Luksavy samalot dla viečarynak 9H-Five ACJ Airbus A220-100. Fota: aviapages.com
Dubajskaja kampanija Five Hotels and Resorts zapuściła pieršy pryvatny luksavy samalot dla viečarynak ACJ TwoTwenty, jaki zmoža vykonvać čartarnyja rejsy ŭ mnohija harady i na roznyja kurorty śvietu. Pra heta 10 červienia napisała ahienctva The Guardian.
Hety «piacizorkavy samalot dla viečarynak» koštam 80 miljonaŭ dalaraŭ maje ŭłasny Wi-Fi, mahutnuju hukavuju sistemu, umantavanyja ŭ stol śviatłodyjodnyja lampy, tancavalnuju i abiedziennuju zony, kinazału, łožak pamieram king-size i duš. Pasažyram taksama buduć vydavać firmovyja pižamy, maski i tapački ad kampanii Five.
Biznes-džet možna arandavać za 13 tysiač dalaraŭ u hadzinu. A pieralot z Łondana ŭ Dubaj moža abyścisia prykładna ŭ 5 tysiač dalaraŭ na čałavieka, kali viečarynku ŭ pavietry vyrašyć arhanizavać hrupa z 16 čałaviek (heta maksimalnaja kolkaść pasažyraŭ, jakuju moža źmiaścić samalot).
«Naš džet vidavočna budzie pa kišeni tolki dla vielmi bahatych ludziej, jakija prosta zachočuć atrymlivać asałodu ad hrošaj, pakul jašče žyvyja. Naprykład, da nas užo źviartaŭsia vielmi viadomy prafiesijny futbalist dla pieralotu ź Blizkaha Uschodu ŭ Madryd, a inšy klijent niadaŭna arandavaŭ samalot dla dvuchtydniovaha padarožža pa vyspach Karybskaha mora. Uvohule, na najbližejšyja miesiacy jość užo jak minimum šeść braniravańniaŭ», — raspavioŭ vykanaŭčy dyrektar Five Hotels and Resorts Ałoki Batra.
Častka interjera luksavaha samalota dla viečarynak ad kampanii Five Hotels and Resorts. Fota: aviapages.com
Pry hetym jon dadaŭ, što niekatoryja zvaroty ab arendzie samalota byli krychu varjackimi: naprykład, adzin chłopiec byŭ hatovy zapłacić 70 tysiač dalaraŭ tolki za toje, kab zrabić prapanovu svajoj dziaŭčynie. Adnak jamu admovili.
Čytajcie taksama:
U Jeŭropie raspracoŭvajuć hipierhukavy samalot, jaki źmienić pasažyrskuju avijacyju
U Saudaŭskaj Aravii źjavicca vysokatechnałahičny chmaračos u formie kuba
U abłomkach «Tytanika» znajšli karali z zubam miehaładona — hihanckaj staražytnaj akuły
