Suśvietnaja arhanizacyja achovy zdaroŭja nazvała Biełaruś siarod krain, najbolš zakranutych epidemijaj śvinoha hrypu, i raić daktaram jak maha chutčej užyvać u lačeńni antyvirusnyja preparaty, kab praduchilić śmiarotnyja vypadki.
Arhanizacyja, jakaja ŭvachodzić u strukturu AAN, zajaviła, što dasyłaje antyvirusnyja preparaty ŭ raźvivanyja krainy, najbolš zakranutyja śvinym hrypam — Azierbajdžan, Aŭhanistan, Biełaruś, Kirhiziju, Manholiju i Ukrainu.
Raniej Suśvietnaja arhanizacyja achovy zdaroŭja raiła čakać vynikaŭ analizaŭ pierš čym davać pacyjentam mocnyja antyvirusnyja preparaty. Ale ciapier śpiecyjalisty arhanizacyi kažuć,
što zatrymka ŭ čakańni vynikaŭ analizaŭ moža pryvieści da śmierci chvorych, asabliva tych, chto ŭvachodzić u hrupu ryzyki
— ciažarnych žančyn, dziaciej da 2 hadoŭ i ludziej z prablemami dychańnia.
Śpiecyjalisty SAAZ spasyłajucca na paviedamleńni daktaroŭ z rehijonaŭ zakranutych epidemijaj, što virus vyklikaje ŭ niekatorych pacyjentaŭ vielmi rezkaje paharšeńnie — zvyčajna praź piać ci šeć dzion paśla pieršych simptomaŭ. Pry hetym časta pačynajecca virusnaja pnieŭmanija, jakaja źniščaje lohkija i nie lečycca antybijotykami.
Miedyki, adnak, nie rajać užyvać antyvirusnyja preparaty ludziam, jakija nie ŭvachodziać u hrupu ryzyki i majuć simptomy zvyčajnaj prastudy, a taksama zdarovym ludziam u jakaści prafiłaktyki.
Doktar Niki Šyndo, jakaja pracuje ŭ prahramie suprać hrypu, skazała žurnalistam u Ženievie:
«My taksama rekamiendujem, kab decentralizavali raźmierkavańnie antyvirusnych preparataŭ i harantavali, kab zvyčajnyja daktary mieli dostup da hetych lekaŭ dla svaich pacyjentaŭ. Pacyjenty nie pavinny naviedvać špital dla taho, kab atrymać recept na antyvirusny preparat».
