«Muž adhavorvaŭ chudzieć, ale, kali ŭbačyŭ źmieny, pačaŭ padtrymlivać»
Kaciarynie 25 hadoŭ. Da ciažarnaści dziaŭčyna važyła 87,7 kiłahrama pry roście 168 santymietraŭ. U radzilniu Kaciaryna išła z vahoj 101.
«Naradziła — stała važyć 95. Jana stajała ŭ mianie hod, karmiła dzicia. Nie chacieła ŭ hety pieryjad chudzieć, bo stres dla arhanizma, moža źniknuć małako», — kaža jana.
U žniŭni 2021-ha Kaciaryna pačała chudzieć. Za hod i dva miesiacy jana skinuła 25 kiłahramaŭ. Ciapier dziaŭčyna važyć 65,8.
Kaciaryna zhadvaje, što nie mahła hladzieć na siabie ŭ lusterka.
«Było ciažka hulać ź dziciem z takoj vahoj, asabliva ŭletku, — raskazvaje jana. — Vyrašyła, što chaču mianiacca dla siabie, dla dziciaci, muža — heta było majoj matyvacyjaj.
Usie svajaki, kali stała chudzieć, kazali: «Navošta heta, i tak pryhožaja», — ale ja vyrašyła, što treba. Pieršapačatkova meta była dajści da 75. Ale, kali atrymałasia pachudzieć da takoj vahi (10 miesiacaŭ dla hetaha treba było), zrazumieła, što chaču jašče.
Ciapier ja padtrymlivaju vahu. Druhi tydzień užo trymajecca na adznacy 65,8».
Tak vyhladała Kaciaryna da pachudzieńnia. Fota: asabisty archiŭ
Kaciaryna kaža, što znajšła dla siabie idealnuju sistemu dla pachudzieńnia — intervalnaje charčavańnie.
«Raniej ja vielmi časta pierakusvała. Zrabiła sabie zbałansavany pryjom ježy.
Šmat chto kaža, što na intervalnym charčavańni treba jeści dva razy, ale ja jeła try. Kali sprabavała dva, to ŭ mianie čamuści vaha nie źnižałasia, musić, byŭ stres u arhanizma.
Intervał taki: śniadanak z 10 da 11, abied z 13 da 14, viačera z 17 da 18. Pierapynki pamiž pryjomami ježy pavinny być 3-3,5 hadziny. Jeła ŭsio, što zachaču, nie vyklučała sałodkaje i mučnoje.
Naohuł ja lublu sałodkaje, i kali b była tolki na harodninie, kiefiry, to sarvałasia b vielmi chutka. Vyrašyła, što budu ŭsio sabie dazvalać u mieru, nie pierajadać pry kožnym pryjomie ježy. Maja porcyja — da 250 hramaŭ.
Na śniadanak mahu padsušyć dva tosty, namazać ich kurynym paštetam, pasmažyć dva jajki, pakłaści ich źvierchu. Taksama harodnina da hetaha ci, naprykład, kansiervavanaja kukuruza. Dadaju jakujuści słodyč. Syrok, naprykład. Vadkaść — kava ci harbata.
Vadu ja starajusia pić, ale 2 litry nie mahu. Rablu heta pa zapatrabavańni i našča, kab zapuścić straŭnik, mienš źjeści», — dzielicca jana.
Tak vyhladaje Kaciaryna ciapier. Fota: asabisty archiŭ
U Kaciaryny byŭ momant, kali vaha stajała i nie źnižałasia vielmi doŭha — try miesiacy.
«Nie mahła nijak ssunucca z 80, — kaža jana. — Čamu — nie viedaju, mahčyma, arhanizmu patrebna była paŭza. U lubym vypadku ja nie za chutkaje pachudzieńnie, tamu što jość ryzyka taho, što vaha vierniecca, kali chutka jaje zhaniać».
Kaciaryna pryznajecca, što jaje muž byŭ u šoku, kali jana pachudzieła.
