Na minułym tydni ŭ internecie źjaviŭsia adkryty list amatara opiernaha mastactva, historyka Siarhieja Rusieckaha da ministra kultury Biełarusi Paŭła Łatuški. Aŭtar zasiarodžvaje ŭvahu na prablemach u Nacyjanalnym akademičnym Vialikim teatry opiery i baleta. Siarhiej Rusiecki adkazvaje na pytańni NN.
Siarhiej Rusiecki
«Naša Niva»: Čamu vyrašyli napisać list adrazu ministru kultury, a nie kiraŭnictvu teatra?
Siarhiej Rusiecki: Zaraz modna źviartacca da Paŭła Łatuški i ŭskładać na jaho vialikija spadziavańni. A sistema takaja, što kali ja źviartajusia da ministra, to Nacyjanalny akademičny Vialiki teatr opiery i baleta taksama atrymaje hety list. Ja rehularna źviartaŭsia i naŭprost da kiraŭnictva teatra. Tam zaŭsiody išli na kantakt. Drobnyja pytańni navat vyrašalisia. Ale nie dumaju, što heta realna mahło ŭpłyvać na raźvićcio padziej u hłabalnym płanie.
«NN»: Adkazu na vaš list jašče nie było?
SR: Pakul nie. Ale viedaju, što list užo trapiŭ ŭ teatr. Jon mieŭ peŭny rezanans. Jaho navat pierakłali na ruskuju movu, kab lepiej zrazumieć. Spadziajusia, što pierakłali biez kupiur.
«NN»: Vy akreślili siem hałoŭnych prablem u teatry.
SR: Nasamreč ich bolej. Padkreślu, što havorka idzie tolki pra opieru, balet ja nie zakranaju. Kali koratka, to heta prablema hałoŭnaha dyryžora. U teatry jon jość. Heta Viktar Płaskina. Ale ci źjaŭlajecca jon pryznanym muzyčnym lideram, aŭtarytetam, kampietentnym śpiecyjalistam? Dla mianie heta vialikaje pytańnie. Prablema ŭ adsutnaści biełaruskaści ŭ teatry. Prablema repiertuaru, jaki nievierahodna zvuziŭsia. Ceny, prysvajeńnia hanarovych zvańniaŭ. Tuzin prablem, vyklikanych kapitalnym ramontam. Pahoršyłasia akustyka, źjavilisia niazručnyja miescy, ź jakich amal ničoha nie vidać. Raniej takoha nie było. Čamu heta adbyłosia? Čamu pałova zały pavinna znachodzicca ŭ niekamfortnych umovach?
«NN»: U liście vy nazyvajecie kanretnaje proźvišča – Viktar Płaskina. Ci nie źjaŭlajecca heta źviadzieńniem niejkich ułasnych rachunkaŭ ź im?
SR: U mianie, zvyčajnaha hledača, niama nijakich ułasnych rachunkaŭ z Płaskinam. Ja absalutna nie zaanhažavany ni ŭ teatralnyja, ni muzyčnyja hrupoŭki. I heta daje mnie prava havaryć toje, pra što dumaju. Čutki, viadoma, chodziać roznyja. Ale kali ja abvinavačvaju dyryžora Płaskinu, to ŭ kankretnych rečach, jakija moža acanić hladač: u sarvanych śpiektaklach, niepavazie da publiki. Napačatku mnie navat padabaŭsia hety dyryžor. Jon šmat ekśpierymientavaŭ, časam dasiahaŭ cikavaha hučańnia arkiestra. Ale ŭ opiernym dyryžyravańni ŭ dalejšym jon pakazaŭ svaju niekampietentnaść. Mahčyma, ja pamylajusia ŭ svaich davoli rezkich napadach na čałavieka. Ale heta kryk adčaju.
«NN»: Ci nie sprabavali pryciahnuć da padpisańnia lista ludziej z teatra?
SR: Heta niemahčyma. Nichto nie advažyŭsia b. Ale hety zvarot, ja mahu havaryć z poŭnaj upeŭnienaściu, čakany ŭ samim teatry. Tam čakajuć vonkavych impulsaŭ. Ja ni z kim nie ŭzhadniaŭ svaich dziejańniaŭ, ale padtrymku mnie vykazali ludzi z teatra, z kansiervatoryi. Pisali, telefanavali. Sam nie čakaŭ. Vidać, nabaleła im.
Moj zvarot źjaŭlajecca adnym z šerahu zvarotaŭ hledačoŭ. Da mianie byŭ napisany adzin, rychtujecca čarhovy. Heta pačatak svojeasablivaj kampanii. Aŭtarka pieršaha lista taksama staviła pytańnie nakont Viktara Płaskiny. Ale ŭ adkazach ź Ministerstva kultury i z teatra heta pytańnie praihnaravali. Chacia pa inšych punktach dali tłumačeńni. I navat vyrašyli toje-sioje. Dazvolili, naprykład, hledačam vynosić kvietki na scenu.
«NN»: Kali listavańnie ź Ministerstvam kultury nie pryniasie nijakich vynikaŭ, što budziecie dalej pradprymać?
SR: Spadziajusia, što vynik budzie. Užo jość rezanans. Treba razumieć, što my, hledačy, lubim teatr. Tamu ličym nieabchodnym demanstravać svaju pazicyju, svaju zakłapočanaść, padkazvać niejkija šlachi, pravakavać dyskusiju, pošuk. My razumiejem, što ŭ niečym možam nie mieć racyju. Heta ž pohlad hledača. Ale my chočam upłyvać na žyćcio teatra.
