Premjer-ministr Biełarusi Siarhiej Sidorski 6 kastryčnika nakiravaŭsia ŭ Maskvu dla praviadzieńnia pieramoŭ sa svaim rasijskim kaleham Uładzimiram Pucinym.
Jak zajaviŭ u pačatku pieramovaŭ Uładzimir Pucin, Biełaruś praciahvaje karystacca samymi lhotnymi ŭ SND dy i ŭ śviecie cenami na enierhanośbity, paviedamlaje radyjo «Svaboda». «Heta tyčycca i hazu — samyja tannyja taryfy, samyja tannyja ceny na haz u Biełarusi, i nafty — panižanyja pošliny, jakija dazvalajuć biełaruskim pradpryjemstvam być całkam zahružanymi i ažyćciaŭlać dastatkova vialiki abjom ekspartu, jaki prynosić vialikija dachody ŭ ćviordaj valucie ŭ biełaruski biudžet», — zajaviŭ Pucin. Akramia hetaha, rasijski premjer paviedamiŭ, što ŭ śniežni adbudziecca pasiedžańnie vyšejšaje dziaržrady «sajuznaj dziaržavy» Biełarusi i Rasii.
Pucin nahadaŭ, što Biełaruś — adzin z samych bujnych pastaŭščykoŭ miasa i małaka ŭ Rasiju i zaznačyŭ, što biełaruskich pastaŭščykoŭ pryraŭnali da rasiejskich pry ažyćciaŭleńni dziaržaŭnych zakupak u RF.
S. Sidorski paviedamiŭ, što tavarazvarot pamiž Biełaruśsiu i Rasijaj za 8 miesiacaŭ hetaha hoda ŭpaŭ bolš, čym na 40% — da ŭzroŭniu 2005 hoda.
Jon adznačyŭ, što chacieŭ by abmierkavać šerah pytańniaŭ, źviazanych z pastaŭkami nafty ŭ Biełaruś i prapanavaŭ abmierkavać šerah pytańniaŭ adnosna mahčymaści pavieličeńnia tavarazvarotu ŭ nastupnyja try miesiacy.
Aficyjny paradak dnia nie ahučvaŭsia, adnak jość usie padstavy ličyć, što ŭ liku pytańniaŭ dla abmierkavańnia byli cana na haz i vydzialeńnie Biełarusi kredytu, paviedamlaje BiełaPAN.
Napiaredadni, 5 kastryčnika, vice-premjer urada Rasii, ministr finansaŭ Alaksiej Kudryn zajaviŭ: «Pakul my nie razhladajem praciah kredytu Biełarusi (apošni tranš na $500 młn. z zajaŭlenaha raniej stabilizacyjnaha kredytu ŭ $2 młrd.). Na dvuchbakovaj asnovie nie vydzielim».
U toj ža dzień ministr finansaŭ Biełarusi Andrej Charkaviec paviedamiŭ, što Biełaruś praciahnie pieramovy z Rasijaj ab atrymańni tranšu kredytu na $500 młn.
Što datyčyć hazu, to, pavodle słoŭ Charkaŭca, prajekt biudžetu Biełarusi na 2010 hod sfarmiravany zychodziačy z prahnozu siaredniehadavoj cany na haz u pamiery $166 za tysiaču kubamietraŭ (ciapier — $115).
U samim «Hazpromie» nazyvali inšuju ličbu — $200. «Hazprom» taksama patrabuje, kab da kanca hoda Biełaruś likvidavała zapazyčanaść za haz — kala $200 młn.