«Jon adrazu adhavorvaŭ chudzieć, ale kali ŭbačyŭ źmieny, pačaŭ padtrymlivać, — raskazvaje jana. —
Pieršy čas, viadoma, było ciažka. Muž viačeraje bližej da 20:00, a ŭ mianie apošni pryjom ježy byŭ z 17 da 18. Sychodziła ŭ inšy pakoj, kab nie bačyć, jak jon jeść. Ale ja zmahła, strymałasia.
Žadańnie schudnieć u mianie było bolš za žadańnie pajeści na noč».
Hałoŭnaje padčas intervalnaha charčavańnia sytna śniedać.
«Raniej ja mahła ŭvohule nie śniedać, nie lubiła heta, — tłumačyć Kaciaryna. — Najadałasia na abied, potym byli pierakusy, viačera sytnaja, paśla jašče pajeści na noč chaciełasia. Kali stała siabie pryvučać da sytnaha śniadanka, ubačyła, što ŭ druhuju pałovu dnia źjadaju našmat mienš».
Kaciaryna zapeŭnivaje, što jeści «zabaronienuju» ježu i adnačasova stračvać vahu mahčyma.
«Kałoryi nie ličyła, tolki hramoŭki. Bo kožny pryjom ježy da 250 hramaŭ, to ŭ lubym vypadku jość deficyt kałoryj», — raskazvaje jana.
Pry hetym sportam Kaciaryna nie zajmałasia. Joj nie było z kim pakinuć małoje dzicia. «Vychodziła prosta ź im hulać na vulicu. Ad 10 da 15 tysiač krokaŭ za dzień prachodziła.
Kali było drennaje nadvorje, to ja rabiła chadu ci bieh kala doma na praciahu hadziny.
Jašče ź pieršaha dnia, kali pačała chudzieć, zapisałasia na kursy antycelulitnaha masažu. Razumieła, što budu chudzieć — pačnie visnuć skura. Ja doma sama sabie rabiła vakuum žyvata. Tam jość peŭnyja supraćpakazańni, ale ja paraiłasia z doktaram, i mnie skazali, što možna.
Za 14 miesiacaŭ ja prajšła try kursy: pieršy — 10 sieansaŭ, druhi — 5, treci — 10. Vielmi dobra padciahvajecca skura, ale vaha z-za takoha masažu nie sychodzić. Heta dziejničaje tolki na skuru», — raskazvaje jana.
Kali Kaciaryna chudzieła, jana ŭjaŭlała, jak budzie vyhladać, kali stracić vahu. Heta jaje matyvavała.
«Žadańnie pachudzieć pavinna być bolšym, čym pajeści na noč. Važna pamiatać, što, navat pierajšoŭšy na peŭnuju sistemu charčavańnia, možna atrymlivać asałodu ad ježy», — kaža jana.
«Kali pachudzieŭ, znajomyja stali zajzdrościć»
Alaksandru 36 hadoŭ. Jon važyŭ 124,5 kiłahrama pry roście 182 santymietry. Chudzieŭ mužčyna ź siaredziny maja pa pačatak vieraśnia hetaha hoda z dapamohaj dyjetołaha.
«Vyrašyŭ chudzieć, bo na fatahrafijach sabie zusim nie padabaŭsia. Vialiki žyvot byŭ.
Dla dyjetołaha treba było pamierać žyvot, taliju, hrudzi, ściahno i adpravić takija zamiery. Jon pa ich vyličvaŭ, kolki za dzień ty pavinien spažyvać kałoryj, białkoŭ, tłuščaŭ, vuhlavodaŭ.
Akazałasia, što ja raniej spažyvaŭ vielmi šmat vuhlavodaŭ, a niedajadaŭ białkoŭ. Prosta staŭ bolš jeści miasa, a pierastaŭ, naprykład, pielmieni. Za pieršy tydzień schudnieŭ na 5 kiłahramaŭ, syšła azyzłaść.
