Dzianis Urbanovič. Fota: staronka Dzianisa Urbanoviča ŭ fejsbuku
Dzianis Urbanovič za paŭtara hoda vajny piać razoŭ byŭ paranieny. Ale źbirajecca viarnucca na front i paśla apošniaha ranieńnia, jakoje jon atrymaŭ u Klaščejeŭcy (Danieckaja vobłaść) 10 vieraśnia. U bataljonie biełaruskich dobraachvotnikaŭ «Vołat» 34-hadovy vajar kamanduje bajavoj hrupaj.
U intervju jutub-kanału 6TV Biełaruś bajec vystupiŭ z žorstkaj krytykaj na adras kiraŭnictva Pałka Kalinoŭskaha.
Urbanovič skieptyčna stavicca da zajavaŭ štaba Pałka Kalinoŭskaha ab vyzvaleńni Biełarusi: «Adzinaje, što ja mahu skazać, heta toje, što połk Kalinoŭskaha svaimi aficyjnymi zajavami pra vyzvaleńnie Biełarusi… Ja navat nie viedaju, jak skazać. Heta śmiech prosta».
Ën nie bačyć sistemnaści ŭ dziejańniach svajho kiraŭnictva i, bolš za toje, maje pretenzii da ich sumlennaści.
Na dumku Urbanoviča, «kab vyzvalać Biełaruś, treba mieć vializny bajavy dośvied, pryciahvać jak maha bolš biełarusaŭ».
Pachod na Biełaruś
Aceńvajučy zvarot Valeryja Sachaščyka i zajavu Dzianisa «Kita» Procharava padčas buntu Pryhožyna, Urbanovič zaŭvažaje, što niepasredna tady znachodziŭsia ŭ špitali i prapuściŭ usio.
«Ale ja adno viedaŭ — u Biełaruś nichto ź ich nie zmoža pajści. Heta fizična niemahčyma».
Na dumku Urbanoviča, biełaruskija ŭzbrojenyja čaści va Ukrainie prosta nie majuć dastatkova siły.
«Kali «Vahnier» pryjšoŭ u Biełaruś — heta kala čatyroch tysiač [bajcoŭ], kali nie pamylajusia. Heta daśviedčanyja bajcy, zabojcy, hvałtaŭniki, admarozki, jakija nie dumajuć, vyžyvuć ci nie.
I ŭ toj momant, kali vyzvolnaje biełaruskaje vojska, jakoje znachodzicca va Ukrainie, idzie na Biełaruś na vyzvaleńnie, to heta vajna. Heta druhi front.
U Biełaruś zajści nie tak prosta. Heta treba vieści dyvizii tankaŭ, dyvizii harmat [dyvizii, jakija majuć na ŭzbrajeńni tanki i artyleryju]», — adznačaje Urbanovič.
Dzianis Urbanovič nie škaduje ironii:
«Zapomnicie, dla kiraŭnictva Pałka Kalinoŭskaha vyzvaleńnie Biełarusi moža być tolki ŭ tyktoku. I ŭsio. U ich niama nijakaha zakładzienaha imknieńnia da vyzvaleńnia Biełarusi, — narakaje Urbanovič. — Dla ich połk Kalinoŭskaha, vajna — heta jašče adna mahčymaść, jak skazać, stvaryć niešta i na hetym zarabić.
Paŭtara hoda ja hladzieŭ na ich, analizavaŭ i dumaŭ: «Vajavać pajedziecie, chłopcy?» Vy ž nie pajedziecie. Ale pry hetym vy starajeciesia niejak heta padnieści, što «my vajujem na ŭsich frantach, znachodzimsia tam i tam». Ale nasamreč takoha niama».
Urbanovič dadaje, što «kali b z nami byŭ žyvy naš kamandzir Mirasłaŭ Łazoŭski, to ja ŭpeŭnieny, što jon skazaŭ by ŭsio toje, što kažu ja».
Situacyja ŭ štabie Pałka Kalinoŭskaha
Dzianis Urbanovič zajaviŭ, što padazraje ludziej, jakija ŭvachodziać u štab Pałka Kalinoŭskaha, u machlarstvie. Jon paabiacaŭ «nieŭzabavie» abnarodavać takija fakty ŭ ŚMI.
