Vyjava: vecteezy
Suśvietnaja mietearałahičnaja arhanizacyja AAN i Jeŭrapiejskaja klimatyčnaja słužba Copernicus abviaścili, što zavobłačnyja tempieratury i žorstkija chvali śpiakoty, što achapili płanietu za apošnija try miesiacy, zrabili minułaje leta samym haračym u Paŭnočnym paŭšarji z usich zafiksavanych.
Hetaja navina źjaviłasia paśla taho, jak mietearołahi zafiksavali samy haračy dzień u lipieni. Nie adstavaŭ i nastupny miesiac, jaki staŭ samym haračym žniŭniem za ŭsiu historyju zapisaŭ (i druhim samym haračym miesiacam paśla lipienia 2023 hoda). Tak žnivień akazaŭsia prykładna na 1,5 °C ciaplejšym, čym u daindustryjalnyja hady.
Isnuje suviaź pamiž sioletnimi rekordnymi tempieraturami va ŭsim śviecie i tym, što hety hod byŭ hodam farmavańnia El-Nińjo — źjavaj, što charaktaryzujecca vahańniem tempieratury pavierchnievaha płasta vady ŭ ekvataryjalnaj častcy Cichaha akijana, jakaja akazvaje prykmietny ŭpłyŭ na klimat. U abjavie daśledčykaŭ adznačajecca, što 2016 hod, jaki taksama byŭ hodam El-Nińjo, hetak ža staviŭ novyja tempieraturnyja rekordy. Z časoŭ industryjalizacyi hłabalnaja tempieratura niaŭchilna rasła z-za dziejnaści čałavieka i asabliva z-za praźmiernaha spalvańnia vykapniovaha paliva.
Praciahłaja śpioka taksama aznačała tryvožna vysokija tempieratury akijana i rekordna nizki ŭzrovień marskoha lodu ŭ Antarktydzie ź miesiačnym značeńniem na 12% nižejšym za siaredni, što, biezumoŭna, samaja vialikaja admoŭnaja anamalija ŭ žniŭni z časoŭ spadarožnikavych nazirańniaŭ, paviedamlaje SAAZ.
Raskolina ŭ ledniku, jaki rastaje / Fota: vecteezy
Vysokija tempieratury niasuć z saboju i inšyja ekałahičnyja prablemy. Tak, naprykład, Kanada zmahałasia ź lasnymi pažarami i dymam. Połymia raspaliła i raspaŭsiudziła niezvyčajna ciopłaja viasna, za jakoj uśled rušyła haračaje leta. Dahetul, na pačatak vieraśnia, u krainie praciahvałasia bolš za 1000 aktyŭnych pažaraŭ.
Rekordnaja śpiakota aznačaje taksama i rekordnaje spažyvańnie elektraenierhii, u tym liku za košt pracy kandycyjanieraŭ. Tak, naprykład, u amierykanskim Techasie tempieratury bolš za 42°C hetym letam nahruzili elektryčnuju sietku štata nastolki, što dziaržaŭny apieratar elektrasietki navat prasiŭ žycharoŭ dobraachvotna źnizić spažyvańnie enierhii, raspaviadaje Gizmodo.
Hienieralny sakratar AAN Antoniu Huteryš papiaredziŭ, što čas na ŭkaranieńnie klimatyčnych rašeńniaŭ prachodzić — i spynić dalejšaje paciapleńnie, mahčyma, užo nie ŭdasca. «Klimatyčny zryŭ pačaŭsia, — skazaŭ jon u svaim paviedamleńni ŭ pačatku vieraśnia. — My ŭsio jašče možam paźbiehnuć najhoršaha klimatyčnaha chaosu, i nam nielha hublać ni siekundy».
Čytajcie taksama:
Dola vykapniovaha paliva ŭ enierhietycy źmienšyłasia ŭ Jeŭrasajuzie da histaryčnaha minimumu
Rasija ŭchilajecca ad sankcyj usio chitrejšymi sposabami
Lipień stanie samym haračym miesiacam u historyi nazirańniaŭ