Jašče dyjetołah raiŭ chadzić nie mienš za 10 tysiač krokaŭ na dzień», — kaža jon.
Usio, što Alaksandr źjadaŭ za dzień, jon zapisvaŭ u mabilny dadatak dla pachudzieńnia FatSecret, jaki sam raźličvaŭ kałoryi.
«Pieršapačatkova mnie možna było za dzień 2500 kałoryj, abmiežavańniaŭ pa časie, kali prymać ježu, nie było. Ja navat unačy jeŭ, kali bačyŭ, što ŭ mianie jašče zastajucca kałoryi, jakija ja nie dabraŭ za dzień.
Fota: dzen.ru
Kali ličyć u hramach, dyk za dzień vielmi šmat moh źjeści, naprykład, kurynaj hrudki 500 hramaŭ. A harodninu ŭvohule kiłahramami, tamu što, naprykład, u adnym ahurku ŭsiaho tolki try hramy vuhlavodaŭ», — kaža jon.
U Alaksandra byŭ pieryjad, kali vaha doŭhi čas nie źnižałasia. Tady jon «padrazaŭ» kałoryi.
«Spačatku ŭ mianie było 170 hramaŭ białku, 220 hramaŭ vuhlavodaŭ, 110 tłušču — 2500 kałoryj. Druhoje padrazańnie — 2200 kałoryj, pamienšylisia vuhlavody da 170, białok zastaŭsia takim ža, tłušč — 100. Ciapier u mianie treciaje padrazańnie było — 2000 kałoryj. Chaču ŭsio ž pachudzieć da 95 kiłahramaŭ.
Ale ŭ mianie vielmi maleńkaja aktyŭnaść, uvieś čas za rulom. Pozna ŭviečary pryjazdžaju dadomu — idu na vulicu nachodžvać kroki. Vielmi dobra ŭpłyvaje, śpiš našmat lepš.
Biehać dyjetołah nie raiŭ, bo heta nahruzka na sustavy», — raskazvaje jon.
Samy vialiki pryjom ježy ŭ Alaksandra byŭ viečaram.
«Śniadanak — 600 kałoryj, stolki ž abied, viačera — 1000—1200. Admoviŭsia tolki ad cukru, staŭ dadavać u harbatu zamieńnik, prybraŭ z racyjonu chleb, syravendžanyja kaŭbasy, haziroŭki. Bolš jeŭ sadaviny, mienš sałodkaha.
Kali pachudzieŭ, znajomyja stali zajzdrościć. U mianie takaja kampanija siabroŭ, što im u subotu abaviazkova treba było schadzić vypić. A tut ja pierastaŭ ź imi pić, tamu što ałkahol nie varta ŭžyvać padčas pachudzieńnia, zastojvajecca vadkaść u arhaniźmie, dyk jany stali ličyć mianie za durnia. A ciapier, kali pabačyli vynik, dva maje znajomyja pačali chudzieć, na mianie nahladzielisia».
Alaksandr kaža, što hałoŭnaje dla dasiahnieńnia vyniku ŭ pachudzieńni — siła voli, matyvacyja.
«Mnie nie chaciełasia pamierci ad jakoha-niebudź krovaźlićcia ci insultu. Žyćcio adno, i cieła taksama. Chaciełasia sabie padabacca».
«Vaha pajšła ŭniz, kali ja dadaŭ bieh, kardyjonahruzki»
Alaksieju 39 hadoŭ. Pačaŭ chudzieć mužčyna ŭ 2018-m i skončyŭ viasnoj 2020 hoda. Jon važyŭ 120 kiłahramaŭ pry roście 172, a staŭ — 86.
«Trapiłasia kniha Jarasłava Bryna «Mianiaju tłušč na siłu voli». Pačytaŭ jaje i vyrašyŭ, što treba chudzieć, bo ŭžo advaročvaŭsia ad lusterak.