«Ja pryjšoŭ słužyć, vajavaŭ, vyjazdžaŭ na pieršyja bajavyja, atrymaŭ pieršaje ranieńnie. I voś jašče z tych časoŭ ja zrazumieŭ, što štości nie toje adbyvajecca. U nas byli roznyja situacyi».
Urbanoviča taksama aburaje, što kamandzirami pryznačajucca asoby biez naležnaha bajavoha vopytu, atrymanaha paśla 2022 hoda.
«Naprykład, «Kit» [Dzianis Procharaŭ], jaki siabie pazicyjanuje jak kamandzir», — nazyvaje Urbanovič.
«Ja zaŭsiody kazaŭ, kab nas nie pazicyjanavali z Pałkom Kalinoŭskaha. Toje, što tam ludzi dzieści kaliści słužyli, u «Azovie» ci dzieści jašče, pryjšli i skazali: «Voś ja ciapier kamandzir». Dvoje takich archaraŭcaŭ — takich, jak «Vaniš» i «Mikoła», — nazyvaje inšyja pazyŭnyja Dzianis Urbanovič.
«Vaniš» — heta Arciom Vojnič, adzin z kamandziraŭ Pałka, a «Mikoła» — jašče adzin kamandzir, były maładafrontaviec Mikałaj Dziemidzienka. Krytyku na ich adras raniej vykazvali i inšyja bajcy, da prykładu, Jaŭhien Michasiuk.
«U štabie (nie ŭ Pałku, tamu što ŭ Pałku vajujuć hodnyja biełarusy) jość ludzi, jakija pabudavali hety biznes. Vielmi ciažka i składana skazać, što heta bajavaja struktura. Tamu što ŭsio zaviazana na palitycy, na biznesie, na mašynach (pryhnali, pradali),» — narakaje Urbanovič.
— Ja pryviadu prykład. Toje, što mnie pieradali ź Jeŭropy našy biełarusy dla bataljona «Vołat», častkova nie dajšło, kudyści źnikła. My nie možam razabracca. Jak mnie napisali, heta była mašyna i čatyry drony. Drony, darečy, dajšli. My zvanili ŭ Połk, nie možam zrazumieć, kudy jano pryjšło. I voś našy kamandziry, jakim ty možaš zadać pytańnie, tamu ž samamu «Kitu»: «Čamu nam kažuć, što ŭ nas 120 mašyn, a my kuplajem mašyny za svaje hrošy? — kaža Urbanovič.
Pry hetym, śćviardžaje jon, kiraŭniki štaba prykryvajucca imiem Zianona Paźniaka:
«Jany zaŭsiody spasyłajucca na toje, što «z nami Paźniak. Zianon Stanisłavavič nas padtrymaŭ. Značyć my ŭsie česnyja, usie spraviadlivyja. My chočam vajavać».
Pasłuchajcie, 130 čałaviek vajujuć na froncie, 240 siadzić u Kijevie. Dyk jak my možam prasoŭvać pieramohu, kali vajuje peŭnaja kolkaść ludziej, a tam 200, 300, 400, 500 siadziać na niejkich pasadach.
Na praciahu paŭtara hoda my zadavali hetaje pytańnie: «Vajavać kali budziem, spadarstva?» Nas na ŭsich nie chopić. U mianie zastałosia niašmat ludziej. Ja jašče na dva bajavyja schadžu i nas užo ŭ žyvych nie budzie.
Ci hatovy Połk vajavać? Połk nie hatovy vajavać. Połk — heta nie vajskovaja struktura. Heta vałanciorskaja, napałovu palityčnaja arhanizacyja, jakaja prosta «voś my jość, a vajna dzieści na trecim płanie», — śćviardžaje Urbanovič.
«I nie važna, siadziać chłopcy z hienierataram u akopie ci biez», — padkreślivaje bytavuju kryŭdu Dzianis Urbanovič.
«Tolki ŭ akopie, tolki na froncie, vyzvalajučy mietr za mietram ukrainskuju ziamlu, ty zmožaš paznać, nakolki heta ciažka i nakolki heta kaštoŭna. Nie siadzieć na kijeŭskim płacdarmie i raskazvać «my pojdziem vyzvalać Biełaruś», jak Kabančuk, z «Džavielina» rasstrelvać HUBAZ. Jon [Kabančuk] «Džavielina» ŭ vočy ni razu nie bačyŭ. Heta niesurjozny padychod», — krytykuje Urbanovič.
