Časopisy «Kałambur» i «Odin doma». Fota: sacsietki vydańnia
Čytačy «Našaj Nivy» raskazali, što nie mohuć vypisać časopisy «Kałambur» i «Odin doma». Vydańni prybrali z padpisnoha katałoha. «Pryjom padpiski zakryty ŭ suviazi ź nieprachodžańniem pierarehistracyi vydańnia», — skazana na sajcie Biełpošty.
Staryja numary jašče možna kupić u kniharniach i kijoskach, a novyja z druhoj pałovy hetaha hoda ŭ prodažy nie źjavilisia.
Adnaho z čytačoŭ u Ministerstvie infarmacyi zapeŭnili, što časopis zastajecca ŭ rejestry zarehistravanych vydańniaŭ, a jaho prysutnaść u padpisnym katałohu zaležyć ad rašeńnia samoj redakcyi. Čamu jon źnik z padpiski, čynoŭniki nie viedajuć.
Sam časopis u svaim telehram-kanale tłumačyć, što ŭ ich «ciažkaści i biurakratyčnyja prablemy». U lipieni redakcyja abviaściła, što padpiski ŭ druhim paŭhodździ 2023-ha nie budzie, ale ŭ svabodnym prodažy vydańnie zjavicca.
Krynica, blizkaja da redakcyi časopisa, havoryć, što vydańnie maje «finansavyja prablemy, jakija ŭskładniajuć pracu, ale jany nie katastrafičnyja i vyrašalnyja».
Ciaham tydnia ŭ prodažy pavinny źjavicca 7-y i 8-y numary (za lipień i žnivień). Ich drukujuć ź vialikaj zatrymkaj.
U redakcyi vydańnia adnamu z čytačoŭ paviedamili, što «ŭ časopisa napraŭdu prablemy, ale namieraŭ zakryć jaho niama». Kažuć, u pieršym paŭhodździ 2024-ha ŭ padpisku jon nie vierniecca, a voś ź leta ŭžo možna budzie padpisacca.
«Heta vymušanyja miery, kab zachavać časopis. Ci budzie dastupnaja anłajn-viersija — pytańnie adkrytaje», — adkazali čytaču.
Pry zaklučeńni damovy ź Biełpoštaj ab raspaŭsiudzie pa padpiscy, vydańnie abiacaje svoječasova vydać zajaŭlenuju kolkaść numaroŭ.
U sacyjalnych sietkach redakcyja zaklikaje čytačoŭ padpisvacca na telehram-kanał časopisa. U hrupie niama śviežych numaroŭ, ale jość naviny ab ich vychadzie i anonsy.
Pieršyja numary ruskamoŭnaha zabaŭlalnaha časopisa «Kałambur» pabačyli śviet u 1997 hodzie.
U im byli žarty, naviny i pop-kultura śvietu, komiksy, konkursy i kryžavanki. Startavy numar vydańnia vyjšaŭ nakładam 40 tysiač ekzemplaraŭ na 32 staronkach. U 2000-ja tyraž siahaŭ 220 tysiač. Paźniej u redakcyi staŭ vychodzić i časopis «Odin doma».
Sa zjaŭleńniem sacyjalnych sietak nakład časopisaŭ staŭ padać. U 2012 hodzie źmianiŭsia hałoŭny redaktar.
Vydaŭcom «Kałambura» i jaho dadatkaŭ vystupaje kampanija «Rosčierk», jakoj naležyć i vydaviecki dom «Vita». «Rosčierk» — najbujniejšy dystrybjutar časopisaŭ u Biełarusi.
«Razvlekatielnyj Kałambur» i «Odin doma» vychodziać raz na miesiac, raspaŭsiudžvajucca ŭ Biełarusi i Rasii.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Ad Bykava da Michałka. Što my hladzieli, čytali i słuchali ŭ 2000-ja
«Atrymała zarobak — 6,66 rubla za miesiac». Jakija ŭmovy ŭ kałonijach, dzie siadziać palitviaźni
Ministr infarmacyi ŭručyŭ sioletniaj «Mis Biełaruś» zbor tvoraŭ Janki Kupały
Ministr Piarcoŭ sabraŭsia stvarać «miedyjachołdynhi» ŭ kožnaj z abłaściej