Nabirać vahu ŭvohule staŭ u 8—9 kłasie. U 2001 hodzie pajšoŭ u vojska z vahoj 83. Adtul viarnuŭsia — 67. A paśla znoŭ najeŭ jašče bolš, čym było», — kaža jon.
Pačynaŭ Alaksiej z dyjety, a potym dadaŭ spartyŭnuju zału, staŭ zajmacca z trenieram.
«U zału chadziŭ try razy na tydzień. Potym dadaŭ bieh 5—8 kiłamietraŭ — dva razy na tydzień. Abmiažoŭvaŭ chutkija vuhlavody: bułki, chleb, makarony, cukar.
Ustaloŭvaŭ sabie prykładańnie FatSecret na telefon. Tudy zapisvaŭ, što źjadaŭ, i jano ličyła kałoryi. Karystaŭsia prahramaj paŭtara hoda, potym užo sam viedaŭ, kolki čaho mahu źjeści. Hałoŭnaje — spalvać kałoryj bolš, čym jasi», — tłumačyć jon.
Fota: keeprun.ru
Pieršyja 20—25 kiłahramaŭ u Alaksieja syšli vielmi chutka. Jon kaža, što sahnaŭ ich za dva-try miesiacy.
«Ale potym arhanizm pryvykaje i pačynajecca praca, hałoŭnaje — nie zabić, — ličyć jon. — Vaha pajšła ŭniz, kali ja dadaŭ bieh, kardyjonahruzki. Kali zajmaješsia siłavymi treniroŭkami, vaha tak nie sychodzić. Ale kali prosta treba skinuć, biez pracy z myšcami, to chopić biehu čatyry razy na tydzień».
Zryvy ŭ Alaksieja byli, ale nie vielmi surjoznyja. Naprykład, jon moh pajści ź dziećmi pajeści picy.
«Na noč jeści chaciełasia, ale pa majoj mietodycy było ŭsio roŭna, u jaki čas jeści. Hałoŭnaje, kab paliŭ kałoryj bolš, čym źjeŭ.
Ja nie pakutavaŭ ad taho, što ja nie jem. Na noč moh kiefiru prosta papić ci sałatu źjeści, kali vielmi chaciełasia.
Padtrymki ŭ mianie nie było ni ad koha. Znajomyja pytalisia, navošta ja chudzieju, ale ja byŭ da takoha hatovy.
Dla mianie heta kłasnaja praca nad saboj, i ad hetaha treba kajfavać. Šmat u zale bačyŭ ludziej, jakija tudy chadzili, bo prosta treba. Ale tak nie pracuje. Ciapier u mianie praca pastajannaja za styrnom, vielmi nie chapaje zały, sportu, znoŭ nabraŭ vahu», — kaža jon.
Matyvacyjaj, kab pačać chudzieć, dla Alaksieja byli jaho dzieci. Jamu chaciełasia, kab jany hanarylisia im.
«U 2005-m kinuŭ palić za adzin dzień. Zachaciełasia niešta sabie dakazać. Tut ja taksama niešta pra heta ŭspomniŭ i vyrašyŭ, što treba.
Heta navat nie pieramoha nad saboj była, a damova z saboj — mianiajem ład žyćcia. Mienavita jon mianie zadavalniaje ciapier. Było kajfova pajechać u subotu na treniroŭku. Ciapier hetaha nie chapaje z-za pracy».
Čytajcie taksama:
Piać paradaŭ, jak pavysić samaacenku i stać bolš upeŭnienym
Adkul źjaŭlajecca strach rodaŭ i jak jaho pieraadoleć? Hutarym ź pierynatalnym psichołaham
Što takoje dash-dyjeta, jakuju ličać najlepšaj dla hipiertonikaŭ, chacia nasamreč jana abaviazkovaja dla ŭsich. Adkazvaje doktar Kamaroŭski
prymusovaha pryniacca "čaroŭnych" preparataŭ - "vitaminak" - jak jany nazyvali ich...
paśla čaho nie tolki cieła, a i psichiku ŭznavić składana