Havorka idzie pra tavary karejskaha vytvorcy Beauugreen. «Maska-patč dla pruhkaści jahadzic» pradavałasia na źnižcy pa 7,79 rubla (bieź źnižki 12,99 rubla), varyjant dla pruhkaści biusta — za tyja ž 7,79 rubla na źnižcy. Była taksama maska ŭ vyhladzie mužčynskaj barady — jaje treba padviešvać za vušy dla nadańnia pruhkaści padbarodku.
Naohuł, maski dla hrudziej i jahadzic pradajucca ŭžo daŭno, chiba što raniej ich treba było zakazvać u internecie abo šukać u śpiecyjalizavanych kramach karejskaj kaśmietyki. Mabyć, heta pieršy raz, kali niezvyčajnyja patčy možna kupić u sietcy afłajn-kram, jakija pracujuć, napeŭna, u kožnym horadzie Biełarusi.
U abodvuch varyjantach vytvorca abiacaje efiekt puš-ap.
Maska-patč dla biusta, pa idei, nadaje jamu pruhkaść, umacoŭvaje i padciahvaje, aktyŭna ŭvilhatniaje i siłkuje, robić skuru hrudziej ełastyčnaj.
A inšaja maska pavinna nadavać pruhkaść jahadzicam i padciahvać ich.
Lapić hetyja maski treba na 15-20 chvilin.
Pa słovach dermatołaha, da jakoha źviarnuŭsia pa kamientaryj «Anłajnier», takija patčy časam možna vykarystoŭvać — jany padsiłkujuć i ŭvilhatniać skuru. Ale ŭsio ž nie varta raźličvać na padciahnutyja hrudzi i jahadzicy, jak abiacaje rekłama.
Za pruhkaść i padciahnutaść adkazvajuć kałahien i ełaścin. Na heta ŭpłyvajuć uzrost, ład žyćcia čałavieka, fizičnaja aktyŭnaść, pitny režym, vaha, charčavańnie — u pryvatnaści, złoŭžyvańnie vysokakałaryjnymi praduktami i fastfudam. Važny harmanalny fon.
Hetyja patčy možna vykarystoŭvać dla tvaru, ale, pa słovach kaśmietołaha, tolki kali skarystać ich za raz całkam. Bo zachoŭvać ich va ŭžo adkrytaj upakoŭcy nie rekamiendujecca — tam budzie razmnažacca patahiennaja mikrafłora.
