu, na pradmiet uzryŭčatki i niezakonnych hruzaŭ (u tym liku narkotykaŭ).
Pa zajavach Mintransa, manitorynh fur i hruzavikoŭ pavinien byŭ ažyćciaŭlacca z dapamohaj śpiecyjalnych sistem, jakija praśviečvajuć aŭtamabili i hruzy ŭ kuzavie. Adna z apieratarak sistemy śćviardžała, što moža vyjavić navat hajku ŭ sałonie mašyny ci razhladzieć, što ŭziaŭ z saboj kiroŭca na abied.
Naziralnyja punkty jość nie tolki pry ŭjezdach, ale i na samym moście. Jany abstalavanyja kamierami kantrolu trafiku, a ruch na čatyrochpałosnaj chutkasnaj darozie kruhłasutačna manitoryć śpiecyjalny štab.
U vypadku nadzvyčajnaha zdareńnia śpiecyjalny atrad chutkaha reahavańnia pavinien prybyć na miesca na praciahu niekalkich chvilin, kab likvidavać avaryju i razabracca ŭ tym, što zdaryłasia. Dapamahać Rashvardyi pavinny śpiecyjalnyja siły pahraničnaha kantrolu FSB i antydyviersijnyja hrupy na ziamli i na vadzie.
Paśla 8 kastryčnika Uładzimir Pucin pieradaručyŭ achovu mosta FSB.
Fota: AR
Na vadzie
Na vadzie asnoŭnuju pracu pa achovie samaha doŭhaha ŭ Rasii mosta ažyćciaŭlajuć małyja ruchomyja katary niekalkich prajektaŭ. U pieršuju čarhu heta supraćdyviersijnyja katary typu «Hračonak», abstalavanyja, u zaležnaści ad madyfikacyi, kulamiotami, hranatamiotami i navat rakietnymi kompleksami «Ihołka». Kampaniju im składajuć mienšyja, ale bolš mabilnyja (raźvivajuć chutkaść da 50 vuzłoŭ — zvyš 90 kiłamietraŭ za hadzinu) katary prajekta «Manhust». Jany abstalavanyja kulamiotami i rakietami, adnak u asnoŭnym ich vykarystoŭvajuć dla pierachopu sudoŭ i nadhladu. Akramia taho, na miescy pa nieabchodnaści mohuć zadziejničać desantnyja katary.
Asobna achoŭvajuć most ad tarana: pierad aporami ŭźviedzienyja śpiecyjalnyja pały — cylindryčnyja bietonnyja ŭmacavańni, jakija nie daduć karablam padpłyści blizka da apor mosta.
Z sušy karabli padtrymlivaje bierahavy rakietny kompleks «Bał», abstalavany supraćkarabielnymi rakietami z dalokaściu paražeńnia da 260 kiłamietraŭ. Dapamahaje jamu bolš sučasny kompleks «Bastyjon» z kryłatymi rakietami «Oniks».
Pad vadoj
Nie mienš surjozna most achoŭvajuć i pad vadoj. Kab nie dapuścić miniravańnia abo padryvu apor, u vadzie pastajanna dziažurać vajennyja vadałazy i śpiecyjalnyja hrupy Čarnamorskaha fłotu. Jany rehularna ahladajuć apory mosta, a taksama kantralujuć pieramiaščeńnie lubych abjektaŭ z dapamohaj sistemy kantrolu akvatoryi «Płaŭnik». Dziakujučy hidrałakacyjnym datčykam, a taksama ciepłavizaram i radyjołakacyi, takaja sistema moža vyjavić čałavieka na adlehłaści ŭ dva kiłamietry, a sudna— na adlehłaści troch kiłamietraŭ.
Kali ž dyviersanty zmohuć abyści vadałazaŭ i padabracca da apor mosta na adlehłaść 300 mietraŭ, to ŭ spravu pavinny ŭstupić śpiecyjalnyja hukavyja pastki (sistema «Amulet-P»). Jany vypramieńvajuć hukavyja chvali, jakija čałaviečaje vucha nie ŭ stanie vytrymać, a kali cel nablizicca na 100 mietraŭ, častata ŭzmacniajecca, što prymušaje dyviersanta ŭspłyć na pavierchniu.
Akramia vadałazaŭ i pastak, u abaronie Krymskaha mosta nibyta zadziejničanyja śpiecyjalna navučanyja delfiny. Paśla anieksii Kryma akijanaryumy, u jakich ukrainskija vajskoŭcy treniravali žyvioł, pierajšli pad kantrol rasijskaj armii. Pa zadumie, padrychtavanyja delfiny pavinny byli šukać patencyjnyja pahrozy na hłybini da 60 mietraŭ. U rasijskim Minabarony ekśpierymienty nad marskimi žyviołami admaŭlali, adnak paźniej stała viadoma, što viedamstva zamoviła ŭ akijanaryuma piać novych asobin.
U pavietry
Achova ŭ niebie pačynajecca sa śpiecyjalnaha spadarožnika «Kosmas-K», jaki možna vyvieści da zadadzienaj celi ź ziamli. Z arbity spadarožnik moža pieradać u centr kiravańnia paramietry celi, a taksama jaje zdymki.
Nižej, užo ŭ ziamnoj atmaśfiery, pavietranuju prastoru rehularna patrulujuć rasijskija źniščalniki Su-27 i supraćłodačny samalot-raźviedčyk Ił-38. Samaloty viaduć raźviedku i ŭ vypadku nieabchodnaści mohuć zadziejničać rakiety, bomby, supraćłodačnyja rakiety i miny.
Fota: AR
Ź ziamli hetuju hrupoŭku padtrymlivaje cełaja hrupa supraćpavietranych sistem roznaj dalokaści. U pieršuju čarhu, heta rakietny kompleks S-400 «Tryumf» — samaja pieradavaja zienitnaja sistema na ŭzbrajeńni rasijskaj armii; na achovu mosta vydzielena cełych dva pałka sistem hetaha typu. Akramia taho, zbudavańnie achoŭvaje zienitna-harmatny «Pancyr-S1».
Asobna varta adznačyć radyjołakacyjnyja sistemy, jakija dapamahajuć usioj technicy, jakaja achoŭvaje most. Heta RŁS «Podsołnuch» u Krymie, jakaja ŭ stanie vyjaŭlać celi na adlehłaści 450 kiłamietraŭ, i stancyja «Varoniež-DM», jakaja pakryvaje adlehłaść u šeść tysiač kiłamietraŭ.
Vydańnie adznačaje, što tolki na naziemnuju achovu mosta, pa padlikach «Bi-bi-si», u 2022 hodzie vydatkavali 700 miljonaŭ rubloŭ plus jašče 618 miljonaŭ — na roznyja techničnyja sistemy biaśpieki. Prykładna ŭ stolki ž kaštavała achova čyhunačnaj častki mosta.
