Vyjava: vecteezy
Streptakokavy farynhit (anhina), vyklikany bakteryjaj, viadomaj jak A Streptococcus, ujaŭlaje saboj infiekcyju zadniaj ścienki hłotki (uklučajučy mindaliny) ź vielmi niepryjemnymi simptomami: tempieratura, mocny bol u horle, pačyrvanieńnie mindalin i pavieličeńnie limfatyčnych vuzłoŭ u rajonie šyi. Taksama moža baleć hałava, moža być młosna. Simptomy zvyčajna źjaŭlajucca praz adzin-try dni paśla zaražeńnia i praciahvajucca ad 7 da 10 dzion.
Pakul ludzi masava nasili maski i zaścierahalisia padčas pandemii Covid, nizkaj trymałasia i kolkaść vypadkaŭ inšych infiekcyjnych zachvorvańniaŭ va ŭsim śviecie. Ale ciapier mnohija ź ich viartajucca. Tak, u ZŠA za apošnija dva hady streptakokavy farynhit vyjšaŭ na ŭzrovień, vyšejšy za dapandemičnyja pakazčyki, paviedamlaje amierykanski Centr pa kantroli zachvorvańniaŭ (CDC).
I hety ŭsplosk vypadkaŭ streptakokavych infiekcyj supadaje z deficytam adnaho ź lekaŭ, jaki čaściej za ŭsio vykarystoŭvajecca dla lačeńnia padobnych infiekcyj, asabliva ŭ dziaciej. Pa danych CDC, pa ŭsioj krainie najbolšy ŭstojlivy rost kolkaści samych ciažkich streptakokavych infiekcyj (viadomych jak invaziŭnyja streptakokavyja infiekcyi hrupy A) nazirajecca mienavita ŭ dziaciej. Jany najbolš paciarpieli ad pastajannaha deficytu antybijotykaŭ.
Gizmodo raspaviadaje, što z kastryčnika 2022 hoda ŭ ZŠA nazirajecca deficyt amaksicylinu ŭ formie siropu, jaki čaściej za ŭsio vykarystoŭvajuć dla lačeńnia streptakokavych infiekcyj u dziaciej. Bolšaść farmaceŭtyčnych kampanij, jakija vyrablajuć hety preparat, nazvali «pavieličeńnie popytu» jak pryčynu jaho abmiežavanaj dastupnaści. Pry płanavańni vytvorčaści kampanii časta abapirajucca na danyja ab prodažach u minułyja hady. Takim čynam, mnohija farmaceŭtyčnyja vytvorcy pamylilisia, vykarystoŭvajučy hady pandemii ŭ jakaści danych dla płanavańnia.
Kab paźbiahać anhin, treba vykonvać praviły indyvidualnaj hihijeny:
- karystacca tolki indyvidualnym posudam, butelkaj ź pitnoj vadoj;
- minimizavać kantakty z chvorymi na vostryja reśpiratornyja zachvorvańni;
- čaściej myć ruki;
- dezynfikavać ruki śpiecyjalnymi srodkami, kali niama ŭmoŭ dla ich myćcia vadoj z myłam;
- nie kuryć;
- nie pieramiarzać;
- zajmacca sportam abo davać sabie inšyja fizičnyja nahruzki.
Tolki na asabistym prykładzie možna navučyć dziaciej hetym prostym praviłam i zrabić ich zvyčkaj dla ŭsioj siamji.
Čytajcie taksama:
Čałaviectva staić na miažy najsurjoźniejšaha antybijatyčnaha kryzisu, papiaredžvaje SAAZ
Jak miljardy mikraarhanizmaŭ u kišečniku mohuć umacavać vaša psichičnaje zdaroŭje
