5 kastryčnika staršynia Viarchoŭnaha suda admoviŭsia abmiarkoŭvać prablemu sudovych adpisak z hrupaj žančyn.
Jak paviedamiła babrujčanka Valancina Kavalenka, u paniadziełak 5 kastryčnika na štomiesiačny asabisty pryjom da Sukały z usich rehijonaŭ krainy, akramia Hrodzienskaj vobłaści, pryjechała 21 žančyna. «My ŭ čaćviorty raz za apošnija čatyry miesiacy pasprabavali sustrecca sa staršynioj Viarchoŭnaha suda, adnak, jak i raniej, pračakali stojačy ŭ pryjomnaj čatyry hadziny i atrymali admovu», — skazała Kavalenka.
Pavodle jaje słoŭ na praciahu mnohich hadoŭ zajaŭnicy atrymlivajuć ad čynoŭnikaŭ Viarchoŭnaha suda farmalnyja adpiski na svaje skarhi ŭ paradku nahladu, apłačanyja dziaržpošlinaj. «Pakolki Sukała admoviŭsia abmiarkoŭvać z nami pytańnie adpisak, a 17 vieraśnia kiraŭnik Administracyi prezidenta Uładzimir Makiej nie pryniaŭ pradstaŭnikoŭ hrupy dla abmierkavańnia hetaj prablemy, my vymušany budziem źviartacca ŭ mižnarodnyja struktury», — skazała Kavalenka.
U lutym 2005 hoda byŭ asudžany na 18 hadoŭ za zabojstva jaje adziny syn. Pakolki ŭ kryminalnaj spravie pa fakcie zabojstva byli vidavočnyja supiarečnaści, baćka asudžanaha staŭ aktyŭna abskardžvać sudovy pryhavor, adnak u śniežni 2007 hoda byŭ asudžany za raspaŭsiudžvańnie narkotykaŭ. U vieraśni 2009 hoda pryhavor u dačynieńni da jaho ŭ treci raz byŭ admienieny, i sprava była nakiravana na novy razhlad.