Dom pa vulicy Marksa, 36 byŭ pabudavany na miescy razburanaha ŭ hady vajny budynka. Pačałosia jaho budaŭnictva ŭ 1951 hodzie, a zaviaršyłasia — u 1953-m. Architektaram doma ŭ styli «saviecki nieakłasicyzm» vystupiŭ Aviel Brehman.
Zdali budynak da śviata 7 Listapada. Cikava, što dva padjezdy ŭzvodziŭ za ŭłasnyja hrošy Litfond, jašče adzin padjezd apłaciŭ Minharsaviet. U hetym domie z 1953 pa 1971 hady žyŭ aŭtar znakamitych «Paleskich rabinzonaŭ» Janka Maŭr.
Taksama na budynku možna ŭbačyć miemaryjalnyja doški ŭ honar paeta Piatra Hlebki, narodnaha piśmieńnika Uładzimira Karatkieviča, jaki napisaŭ tut svoj raman «Čorny zamak Alšanski», i inšych viadomych dziejačaŭ kultury. Viadoma, što ŭ rozny čas pad hetym dacham pražyvali litaratary Ivan Mielež i Ivan Šamiakin, Vasil Vitka i Pilip Piestrak, Nił Hilevič i Uładzimir Niaklajeŭ, narodny artyst BSSR Mikałaj Aładaŭ i dyrektar Nacyjanalnaha mastackaha muzieja Biełarusi ŭ 1944—1977 hadach Alena Aładava.
Pieršapačatkova ŭ kvaterach stajali piečki, ale ŭ pačatku 1960-ch hadoŭ u dom praviali haz.
Budynak krychu źmianiŭsia ŭ 1990-m hodzie — tady tarec «ManaŁITa» pierabudavali, zrabiŭšy ŭ im uvachod u mietro «Kupałaŭskaja». U 2021 hodzie ŭ domie byŭ praviedzieny kapramont z zamienaj usich kamunikacyj. Siońnia dom zjaŭlajecca pomnikam architekturna-kulturnaj spadčyny.
Darečy, pavodle infarmacyi sajta PlanetaBelarus.by, da revalucyi na hetym miescy znachodziłasia pieršaja ŭ Minsku płatnaja aŭtastajanka (jak siońnia skazali b, parkinh), a pieršaja stajanka taksi ŭźnikła ŭ 1912 hodzie niepadalok, kala paradnaha ŭvachoda ŭ Alaksandraŭski skvier.
Kolki tut kaštujuć kvatery?
Ciapier u stalincy pradajucca adrazu čatyry kvatery.
Samy ekanamičny varyjant — adnapakajoŭka płoščaj 36 kvadratnych mietraŭ. Jak skazana ŭ abjavie, «kvatera paśla kapitalnaha ramontu, meblavanaja, z vydatnym vidam na teatr im. Ja. Kupały i Administracyju Łukašenki, maje vydatny kamiercyjny patencyjał». Košt adnapakajovaj kvatery — 99 tysiač dalaraŭ.
Taksama tut prapanujecca dvuchpakajoŭka płoščaj 56 kvadratnych mietraŭ. Kvatera z ramontam, meblaj i technikaj pradajecca za 167,5 tysiačy dalaraŭ. «Vydatnaje ŭkładańnie hrošaj pad haściavy biznes», — śćviardžajecca ŭ abjavie.
Jašče adzin varyjant — trochpakajovaja kvatera na trecim paviersie. Płošča žylla — 77 kvadratnych mietraŭ. Tut zrobleny novy jakasny ramont z uzakonienaj pierapłaniroŭkaj. Vokny kvatery vychodziać na dva baki doma: častka ź ich hladzić na teatr z Alaksandraŭskim skvieram, častka — na cichi dvor. Košt hetaj kvatery — 218 tysiač dalaraŭ.
Samaja šykoŭnaja prapanova — trochpakajovaja kvatera na čaćviortym paviersie.
U hetaj kvatery praduhledžana ŭsio dla kamfortnaha pražyvańnia: ubudavanaja sistema prytokava-vyciažnoj vientylacyi Zehner, naturalnaja parkietnaja doška Bauwek (Šviejcaryja), dvuchkamiernyja draŭlanyja škłopakiety, padłohi z padahrevam, kuchnia Sachsen Kuechen (Porta-Porta) z ubudavanaj bytavoj technikaj Smeg i šmat čaho jašče. Adznačajecca, što ŭsia praca pravodziłasia pad kantrolem dyzajn-studyi Nota Bene ŭ asobie jaho art-dyrektara i dyzajniera Maksima Maksimienki. Košt hetaj kvatery — 250 tysiač dalaraŭ.