«Stvaryć biełaruskuju armiju takimi mietadami nikoli ŭ žyćci nie atrymajecca», — ličyć Urbanovič.
Ci praŭda, što z bataljona «Vołat» syšli 30 čałaviek
Urbanovič nie paćviardžaje čutak pra toje, što z bataljona «Vołat» z-za supiarečnaściej 30 čałaviek pierajšli va ŭkrainskuju čaść.
«Kab vy razumieli, ukrainskija kamandziry — heta dziejnyja aficery. A biełarusy, voś my kamandziry, my taksama vučylisia. Skončyli kamandzirskija kursy. Staršyja siaržanty. Ale jość aficerski skład. Jość u nas niekalki ludziej, jakija pierajšli. Ale ja b nie skazaŭ, što heta 30 čałaviek. Jany pierajšli ŭ suviazi z tym, što žyć u takim harmidary i vajavać jany nie chočuć (heta nie da nas pytańnie, a da Pałka). Jany majuć na heta prava. Zabaranić im nichto nie moža. Jany pierajšli. Ale my słužym u adnoj čaści. My robim adnu spravu. Prosta ŭ roznych hrupach. Pa sutnaści, jurydyčna, nichto nikudy nie syšoŭ», — patłumačyŭ Urbanovič.
Bajec adznačaje, što kali nastupić momant, nadydzie raźviazka i «štab Pałka Kalinoŭskaha nie budzie pieraškadžać stvareńniu biełaruskaha nacyjanalnaha vojska, usie biełarusy, jakija vajavali ŭ składzie Pałka, jany ŭsie viernucca ŭ tyja padraździaleńni, u jakich jany byli, i praciahnuć vajskovuju słužbu. I pa mahčymaści, kali pryjdzie toj čas vyzvalać Biełaruś, jany hatovy ŭsie pajści vyzvalać krainu.
Ale na hety momant jany nie chočuć viartacca z adnoj prostaj pryčyny — kiraŭnictva štaba Pałka Kalinoŭskaha. Bo ŭ ich jość represiŭnaja mašyna. Niezadavolenych mohuć adpravić na palihraf ci sprabavać niejak vyhnać», — žurycca Urbanovič.
Čym niezadavolenyja bajcy Pałka Kalinoŭskaha
Urbanovič adznačaje, što ŭ bajcoŭ jość «niekalki pytańniaŭ da samoha štaba i da niekalkich ludziej — Mikałaja «Mikoły» Dziemidzienki i Arcioma «Vaniša» Vojniča.
«U mianie nievialikaje pytańnie: «A płan vyzvaleńnia Biełarusi ŭ ich jość?» — pytajecca Urbanovič i sam adkazvaje. — «Niama i nikoli ŭ žyćci nie było».
Urbanovič adznačaje, što biełaruskija bajcy nie prafiesijnyja vajskoŭcy:
«My pryjšli dobraachvotnikami. My vučylisia vajavać. Ja nie prafiesijny vajskoviec. Za paŭtara hoda ja navučyŭsia vajavać. Ja prajšoŭ kursy. Voś jość hrupa. My ŭsie vučymsia. Chtości vytrymlivaje, chtości nie. U kahości psichika trochi składziena nie tak. Chtości moža i ŭ turmie siadzieŭ, bandyt niejki. Chtości ščyry čałaviek. A chtości kryčyć: «Začem nam biełaruskaja mova, u nas vsio charašo i z ruskim jazykom». Jość i takija ludzi. Ale jość adzin niuans. Kali budujecca fundamient, na jakim pavinna stvaracca biełaruskaje vojska, i ŭ hetym fundamiencie znachodziacca ludzi, jakija šukajuć niejkuju vyhadu, tak my ničoha nie pabudujem», — kaža Urbanovič.
Kiraŭnictva, jakoje siabie pazicyjanuje, što «my vajujem, my kamandziry», voś da ich jakraz vializnaje pytańnie, paŭtaraje Urbanovič.
Što treba rabić
Urbanovič kaža, što nie raz havaryŭ z roznymi ludźmi ab tym, što kiraŭnictva Pałka Kalinoŭskaha pieratvaryłasia ŭ prablemu.
