U śpis deputataŭ, jakich nie varta zanadta śviacić u publikacyjach, trapili kiraŭnik dumskaha kamiteta pa abaronie Andrej Kartapołaŭ, deputaty-hienierały Andrej Huruloŭ, Viktar Zavarzin, Andrej Krasaŭ i kiraŭnik kamiteta pa spravach žančyn Nina Astanina. Usie jany, na dumku kramloŭskaj administracyi, dazvalajuć sabie zališniuju samastojnaść u vykazvańniach i krytyku rasijskich vojskaŭ.
Pradstaŭniki błoka pieršaha namieśnika kiraŭnika Administracyi prezidenta Siarhieja Kiryjenki dali ŭkazańni dziaržSMI nakont cytavańnia niekatorych deputataŭ Dziarždumy. Parłamientaryi, jakija trapili ŭ śpis, nieadnarazova vykazvalisia pra chod vajny, u tym liku vystaŭlali Kreml u niavyhadnym śviatle, raspavioŭ «Viorstcy» blizki da nižniaj pałaty surazmoŭca.
U suviazi z hetym było pryniata rašeńnie cytavać ich «tolki z [infarmacyjnych] ahienctvaŭ i ŭ minimalnym abjomach, kali hetaha patrabuje navinavy paradak dnia», raspavioŭ surazmoŭca ŭ adnym sa ŚMI, jakija atrymali rekamiendacyi.
«Ukazańni nam prychodziać z upraŭleńnia pa hramadskich prajektach [Kramla], ad [kiraŭnika ŭpraŭleńnia] Siarhieja Novikava», — rastłumačyŭ jon.
Zhadanyja deputaty «trapili ŭ śpis taksičnych» z-za svaich vykazvańniaŭ, u asnoŭnym tych, što tyčacca chodu vajny, častkovaj mabilizacyi i zabieśpiačeńnia frontu. «Paśla pačatku mabilizacyi, dy i naohuł ź lutaha nie była vypracavana infarmacyjnaja stratehija ŭładaŭ, — patłumačyŭ adzin z surazmoŭcaŭ «Viorstki». — Usie kamientavali, chto na što zdolny, Kreml nie paśpiavaŭ razdavać ukazańni».
Mienavita tamu, śćviardžaje surazmoŭca, šerah parłamientaryjaŭ paśpieli zrabić vielmi niepryjemnyja dla administracyi prezidenta zajavy, a taksama «prakamientavać toje, čaho jany nie viedajuć i što ich nie tyčycca». Takaja «infarmacyjnaja nieachajnaść» mocna paškodziła fiederalnym uładam, bo z-za napružanaści, jakaja ŭźnikła praz vajnu ŭ hramadstvie, ludzi pačali vielmi vostra reahavać na šmatlikija zajavy ŭ ŚMI, nie raźbirajučy, chto skazaŭ, navošta skazaŭ. Siarod inšaha, deputaty pačali abiacać ratacyju kadraŭ i krytykavać pradstaŭnikoŭ uładaŭ, što źjaŭlajecca niedapuščalnym, upeŭnieny jon.
Chto pra što kazaŭ
Kiraŭnik abaronnaha kamiteta Dziarždumy Kartapołaŭ (da pierachodu ŭ Dziarždumu — namieśnik ministra abarony) u niadaŭnim kamientary RBK dapuściŭ mahčymaść kadravych pierastanovak z-za skarhaŭ mabilizavanych. «Toje, što hetaja infarmacyja źjaŭlajecca, heta dobra. Tamu što heta daje mahčymaść chutčej prymać rašeńni, — zajaviŭ deputat. — Dobra, što prablema vyrašajecca, dobra, što idzie vielmi apieratyŭnaja reakcyja na hetyja prablemy, ale drenna, što hetyja prablemy źjaŭlajucca. Pa ŭsich hetych vypadkach budzie praviedziena raźbiralnictva i pryniata nieabchodnaje rašeńnie, u tym liku i kadravaje».
Kiraŭnik dumskaha kamiteta nie pavinien byŭ anansavać źmienu kadraŭ i ŭžo tym bolš abiacać jaje, upeŭnieny surazmoŭca «Viorstki»: u Kartapołava prosta niama takich paŭnamoctvaŭ, a jaho słovy — «zdahadki i niejkija ŭłasnyja adčuvańni». Abiacać kadravyja rašeńni — prerahatyva Kramla i ŭrada, «ale nijak nie deputata, za što jon i trapiŭ u stop-śpis», padkreśliła krynica.
