Karta situacyi pad Chiersonam stanam na 30 kastryčnika z telehram-kanała «Rybaŕ»
«Chiersonski kirunak: pašyreńnie kantrolu USU ŭ Krynkach» — heta zahałovak dopisu ŭ rasijskim telehram-kanale «Rybaŕ» uviečary 30 kastryčnika.
«[Ukrainskija] marpiechi pačali prasoŭvańnie ŭ zachodnim kirunku, trochi pašyryŭšy zonu kantrolu. … Učora ŭviečary šturmavyja hrupy zaniali rajon małoha čyhunačnaha mosta, abstalavaŭšy dadatkovy aporny punkt i praktyčna nabliziŭšysia da [siała] Pojma», — bje tryvohu «Rybaŕ».
Chiersonski kirunak staŭ adnym z najbolš aktyŭnych na rasijska-ŭkrainskim froncie. Bai iduć vakoł siała Krynki na levym bierazie Dniapra (jano lažyć za 2 kiłamietry ad raki i za 27 kiłamietraŭ na ŭschod ad Chiersona). Na jaho ŭskrainie ŭkrainskija vojski zamacavalisia 19 kastryčnika. Z taho času pad kantrol ukraincaŭ pierajšła jak minimum centralnaja častka pasiołka. A asobnyja ŭkrainskija płacdarmy na levym bierazie vializnaj raki źlilisia ŭ sucelnuju pałasu.
Praŭda, pad kantrolem ukraincaŭ znachodziacca pieravažna bahnistyja astravy ŭ delcie Dniapra, nijakaj rehularnaj pierapravy ŭkrainskaja armija nie naviała, a na levym bierazie dziejničajuć hrupy bieź ciažkaj techniki.
Nievialikija harady na levym bierazie — Aleški, Radziensk, Novaja Kachoŭka — zastajucca pad rasijskim kantrolem.
Tym nie mienš u sacyjalnych sietkach rasijskija vajskovyja błohiery aktyŭna abmiarkoŭvajuć bai za Krynki i nazyvajuć pryčyny paražeńnia.
Farsiravańnie Dniapra pad Chiersonam. Fota: Alex Babenko / AP Photo
Ukrainskaja artyleryja daminuje nad rasijskaj
Ukrainski bok zdoleŭ abstalavać na levym bierazie, u tym liku ŭ Krynkach, ahniavyja punkty, jakija paśpiachova pieraškadžajuć dziejańniam rasijskaj piachoty. Utrymańniu terytoryi sadziejničajuć masiravanyja abstreły artyleryi: ukrainskaja daminuje nad rasijskaj.
«Praciŭnik nie maje kolkasnaj pieravahi, ale aktyŭna, možna skazać vielmi aktyŭna, prykryvaje svoj marski desant ahniom roznaj artyleryi, u tym liku 80-mm i 120-mm minamiotami, tankami, 155-mm artyleryjaj, uklučajučy kasietnyja bojeprypasy. Z našaha ž boku, jak zvyčajna, bardak i «idzicie tudy, zrabicie niešta». Składvajecca adčuvańnie, što kamandavańnie hrupoŭki absalutna nie kampietentnaje», — piša rasijski «Kanał śpiecialnoho naznačienija».
«Praciŭnik moža sabie dazvolić pakłaści dziasiatki (kala 30) snaradaŭ u kvadrat 100ch100m» — dadaje kanał Grey Zone.
U toj ža čas z rasijskaha boku kontrbatarejnaja baraćba amal adsutničaje, narakajuć frantaviki. Sama ž artyleryja adčuvaje patrebu «ŭ razy bolšaj kolkaści bojeprypasaŭ i harmat». Błohiery kanstatujuć taksama, što rasijskaja artyleryja nie moža dastać da šeraha dalnabojnych harmat praciŭnika nataŭskaj vytvorčaści.
Pa słovach błohieraŭ, ukrainski bok aktyŭna vykarystoŭvaje kasietnyja bojeprypasy, jakija «prosta robiać rešata z usiaho navokał».
Na ŭčastku kala Krynak, pavodle słoŭ vajskovych błohieraŭ, adsutničaje abarončaja linija. U vyniku piachota chavajecca tam, dzie paśpieje. Pry hetym bajcy nie majuć mahčymaści akapacca, bo, jak śćviardžajecca, u šeraha «sił adsutničajuć sapiornyja rydloŭki».
Jašče adna akaličnaść — «roj FPV-dronaŭ», jakija, pa słovach Grey Zone, «lotajuć i ŭ ciomny čas sutak. … Mohuć spuskacca da vierchavin drevaŭ i nachabna cikavać za … pazicyjami». «Užo dachodzić da taho, što koptary USU mohuć dazvolić sabie padlacieć da doma, sieści na dach i prosta vieści nazirańni», — dadaje «Kanał śpiecialnoho naznačienija».
Błohiery pišuć: «Dalokaść ich palotu z paražeńniem našaj adzinki techniki paćvierdžana na adlehłaści 12 kiłamietraŭ». A «rabota na adlehłaści 7-8 kiłamietraŭ dla ich zusim nie prablema», jak i nie prablema srodki radyjoelektronnaj baraćby, u najaŭnaści jakich u rasijskaha boku na hetym kirunku błohiery sumniavajucca.
