Krainy ES i G7 pavinny «užo siońnia» sumiesna dumać ab udziele ŭ adnaŭleńni Ukrainy paśla vajny, raźviazanaj suprać jaje Rasijaj, i dla hetaha nieabchodna raspracavać prahramu, jakaja pa svaim dziejańni na ekanomiku pavinna być paraŭnalnaja z pryniatym paśla Druhoj suśvietnaj vajny «płanam Maršała» (amierykanskaja prahrama dapamohi Jeŭropie paśla Druhoj suśvietnaj vajny), zajavili kancler FRH Ołaf Šolc i staršynia Jeŭrakamisii Ursuła fon der Lajen.
Pa słovach Šolca i fon der Lajen, paśla vajny Ukrainie treba budzie chutka «ŭstać na nohi» i adnavić ekanomiku, i ad prajekta hetaj rekanstrukcyi budzie zaležać toje, jakoj krainaj Ukraina stanie ŭ budučyni. «Zaŭsiody varta być aściarožnymi ŭ paraŭnańniach z histaryčnymi padziejami, ale heta nie što inšaje, jak stvareńnie novaha «płana Maršała» XXI stahodździa», — ŭ artykule, apublikavanym u haziecie Frankfurter Allgemeine Zeitung.
Palityki pieraličyli śfiery i abjekty infrastruktury, jakija byli razburanyja rasijskimi vojskami i patrabujucca dla adnaŭleńnia ekanomiki va Ukrainie — žyłyja damy, škoły, darohi, masty i enerhazabieśpiačeńnie. Asobna kancler FRH i staršynia Jeŭrakamisii zhadali abstreły hramadzianskich abjektaŭ va Ukrainie, nazvaŭšy ich teraktami.
Na dumku jeŭrapiejskich palitykaŭ, ni Ukraina, ni asobnyja jaje partniory nie zmohuć spravicca z razburalnymi nastupstvami abstrełaŭ z boku rasijskich vojskaŭ, tamu ŭdzieł u adnaŭleńni Ukrainy pavinny sumiesna pryniać «ES, G7 i partniory daloka za ich miežami», a taksama pryvatnyja inviestary i kampanii. Pry hetym pavinien być stvorany efiektyŭny nahladny orhan dla baraćby z karupcyjaj pry realizacyi prahramy. Jak pakazvajuć aŭtary artykuła, «šlach da adnaŭleńnia Ukrainy — heta taksama jaje šlach u Jeŭrapiejski Sajuz».
Pa stanie na pačatak kastryčnika va Ukrainie było razburana 94 596 abjektaŭ infrastruktury, u tym liku 74 tysiačy žyłych damoŭ — takija danyja pryvodziŭ namieśnik kiraŭnika Ofisa prezidenta Ukrainy Uładzimira Zialenski Kirył Cimašenka. Bolš za ŭsio abjektaŭ razburana ŭ Kijeŭskaj (bolš za 25 tys.), Danieckaj (bolš za 20 tys.) i ŭ Charkaŭskaj abłaściach (bolš za 9 tys.).
