Sudovy praces budzie vieści sudździa Anžalika Daniłava, paviedamlaje «Viasna».
U čym abvinavačvajuć Mielnika?
Śledstva kančatkova vystaviła abvinavačańnie pa piaci artykułach:
- č. 4 art. 309 — naŭmysnaje pryviadzieńnie ŭ nieprydatnaść transpartnaha srodku abo šlachoŭ znosin;
- č. 2 art. 295 — niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ;
- č. 1 art. 368 — abraza prezidenta Respubliki Biełaruś;
- č. 3 art. 295 — niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ, ździeśnienyja hrupaj asob, albo paŭtorna;
- č. 1 art. 289 — akt teraryzmu.
Pa sukupnaści pakarańniaŭ pa pradjaŭlenych abvinavačańniach jamu moža pahražać źniavoleńnie ad 10 da 20 hod.
Što paviedamlaje prakuratura?
Kryminalnaja sprava znachodziłasia ŭ vytvorčaści Śledčaha kamiteta, jaki ŭstanaviŭ, što 40-hadovy Vital Mielnik u sakaviku 2022 hoda na čyhunačnym pierahonie Navasady — Barysaŭ padpaliŭ relejnuju šafu śviatłafora aŭtamatyčnaj błakiroŭki, čym vyvieŭ sa stroju sistemu sihnalizacyi čyhunki. Supraćpraŭnyja dziejańni nibyta stvaryli realnuju pahrozu ciažkich nastupstvaŭ u vyhladzie avaryi, paškodžańnia ruchomaha sastavu, hibieli albo traŭmavańnia ludziej.
U chodzie papiaredniaha śledstva ŭstanoŭlena dačynieńnie abvinavačvanaha da ŭčynieńnia inšych złačynstvaŭ.
Tak, pa infarmacyi prakuratury, u aŭtamabili i pa miescy žycharstva mužčyny była znojdziena niezarehistravanaja ahniastrelnaja zbroja (pistalety). U sacyjalnych sietkach jon nieadnarazova publična abražaŭ Prezidenta Respubliki Biełaruś.
Pry zatrymańni fihuranta supracoŭniki orhanaŭ unutranych spraŭ abhruntavana ŭžyli ahniastrelnuju zbroju — vystralili pa jaho nižnich kaniečnaściach, pakolki była realnaja pahroza ŭzbrojenaha supracivu.
Momant zatrymańnia Mielnika
Padrabiaznaściaŭ pa spravie pakul niebahata
Viadoma, što mužčyna žyvie ŭ vioscy Chadakova Minskaha rajona, u jaho jość maleńkaje dzicia. Siamja ličyć, što Vital nie maje dačynieńnia da pradjaŭlenych artykułaŭ i źviazvaje jaho zatrymańnie z pomstaj miascovaha sudździ, a taksama z tym, što raniej u Vitala była sudzimaść.
Inšyja padrabiaznaści spravy pakul nieviadomyja. Sud budzie prachodzić u zakrytym režymie.
Doŭhi čas pravaabaroncam nie było viadoma, dzie ŭtrymlivajuć Mielnika. Paźniej ustanoŭlena, što abvinavačany znachodzicca ŭ SIZA №1 na Vaładarskaha. Pierasoŭvajecca na mylicach.
