Fota tut i dalej: Catholic.by
Ranicaj duchavienstva i vierniki z usich parafij biełaruskaj stalicy sabralisia kala kaścioła Najśviaciejšaj Trojcy (śviatoha Rocha) na Załatoj Horcy.
Na palavym ałtary, ustalavanym pobač z załatahorskaj śviatyniaj, adbyłasia śviataja Imša, jakuju ŭznačaliŭ Apostalski nuncyj u Biełarusi arcybiskup Ante Jozič. Razam z pradstaŭnikom Papy Franciška ŭ našaj krainie malilisia Mitrapalit Minska-Mahiloŭski arcybiskup Juzaf Stanieŭski, Hienieralnyja vikaryi archidyjacezii biskupy Juryj Kasabucki i Alaksandr Jašeŭski SDB, a taksama bolš za dva dziasiatki dušpastyraŭ, jakija niasuć słužeńnie ŭ stalicy, u tym liku i z hreka-katalickaj supolnaści.
Pracesija z Załatoj Horki rušyła ŭ bok płoščy Pieramohi. Na pačatku šeścia nieśli kryž, dalej išli mužčyny z kaściolnymi charuhvami, a taksama pradstaŭniki katalickich ruchaŭ i supolnaściaŭ sa svajoj simvolikaj. Dzieci ŭ biełych strojach nieśli padušački z relihijnaj atrybutykaj.
Čatyry śviatary nieśli tron z ustalavanaj na im manstrancyjaj ź Ciełam Chrysta, pierad jakim dziaŭčynki pasypali pialostki kvietak sa słovami malitvy.
U pracesii išli šmatlikija vierniki, mnohija — cełymi siemjami, u tym liku z maleńkimi dziećmi. Ludzi malilisia, śpiavali psałmy i relihijnyja śpievy, prasłaŭlajučy imi Boha.
Kali pracesija vyjšła na płošču Pieramohi, duchavienstva z Najśviaciejšym Sakramentam prajšło na centr, da manumienta, dzie pobač ź Viečnym ahniom byŭ ustalavany druhi ałtar, a ŭsie astatnija ŭdzielniki zastalisia na chodnikach.
Pierajšoŭšy pa moście cieraź Śvisłač, udzielniki pracesii skiravalisia pa praśpiekcie Niezaležnaści da Kastryčnickaj płoščy, dzie byŭ ustalavany treci ałtar. Tam, kala pałaca Respubliki, u hanarovaj varcie pierad Jezusam u Eŭcharystyi stajali junyja ŭdzielniki katalickaha skaŭckaha ruchu ŭ svajoj admietnaj formie i sa štandaram, na jakim źmieščanaja vyjava skaŭckaj lilei — simvała Maci Božaj na fonie kryža.
Apošni, čaćviorty ałtar byŭ padrychtavany kala minskaha kafiedralnaha kaścioła Najśviaciejšaha Imia Maryi. Centralny fasad hałoŭnaj śviatyni archidyjacezii ŭpryhožvała kopija abraza Maci Božaj Budsłaŭskaj, Apiakunki Biełarusi, 25-hodździe z času karanacyi jakoj adznačajecca sioleta.
Na zakančeńnie arcybiskup Juzaf Stanieŭski vykazaŭ padziaku ŭsim udzielnikam pracesii, pieradusim pradstaŭniku Papy Franciška ŭ našaj krainie nuncyju Ante Joziču.
čym heta pryncypova adroźnivajecca ad lubych inšych šeściaŭ i paradaŭ?