Taksama ŭ pačatku listapada Kartapołaŭ, jak paviedamlali «Iźviestija», staŭ saaŭtaram zakonaprajekta ab raspracoŭcy kryminalnaha pakarańnia dla ŭchilistaŭ. Choć aŭtary inicyjatyvy kazali pra hatoŭnaść unieści jaje ŭ Dziarždumu, paźniej u «Adzinaj Rasii» zajavili, što zakonaprajekt straciŭ aktualnaść. Hety zakonaprajekt nie spadabaŭsia Kramlu: pa mierkavańni administracyi prezidenta, jon «razhojdvaŭ łodku» i dadatkova pałochaŭ ludziej, jakija byli ŭ stresie z-za mabilizacyi.
Huruloŭ, Krasaŭ i Zavarzin padtrymlivali vykazvańni kiraŭnika svajho kamiteta i rabili ŭłasnyja zajavy. Huruloŭ, pa słovach krynicy «Viorstki» ŭ dziaržSMI, «u apošni čas sapraŭdy adviazaŭsia». «Paśla zdačy Limana jon staŭ adkryta łajać Minabarony», — nahadaŭ surazmoŭca. Mienavita Huruloŭ razam z kiraŭnikom Čačni Ramzanam Kadyravym vystupiŭ z krytykaj kamandujučaha Centralnaj vajennaj akruhaj Alaksandra Łapina za stratu ŭkrainskaha horada.
Sama linija krytyki była abranaja vierna, razvažaje krynica, blizkaja da Dziarždumy, ale paśla hetaha ŭ deputata «sarvała dach» i jon staŭ zanadta rezka vystupać suprać vajennaha kiraŭnictva. Taksama jon akazaŭsia ŭ centry skandału, kali ŭ svaim telehram-kanale zajaviŭ ab źniknieńni 1,5 młn kamplektaŭ vajskovaj formy sa składoŭ Minabarony. Paśla ŭ razmovie sa studentami Zabajkalskaha ŭniviersiteta deputat raspavioŭ, što hetaj spravaj ciapier zajmajucca pravaachoŭnyja orhany.
Deputat Zavarzin raskrytykavaŭ ideju Kadyrava pasłać svaich synoŭ u zonu bajavych dziejańniaŭ. «Kadyraŭ, viadoma, bajavy hienierał, kiraŭnik. Čačency dobra ŭ nas vajujuć, dobra staviacca da padrychtoŭki reziervistaŭ. Ale dzieci kateharyčna nie padlahajuć pryzyvu pavodle zakona, zakon z 18 hadoŭ, a mabilizujucca ciapier naohuł tyja, chto słužyŭ, maje vajskova-ŭlikovuju śpiecyjalnaść, — nahadaŭ jon. — Jany ž nie słužyli. Niachaj dzieci vučacca, rychtujucca, a toje, što čačency — bajavyja chłopcy, dobra słužać, heta adnaznačna, ja mnohich viedaju».
Pryznačanamu Dziarždumaj kaardynataram palityčnych pracesaŭ u anieksavanuju Zaparožskuju vobłaść Andreju Krasavu nie varta było vykazvacca pra zabaronu viartacca ŭ Rasiju dziejačam, jakija pakinuli krainu z pačatku mabilizacyi, ličać surazmoŭcy «Viorstki».
«Heta, pa sutnaści, zdrada intaresam našaj krainy. Dla zachavańnia dziaržavy my pavinny abaraniacca, u tym liku i ad takich katehoryj pakul jašče hramadzian RF, — kazaŭ jon. — Jany vybrali zachodni śviet, zialonyja fanciki. Chaj jany i dalej zmahajucca za intaresy tych dziaržaŭ, dzie bolš demakratyčna, na ich dumku. A RF, zhurtavaŭšysia vakoł Uładzimira Pucina, pavinna skazać «nie» hetym dziejačam. Tych, chto źjechaŭ, deputat taksama nazvaŭ «pieršymi pacukami», jakija biahuć «z karabla, jaki jašče nie tonie».
«Heta značyć, jon moža pačać tanuć? Navošta tak kazać? — ździŭlajecca surazmoŭca «Viorstki». — Jon [Krasaŭ] na dobrym rachunku, ale navošta takoje kazać».
Krynica taksama nie vyklučaje, što ŭ budučyni śpis «taksičnych» parłamientaryjaŭ moža być pašyrany.
