Adzin z francuzkich advakataŭ słynnaha kinarežysiora Ramana Pałanskaha paviedamiŭ, što ŭčora padaŭ prośbu ab vyzvaleńni 76-hadovaha kinarežysiora pad zakład. Aficyjnaja prośba ŭklučaje taksama paručalnictva, što Pałanski nie budzie ŭchilacca ad suda.
Aŭtar stužak «Dzicia Razmary» i «Pijanist» byŭ zatrymany šviejcarskaj palicyjaj pry kancy vieraśnia, kali pryjechaŭ atrymać režysiorski pryz na ciurychskim kinafeście. Nahadajem, u 1977 hodzie Ramana Pałanskaha abvinavacili za zhvałtavańnie 13 hadovaj dziaŭčyny ŭ domie, jaki naležaŭ Džeku Nikałsanu. Pałanski častkova pryznaŭ vinu, ale nieŭzabavie ŭciok z ZŠA ŭ Brytaniju, a potym, kab paźbiehnuć vysyłki, u Francyju.
Na minułym tydni sud u Šviejcaryi ŭžo adchiliŭ prośbu ab vyzvaleńni Pałanskaha, arhumientujučy heta tym, što jon moža ŭciačy. Ciapier Pałanski ŭ šviejcarskaj turmie čakaje pastanovy ab vydačy jaho amierykanskaj palicyi.
