Handlovy kompleks haryć pa ŭsioj płoščy, i płošča pažaru składaje 18 tys. kvadratnych mietraŭ. Jamu prysvojena čaćviortaja katehoryja składanaści, adna z samych vysokich.
Kala 8:30 pa maskoŭskim časie ekstrannyja słužby zajavili žurnalistam, što pažar byŭ łakalizavany na płoščy 7 tys. kvadratnych mietraŭ.
Pradstaŭnik MNS skazaŭ Interfaksu, što zahareŭsia dach hipiermarkieta «OBI». Supracoŭniki ekstrannych słužbaŭ skazali TASS, što ŭ «OBI» adbyŭsia vybuch, paśla jakoha pačałosia abvalvańnie kanstrukcyj.
Paviedamlajecca ab hibieli prynamsi adnaho čałavieka. «Pa papiarednich danych, zahinuŭ jak minimum adzin čałaviek. Mužčyna, mahčyma, achoŭnik. Jaho cieła vyjaŭlena pry praviadzieńni raźviedki», — cytuje Interfaks supracoŭnikaŭ ekstrannych słužbaŭ.
MNS maje namier pryciahnuć da tušeńnia pažaru avijacyju. Na dapamohu prybyli pažarnyja z Maskvy.
Na videa, jakija publikujucca ŭ telehram-kanałach, vidać zaryva i słupy dymu nad handlovym centram.
Akramia taho, čutnyja i bačnyja dastatkova mahutnyja vybuchi. Pavodle źviestak ekstrannych słužbaŭ, na jakija spasyłajucca rasijskija infarmahienctvy, u adździele budmateryjałaŭ vybuchajuć aerazoli i banki z farbaj.
Supracoŭniki ekstrannych słužbaŭ skazali Interfaksu, što ŭ liku mierkavanych viersij jość i padpał. «Razhladajucca roznyja viersii, uklučajučy techničnyja — karotkaje zamykańnie ŭ eletrasietcy. Taksama dapuskajucca naŭmysnyja dziejańni, heta značyć, padpał», — cytuje ahienctva svaju krynicu.
Karespandenty TASS pieradajuć takija słovy nienazvanaha pradstaŭnika ekstrannych słužbaŭ: «Asnoŭnaja viersija pažaru — karotkaje zamykańnie. Uzharańnie ŭźnikła ŭ kramie «OBI». Pryčynaj vialikaha raspaŭsiudu ahniu staŭ vybuch». Pry hetym surazmoŭca ahienctva RIA Naviny nazvaŭ asnoŭnaj viersijaj padpał.