A voś ukrainski bok aktyŭna imkniecca hłušyć rasijskija drony, kab pazbavić mahčymaści karektavać ahoń artyleryi. U vyniku rasijanam «nie zaŭsiody ŭdajecca padniać Mavic vyšej za 30—40 mietraŭ».
Błohiery śćviardžajuć, što «praciŭnik moža sabie dazvolić vydzialać na kožnyja 50—100 mietraŭ pa koptary dla manitorynhu abstanoŭki na vulicach. Akramia taho, jany pracujuć kanviejeram, prosta biezupynku, mianiajučy adzin adnaho ŭ kvadratach nazirańnia».
U vyniku, pa słovach «Romanov Łajt», «praktyčna štodzionna pavialičvajecca kolkaść spalenaha FPV lehkavoha transpartu». Dla taho, kab paźbiehnuć strat, «bajcy prosiać vykarystać dośvied vahnieraŭcaŭ u Bachmucie i naciahnuć sietki nad darohami».
Niedachopy rasijskaha boku
Jak paviedamlaje «Kanał śpiecialnoho naznačienija», pad Krynkami nie viedajuć, što takoje praca rasijskaj avijacyi.
«Z taho bieraha mohuć spakojna pracavać dva tanki praciŭnika, a adstralaŭšy ŭvieś bojekamplekt, prosta zjechać», — padtakvaje Grey Zone.
«Na zapyty kidać FABy z UMPK (avijacyjnaja bomba z unifikavanym modulem płaniravańnia i karekcyi. — NN) na vostravie dla padaŭleńnia raźlikaŭ BPŁA praciŭnika dajecca adkaz, što nie, naša zadača — pracavać pa tym bierazie. Navošta bić prosta ciapier u anhary i niejkija elevatary, kali možna nanieści ŭdary dla padaŭleńnia tych, chto znachodzicca na astravach i non-stop zapuskaje koptary?» — maralizuje «Kanał śpiecialnoho naznačienija».
Pa słovach błohieraŭ, rasijskija vojski nie majuć mahčymaści evakujavać paranienych, nie kažučy pra vyvaz ciełaŭ tych, chto zahinuŭ, bo evakuacyja «spałučanaja ź vialikaj niebiaśpiekaj trapić pad ahoń artyleryi».
Niama mahčymaści i padvozu vady dy ježy. U vyniku «sabrać niešta z hetaha davodzicca na miascovaści z taho, što raskidana kala źniščanych [ahniom ukrainskaj artyleryi] mašyn», — pišuć błohiery.
Ale siarod usich prablem, jak adznačajecca, pieršasnaj zjaŭlajecca chłuśnia. «Maniać, pačynajučy ź miescaŭ, zakančvajučy hrupoŭkaju vojskaŭ. Mahčyma, i vyšej…. Na Krynkach kožnaje kalena pieradačy infarmacyi prychłušvała pa žmieńcy, a na vychadzie byŭ sapraŭdny p…ž», — skardzicca błohier Grey Zone.
Jon ža paćviardžaje kolišnija słovy Jaŭhiena Pryhožyna ab adsutnaści kiravańnia vojskami i śćviardžaje, što situacyju «ciahnuć bajavyja kamandziry na miescach».
«Vojskaŭ nahnali šmat — tołku mała. Uzajemadziejańnie nie naładžana, — narakaje błohier i dadaje: — 10 dzion niemahčyma vybić praciŭnika z častki maleńkaha pasiołka, jaki adrezany vadoj i faktyčna akružany. A toj [praciŭnik] jašče ŭmudrajecca arhanizoŭvać padvoz i ratacyju sił, chaj i nie zaŭsiody ŭdała».
Grey Zone nazyvaje płan ukraincaŭ «Apieracyja Narmandyja».
Čym skončycca historyja, pa słovach błohiera, jašče daviadziecca daviedacca. Rasijskija błohiery ŭskładajuć spadziavańni na tolki pryznačanaha kamandujučym hrupoŭkaj «Dniapro» hienierał-pałkoŭnika Michaiła Ciaplinskaha.
Kanał «Romanov Łajt» čakaje, što ŭkrainski bok «na praciahu čatyroch dzion — tydnia budzie naładžvać pantonnyja pierapravy» cieraz Dniapro. Kali heta ŭdasca paśpiachova ažyćciavić, heta budzie apieracyja, supastaŭnaja pa značeńni z vysadkaj sajuźnikaŭ u Narmandyi, jakaja pryviała da krušeńnia hitleraŭskaj Hiermanii ciaham hoda paśla jaje.
Čytajcie jašče:
Ataka na rakietna-zienitny połk SPA ŭ Krymie: paranienyja 17 rasijskich vajskoŭcaŭ
Ukrainski Hienštab uskosna paćvierdziŭ paviedamleńni ab novym desancie na levy bierah Dniapra
Na spadarožnikavych zdymkach aeradroma Bielbiek u Sievastopali vyjavili namalavanyja źniščalniki
