Pierviez Mušaraf. Fota: AP Photo/B.K.Bangash, File
79-hadovy Mušaraf pamior ad amiłaidozu — zachvorvańnia, pry jakim u arhaniźmie adbyvajecca zboj abmienu rečyvaŭ.
Pierviez Mušaraf byŭ kadravym vajskoŭcam, u 1990-ja staŭ hałoŭnakamandujučym pakistanskaj armijaj. 12 kastryčnika 1999 hoda hienierał ździejśniŭ biaskroŭny dziaržaŭny pieravarot, adchiliŭ ad ułady premjer-ministra Navaza Šaryfa, uvioŭ nadzvyčajnaje stanovišča, raspuściŭ parłamient, prypyniŭ dziejańnie Kanstytucyi.
Paśla taho Mušaraf byŭ abvieščany kiraŭnikom vykanaŭčaj ułady Pakistana, a ŭ červieni 2001 hoda pryniaŭ paŭnamoctvy prezidenta, nie admaŭlajučysia pry hetym i ad kamandavańnia armijaj, što supiarečyła Kanstytucyi krainy.
Va ŭładzie Mušaraf znachodziŭsia da 2008 hoda, kali musiŭ syści ŭ adstaŭku pad pahrozaj impičmientu. Paśla taho jon emihravaŭ u Vialikabrytaniju. Suprać jaho byli zaviedzienyja kryminalnyja spravy za šmatlikija złoŭžyvańni padčas kiravańnia, taksama jon abvinavačvaŭsia ŭ datyčnaści da zabojstva byłoj premjerki Bienazir Bchuta.
U sakaviku 2013 hoda Mušaraf viarnuŭsia ŭ Pakistan, vypłaciŭšy pryznačany sudom zakład, ale ŭžo ŭ krasaviku byŭ źmieščany ŭ turmu, abvinavačany ŭ dziaržaŭnaj zdradzie. U sakaviku 2016 hoda sud dazvoliŭ Mušarafu źjechać za miažu na lačeńnie, paśla čaho eks-prezident pakinuŭ Pakistan i vylecieŭ u AAE. Z taho času jon znachodziŭsia ŭ Dubai, dzie, pa viersii śledstva, chavaŭsia ad pravasuddzia ŭ suviazi z vystaŭlenymi jamu abvinavačvańniami ŭ kryminalnych złačynstvach.
U kancy 2019 hoda Mušarafa na radzimie navat zavočna asudzili da śmiarotnaha pakarańnia, ale paśla hety prysud byŭ admienieny jak niekanstytucyjny.