«U nas byŭ zapłanavany ŭ vieraśni źjezd «Maładoha frontu». Ale z-za taho, što ja i niekatoryja inšyja chłopcy byli paranienyja, plus śpiecsłužby nie vielmi chočuć, kab zjezd adbyŭsia va Ukrainie, jon nie prajšoŭ. My jaho praviadziom. Moža być u kastryčniku. I zrobim aficyjnuju zajavu nakont taho, što adbyvajecca ŭ struktury Pałka Kalinoŭskaha. Jana ŭžo padrychtavana, ale budzie ahučana paśla zjezda».
Urbanovič adznačaje, što jamu šmat razoŭ zadavali pytańnie, čamu jon nie moža zastacca ŭ Kijevie i «navodzić paradak». Ale jon nie moža pakinuć tych chłopcaŭ, ź jakimi znachodzicca na froncie: «Braterskaja luboŭ. My razam byli paranienyja. Ja nie pakinu front nijak».
34-hadovy ŭradženiec vioski Michałkavičy Łahojskaha rajona Dzianis Urbanovič za čas vajny pieražyŭ piać ranieńniaŭ. Paśla kožnaha viartaŭsia na front. Toje ž źbirajecca zrabić i hetym razam.
Jon kaža, što jamu nie abaviazkova znachodzicca na pieradavoj. Jak kamandziru hrupy bataljona «Vołat», jamu treba raźmiarkoŭvać zadačy siarod padnačalenych i sačyć za ich vykanańniem.
«U mianie kamandzirskija funkcyi, ale inšym razam situacyja vymahaje majho ŭdziełu ŭ bai. U apošni ja vyjšaŭ, bo jon byŭ vielmi haračym», — tłumačyŭ «Našaj Nivie» Dzianis.
Chto moža abjadnać biełaruskich vajaroŭ
Na hetaje pytańnie Dzianis Urbanovič zajaviŭ, što kožny bajec z bataljona «Vołat», u składzie jakoha jon vajuje, moža pavieści za saboju. «Luby čałaviek z bajavym vopytam moža ŭznačalić». U toj ža čas Dzianis adznačaje, što jon sam «ni za kim nie pajšoŭ by, u jaho žorstki niedavier».
U jakaści kamandzira Urbanovič ni ŭ jakim razie nie bačyć Valeryja Sachaščyka.
«Što moža zrabić Sachaščyk? U jaho niama aŭtarytetu. Sachaščyk nie byŭ u bajach. Tak, jon vajskovy čałaviek, razumny, skončyŭ Vajskovuju akademiju. Ja nie mahu jamu daviarać. Asabliva paśla toj historyi z rasijskim pašpartam. U mianie niejki niedavier», — kaža Urbanovič.
Nie vieryć jon i ŭ Śviatłanu Cichanoŭskuju.
«My adzin raz joj davierylisia. Vy pamiatajecie. Mirnyja pratesty. Nie čapajcie milicyi, heta zakładniki režymu Łukašenki. Nie čapajcie taho, nie chadzicie siudy», — krytykuje jon.
«Adziny lidar dla biełarusaŭ — heta biełaruski narod, jak kazaŭ naš Mikałaj Statkievič. Kali biełaruski narod zachoča, jon heta zrobić. Ale biełaruski narod zaraz śpić i nie moža raskaturchacca», — narakaje Urbanovič i na narod.
«Ni adna Cichanoŭskaja, ni adzin Sachaščyk nie mohuć na dadzieny momant prahnazavać chacia b nie niejki adsotak, jak heta možna zrabić, [jak vyzvalić Biełaruś].
Voś, kali znojdziecca čałaviek, jaki zmoža chacia b prapanavać pačatak dziejańniaŭ pa vyzvaleńni Biełarusi, tady možna ab niečym zadumacca. Na dadzieny momant takich ludziej nie było. I prapanoŭ takich nie było», — pryznaje Urbanovič.
Udakładnieńnie. U pačatkovaj viersii artykuła zamiest «Kabančuk» było pamyłkova nazvana proźvišča «Kavalčuk». Pieraprašajem, što niapravilna źniali proźvišča z aŭdyjazapisu.
Čytajcie jašče:
Dzianis Urbanovič atrymaŭ piataje ranieńnie
«Suprać nas vajujuć nie debiły». Dzianis Urbanovič raskazaŭ pra boj, u jakim byŭ paranieny
Fotafakt: Zianon Paźniak sustreŭsia z trojčy paranienym na froncie Dzianisam Urbanovičam
