Tom Kruz i Chejli Etvieł. Fota: FlixPix/Alamy
«Misija nievykanalnaja» — heta sieryja špijonskich bajevikoŭ, pieršy film jakoj vyjšaŭ u 1996-m. U centry siužeta — historyja ahienta Itana Chanta, jakoha (jak i Charysan Ford na praciahu 40 hadoŭ ihraje Indyjana Džonsa) na praciahu ŭsich sieryj ihraje Tom Kruz.
U recenzijach na novy film, jaki vychodzić u prakat 12 lipienia, krytyki adznačajuć, što stužka zajmaje duch ad pačatku i da samaha kanca, pry hetym jana i pazačasavaja, i aktualnaja. Krytyki taksama vysoka acanili truki i śmiełaść Toma Kruza, jakomu ŭ pačatku lipienia spoŭniŭsia 61 hod.
«Misija nievykanalnaja: Śmiarotnaja raspłata. Častka pieršaja» — siomy film franšyzy, jakaja pa svajoj pryrodzie štoraz pavinna pierasiahnuć samu siabie. I hetym razam atrymałasia mienavita tak, jak adznačaje ahladalnik vydańnia Gizmodo Žermen Luśje. Pa jaho słovach, sutnaść filma nie źviedzienaja da adnaho firmovaha truka, jakoha ŭsie čakajuć. Novy film «Misii» atrymaŭsia bolš cikavym i składanym, i heta źviazana ŭ tym liku z dvuma nietypovymi piersanažami: bolš składanym zładziejem i źjaŭleńniem patencyjna novaha člena kamandy ahienta Chanta.
Pa siužecie Itan Chant (Tom Kruz) i jaho kamanda (Vinh Rejms i Sajman Pieh) sprabujuć spynić niešta pa mianušcy Substancyja (Entity). Heta biezabličny štučny intelekt, jaki patencyjna moža zrabić lubuju krainu lidaram śvietu. Viadoma, my bačyli ŭžo šmat kinarabot pra niebiaśpieku štučnaha intelektu (adna ź niadaŭnich — sieryjał «Misis Devis»), ale ŭ bajeviku z Tomam Kruzam jość niešta, što robić hetuju temu vielmi mocnaj. Režysior Krystafier Mak-Kuory stvaraje dla hierojaŭ takija situacyi, što vyklikajuć napraŭdu mocnaje pačućcio strachu i niebiaśpieki.
Kab spynić Substancyju, Itan i jaho kamanda pavinny zmahacca z praciŭnikami, kab atrymać dźvie častki kluča. Što robić kluč? Jak jon moža kiravać Substancyjaj? My nie viedajem. Ale my viedajem, što tajamničaja zładziejka Hrejs (Chejli Etvieł) maje adnu z častak. Hulni Itana z Hrejs u kata i myšku — siła, što ruchaje pieršyja sceny filma, uklučajučy niezabyŭnuju aŭtamabilnuju pahoniu i napružany špacyr pa aeraporcie. Ale charaktar hieraini sapraŭdy raskryvajecca, kali jana vymušanaja pracavać z kamandaj. Hrejs pavinna vyrašyć, ci choča jana praciahvać biehčy abo paddacca pierakanańniam Itana. Hety mini-siužet daje filmu pryjemny dadatkovy płast dla analizu.
Jość u filmie i peŭnyja prablemy, źviazanyja z nazvanymi pieravahami: najaŭnaść novych hierojaŭ i składanaha, technałahičnaha złydnia časam robić stužku bolš zabłytanaj. Naprykład, jość scena ŭ načnym kłubie z udziełam amal usich hałoŭnych piersanažaŭ, i pakul jany siadziać i razmaŭlajuć na praciahu 10 chvilin, vy možacie naohuł nie razumieć, pra što idzie havorka. Hetaje pačućcio źjaŭlajecca niekalki razoŭ na praciahu filma. Adnak potym niaŭciamnyja detali taho, što adbyvajecca, zbolšaha źnikajuć. Usio zvodzicca da zrazumiełych krokaŭ: atrymać klučy, spynić Substancyju, vyratavać śviet.
Tom Kruz i Vaniesa Kirbi. Fota: FlixPix/Alamy
Bolš za ŭsio «Misija nievykanalnaja» pryznačanaja dla taho, kab pakazać hledačam zachaplalny nabor ekšn-scen, i «Śmiarotnaja raspłata» prapanuje ich vialikaje mnostva. Mak-Kuory i Kruz robiać toje, čaho nichto nikoli nie rabiŭ, prosta tamu, što jany mohuć. Hetaj ich upeŭnienaściu možna začaravacca, i pa miery taho, jak kožnaja scena stanovicca jašče bolš zachaplalnaj i šakavalnaj, čym papiaredniaja, ciažka nie dazvolić usiamu hetamu ciabie zachlisnuć.
Kali film narešcie dojdzie da šyroka razrekłamavanaj sceny, dzie Itan zhaniaje matacykł sa skały i skača ŭ pavietry, vy ŭžo nie ździviciesia, zrazumieŭšy, što heta tolki pačatak. Toje, što rušyć uśled, mahčyma, jość najlepšaj ekšn-scenaj va ŭsioj sieryi «Misij». Jana pakidaje ŭ radasnym natchnieńni, ale razam ź lohkim rasčaravańniem, bo heta tolki pieršaja častka i napieradzie jašče šmat nieviadomych padziej. Vychad druhoj častki zapłanavany na červień 2024 hoda.
Bolš pra kino:
Dzieviać hałoŭnych kinastužak hetaha leta
Papularny sieryjał «Miadźviedź» vypuściŭ druhi siezon — spadabajecca fanatam hatoŭki i restaranaŭ
