Ilustracyjny zdymak. Fota: vecteezy.com
Nam z žonkaj krychu bolš za 30 hadoŭ, u Polšču pryjechali kala dvuch hadoŭ tamu — nie chacieli žyć u krainie, dzie «nie da zakonaŭ». Spačatku jak u doŭhi adpačynak, potym zrazumieli, što nadoŭha.
U studzieni 2023 hoda daviedalisia, što chutka zapuściać prahramu Bezpieczny Kredyt 2%, i vyrašyli dziejničać.
Nie mahu skazać, što my maryli ab kupli žylla ŭ Polščy, ale ja dastaŭ kalkulatar i paličyŭ.
Na toj momant my płacili 3000 złotych za arendu jeŭradvuški. Płaciež pa kredycie, zhodna z maimi raźlikami, vychodziŭ ad 2 600 złotych da 3 000. Heta značyć, pry spryjalnym źbiehu abstavinaŭ vychodziła taja ž suma arendy, tolki ty pastupova stanovišsia ŭładalnikam hetaha žylla (jakoje pry hetym maje fiksavanuju canu).
A jašče było jasna, što z-za hetaj prahramy popyt na žyllo pavialičycca (i ceny taksama). Tamu kali, jak nie ciapier?
My nahledzieli kvateru mary ŭ blizkim pryharadzie (15 km da centra horada, 7 km da najbližejšaha vialikaha HC). Heta była dvuchpaviarchovaja 70-mietrovaja kvatera-taŭnchaus z soniečnymi panelami i sučasnaj sistemaj aciapleńnia za $110 tysiač.
My daviedalisia ŭ banku, što nieruchomaja majomaść nie ŭ Polščy nie zjaŭlajecca pieraškodaj. U nas jość kvatera ŭ Biełarusi, jakaja prosta prastojvaje — arenda ŭ našym horadzie vielmi tannaja, a ramont dobry. Pradać jaje nie možam praz novaŭviadzieńni, tak što budzie čakać nas na vypadak, kali ŭ Biełarusi niešta źmienicca.
Farmalna ŭ nas navat nie było pieršapačatkovaha ŭniosku. My prasili ŭ banka ŭsiu sumu kvatery (430 000 złotych) i ramont (90 000 złotych). A jašče apłacili spadarožnyja vydatki:
10 000 złotych — za reziervacyju zabudoŭščyku (pajšli ŭ košt apłaty);
10 700 złotych — pravizija banka za vydaču kredytu;
2 000 złotych — strachavy ŭniosak u BGK za harantyju (zamiest 20% uniosku).
Damovu z zabudoŭščykam padpisali ŭ kancy krasavika na ŭmovach, što zapłacim 10 000 złotych u jakaści pieršaha ŭniosku, a da 31 žniŭnia zabudoŭščyk atrymaje ŭsiu sumu. Kali my nie paśpiavajem u termin i pakazvajem choć adnu admovu ad banka, nam viartajuć hrošy.
U nas byŭ kredytny ahient, ź jakim my razmaŭlali na polskaj movie. Ale adziny pazityŭny momant ad jaho toj, što jon moh patelefanavać u bank svaim ludziam i spytać tam: «Nu što čuvać?» i «Što jašče treba danieści?». A jašče z-za jaho my «pralacieli» z akcyjaj «Alijora», tamu što jany razdavali 4000 złotych, kali padaješsia sam, biez ahienta.
Dziaciej u nas niama, dachod — kala 24 tysiač bruta, aboje — IP.
My daviedvalisia ŭmovy ŭ niekalkich bankaŭ.
Pekao ŭchvaliŭ kredyt tolki na zaharadžalnych umovach, što aznačaje «my damo vam kredyt, jak vy prasili, ale vy pavinny 20% ad hetaj sumy apłacić zabudoŭščyku». My admovilisia.
PKO doŭha duryŭ hałavu ŭsialakimi pytańniami i vypiskami (pry tym, što ŭ nas rachunki tam asnoŭnyja). Patrabavali pakazać, ź jakoha mienavita rachunku my płacim za ZUS, i zrabić usie vypiski, chacieli detalovaje ese na temu «Što ja rablu na pracy». A potym admovili, tamu što ŭ mianie byŭ pobyt časovy, a nie stały.
U vyniku kredyt my ŭziali ŭ Alior Bank.
Patrabavańniaŭ pa strachavańni žyćcia bank nie vystaŭlaŭ. Nieabchodna było tolki zastrachavać žyllo choć by samaj minimalnaj strachoŭkaj («tolki ścieny»), nam jana abyšłasia va Uniqa ŭ 75 złotych. Asobna my zrabili narmalnuju strachoŭku na svaju karyść za 650 złotych za hod, jakaja ŭklučaje paškodžańni majomaści i hramadzianskuju adkaznaść navat za miežami domu.
Kredyt uziali terminam na 25 hadoŭ, ale pastarajemsia chutčej zakryć jaho paśla zakančeńnia lhotnaha pieryjadu. U siarednim, miarkujučy pa hrafiku vypłat na najbližejšyja piać hadoŭ, štomiesiačny płaciež budzie vahacca pamiž 2400 i 2800 złotych.
Klučy ŭžo ŭ nas, my navat pačali ramont.
Spadziajomsia zajechać da kanca śniežnia, choć polskija rabotniki nie asabliva śpiašajucca: jašče na samych pieršych etapach ramontu my sutykajemsia z tym, što kali ŭ damovie napisana «ad dvuch da piaci tydniaŭ», heta značyć, što jany pačnuć niešta rabić tolki na čaćviortym tydni.
Čytajcie taksama:
Čamu ŭ Biełarusi adbyvajecca bum na rynku nieruchomaj majomaści? Tłumačyć ekanamist
Kali lepš nabyvać damok na vioscy i jakija jość varyjanty?
Rekord za ŭsiu historyju. Što adbyvajecca z kvaterami ŭ rehijonach
