Pra heta paviedamiła 29 listapada žurnalistam ministr achovy zdaroŭja i sacyjalnaha raźvićcia Rasii Taćciana Holikava paśla pasiadžeńnia ŭradavaj kamisii pa likvidacyi nastupstvaŭ krušeńnia.
Pavodle jaje infarmacyi, siarod paciarpiełych padčas krušeńnia «Nieŭskaha ekspresa» — šeść inšaziemcaŭ. «Z dalokaha zamiežža paciarpieli dva čałavieki — italjaniec i bielhijec», — skazała ministr. Hramadzianin Italii znachodzicca ŭ NDI chutkaj miedycynskaj dapamohi Sankt-Pieciarburha. «Jaho stan ciažki, uračy zafiksavali ŭ jaho zakrytyja pierałomy», — paviedamiła Holikava. Hramadzianin Bielhii znachodzicca ŭ balnicy Rasijskaj čyhunki ŭ Sankt-Pieciarburhu, jaho stan zdavalniajučy, dadała ministr.
Pavodle jaje słoŭ, ustanaŭlivajucca źviestki jašče pa čatyroch inšaziemcach, siarod jakich azierbajdžaniec, dva ŭkraincy i biełarus, paviedamlaje RIA Novosti.
U pasolstvie Biełarusi ŭ Rasii pakul nie majuć infarmacyi ab paciarpiełym suajčyńniku.
Zhodna z apošnimi źviestkami, 25 čałaviek zahinuli i 26 źnikli bieź viestak u vyniku katastrofy ciahnika «Nieŭski ekspres» 27 listapada. Dzieviatnaccać achviar apaznany, 85 paciarpiełych zastajucca ŭ balnicach.
Chutki ciahnik № 166 maršrutam Maskva — Sankt-Pieciarburh paciarpieŭ krušeńnie ŭviečary 27 listapada prykładna ŭ kiłamietry ad administracyjnaj miažy Naŭharodskaj i Ćviarskoj abłaściej. Zhodna z asnoŭnaj viersijaj pravaachoŭnych orhanaŭ, pryčynaj katastrofy staŭ terakt.
