Fota: instahram personal_tour
Hety vostraŭ adkryŭ Chrystafor Kałumb u žniŭni 1498 hoda, a nazvaŭ jaho ŭ honar infanty Marharyty Aŭstryjskaj.
Žemčuh, jakim zaŭsiody słaviŭsia hety vostraŭ, staŭ pryčynaj jaho chutkaj kałanizacyi. Z tych časoŭ vostraŭ nazyvajuć «Žamčužyna Vieniesueły». Ale ciapier adna z hałoŭnych krynic prybytku — heta nie žemčuh, a turyzm. Na vostravie pabudavali šmat hatelaŭ (u tym liku i vielmi fiešeniebielnych). A plažy ź biełaśniežnym piaskom raściahnulisia na 315 kiłamietraŭ. Častka ź ich idealna padychodzić dla amataraŭ siorfinhu. Ale ŭvohule chvali byvajuć niebiaśpiečnyja na ŭsich plažach Marharyty.
Fota: instahram solncetur_ru
Chvali na plažy — heta nie adzinaje, čaho treba ścierahčysia na vostravie. Rekamiendujecca zachoŭvać hrošy, darahuju techniku i kaštoŭnaści ŭ siejfie hatela. Ni ŭ jakim razie nie pakidać kaštoŭnaści biez nahladu kala basiejna ci na plažy. A paśla taho jak ściamnieje, pa-za hatelem lepš nie hulać — jak minimum u adzinocie.
Jašče adna standartnaja rekamiendacyja — pić tolki butylavanuju vadu, staranna myć sadavinu i harodninu. A pry braniravańni hatela varta ŭdakładnić, ci jość u numarach antymaskitnyja sietki.
U hatelach vostrava zvyčajna jość biaspłatny Wi-Fi, a voś na mabilny internet lepš nie raźličvać — nabyćcio miascovaj sim-karty časta stanovicca sapraŭdnym kvestam.
Pakujučy čamadany ŭ adpačynak treba nie zabycca pierachadnik dla razietki, tamu što ŭ Vieniesuele sistema elektrazabieśpiačeńnia ŭładkavanaja na amierykanski ŭzor (napružańnie 110 volt).
Kali kazać pra słavutaści, to na vostravie Marharyta rekamiendujuć naviedać horad Ła-Asunśjon. Pakolki horad pabudavali ŭ samym sercy vostrava, kab vorahu niaprosta było jaho atakavać z vady, tam zachavałasia mnostva pomnikaŭ kałanijalnaj kultury. Tam ža možna zajści ŭ staruju bułačnuju, jakaja była adkrytaja jašče ŭ 1946 hodzie — i da hetaha času hatuje pa receptach tych hadoŭ. A jašče možna pasiadzieć va ŭtulnych maleńkich restarančykach, fiška jakich zaklučajecca ŭ adsutnaści mieniu — kuchary kožny dzień hatujuć niešta novaje.
Samy vialiki horad na ŭźbiarežžy — heta Parłamar. Kaliści jon byŭ nievialikaj rybackaj viosačkaj, a ciapier tut žyvie kala 30% žycharoŭ vostrava. Heta i hałoŭnaje miesca načnych tusovak. Ale znoŭ ža, u načny čas tut niebiaśpiečna, tamu lepš pieramiaščacca pa horadzie na taksi.
U cełym, na vostravie turystam nie rekamiendujuć karystacca hramadskim transpartam, bo maršrut rejsavych aŭtobusaŭ moža mianiacca kožny dzień — nieabchodna zahadzia vyśviatlać u kiroŭcy, jak jon siońnia pajedzie. Pry hetym bolšaść miascovych žycharoŭ viedaje tolki ispanskuju movu, razmaŭlać ź imi na anhlijskaj naŭrad ci atrymajecca.
U 1943 hodzie Parłamar atrymaŭ status zony biaspošlinnaha handlu, tamu šmatlikija turysty pryjazdžajuć siudy na šopinh.
Litaralna za niekalki kiłamietraŭ ad Parłamara znachodzicca horad Pampatar, dzie cikava naviedać krepaść Castillo de San Carlos Borromeo, pabudavanuju ŭ 1662 hodzie.
Jašče adzin cikavy horad — heta Chuan-Hryjeha. Siudy pryjazdžajuć pahladzieć na pielikanaŭ, jakija na plažy ciahajuć rybu z rybackich łodak. Słavicca miesca i svaimi rybnymi restaracyjami.
Na vostravie jość dva nacyjanalnyja parki: Łahuna Ła-Restynha — heta manhravyja zaraśniki, sa strakatymi čarodami fłaminha, papuhajaŭ i pielikanaŭ, i Sera-el-Kapiej — heta hustyja lasy, poŭnyja małpaŭ i aleniaŭ.
Na rasijskich forumach možna pabačyć, što turysty skardziacca na toje, što ich bankaŭskija karty na vostravie Marharyta nie pracujuć. My spytali ŭ biełaruskich turapierataraŭ, ci jość takija prablemy ŭ našych suajčyńnikaŭ, i atrymali adkaz:
— Biełaruskija karty na vostravie pracujuć, ale treba mieć na ŭvazie toje, što karty tam u pryncypie nie šmat dzie prymajuć. Tamu my raim turystam brać z saboj najaŭnyja — lepš dalary drobnymi kupiurami.
Biełarusam prapanoŭvajuć pramy pieralot z Maskvy, jaki doŭžycca 12—14 hadzin. Treba adznačyć, što vostraŭ Marharyta — heta nie vielmi tanny varyjant dla adpačynku. Naprykład, adzin z samych biudžetnych turaŭ dla dvaich na adzinaccać načej u trochzorkavym hateli (sa śniadankami) kaštuje kala 2500 dalaraŭ.
Čytajcie taksama:
Biełarusam prapanoŭvajuć lacieć zaharać zimoj u Kitaj. Kirunak nazyvajuć samym dastupnym
